କାଏରୋ: ମିଷ୍ଟେରିୟସ୍ ଲେଡି ନାମରେ ପରିଚିତ ଜଣେ ମହିଳାଙ୍କ ମମି ଠାବ ହୋଇଛି। ତାଙ୍କ ଗର୍ଭରେ ଏକ ଶିଶୁର ଭ୍ରୂଣ ଥିବା ପୋଲାଣ୍ଡର ଗବେଷକମାନେ ବିଶ୍ଳେଷଣ କରି ଜାଣିବାକୁ ପାଇଛନ୍ତି। ଗବେଷକଙ୍କ ମତରେ ୨,୦୦୦ ବର୍ଷ ପୂର୍ବେ ମହିଳା ଜଣକ ୨୮ ସପ୍ତାହର ଗର୍ଭବତୀ ଥିବାବେଳେ ତାଙ୍କ ମୃତ୍ୟୁ ଘଟିଥିଲା। ସେତେବେଳେ ତାଙ୍କୁ ୨୦ରୁ ୩୦ ବର୍ଷ ବୟସ ହୋଇଥିଲା। ଖ୍ରୀଷ୍ଟପୂର୍ବ ପ୍ରଥମ ଶତାବ୍ଦୀରେ ମହିଳା ଜଣକ ଜୀବିତ ଥିବାବେଳେ କେମିତି ଦେଖାଯାଉଥିଲେ ତାହା ଦର୍ଶାଇବାକୁ ଯାଇ ବିଶେଷଜ୍ଞମାନେ ତାଙ୍କ ଖପୁରି ଓ ଅନ୍ୟ ଦେହାବଶେଷକୁ ବ୍ୟବହାର କରି ଦୁଇଟି ଚିତ୍ର ତିଆରି କରିଛନ୍ତି। ଓ୍ବାର୍ସ ମିମି ପ୍ରୋଜେକ୍ଟ ସଦସ୍ୟ ତଥା ଇଟାଲୀୟ ଫୋରେନ୍ସିକ୍ ନୃତତ୍ତ୍ୱବିତ୍ ଚନ୍ତାଲ୍ ମିଲାନି କହିଛନ୍ତି, ଜଣେ ବ୍ୟକ୍ତିଙ୍କ ଚେହେରା ସମ୍ପର୍କରେ ତାଙ୍କ ଅସ୍ତି ଓ ଖପୁରି ଅନେକ ସୂଚନା ଦେଇଥାଏ। ମିଷ୍ଟେରିୟସ୍ ଲେଡିଙ୍କ ମୁହଁର ଅବିକଳ ଚିତ୍ର ଅଙ୍କାଯାଇପାରି ନ ଥିଲେ ମଧ୍ୟ ତାଙ୍କ ଚେହେରା ସହ ଏହାର ଅନେକ ସାମଞ୍ଜସ୍ୟ ରହିଛି। ମୁଖମଣ୍ଡଳର ସମ୍ମୁଖଭାଗରେ ଥିବା ଅସ୍ତିଗୁଡ଼ିକର ସୂକ୍ଷ୍ମ ତନ୍ତୁକୁ ଯୋଡ଼ାଯୋଡ଼ି କରିବା ସବୁଠୁ ଗୁରୁତ୍ୱପୂର୍ଣ୍ଣ। ଏଥିପାଇଁ ସାରାବିଶ୍ୱର ବିଭିନ୍ନ ଜାତିର ଲୋକଙ୍କ ପରିସଂଖ୍ୟାନ ତଥ୍ୟକୁ ବ୍ୟବହାର କରାଯାଇଥାଏ। ଥେବାନ୍ ସମ୍ପ୍ରଦାୟର ରହସ୍ୟମୟୀ ମହିଳାଙ୍କ ମମି ଥେବେସ୍ର ରାଜକୀୟ ସମାଧିଗୁଡ଼ିକ ମଧ୍ୟରେ ଠାବ ହୋଇଥିଲା। ଏହି ମମିକୁ ୧୮୨୬ ଡିସେମ୍ବରରେ ଆବିଷ୍କାର କରାଯାଇଥିଲା। କ୍ଲିଓ ପାଟ୍ରା ଇଜିପ୍ଟର ରାଣୀ ଥିବାବେଳେ ଏହି ମହିଳା ଜଣକ ଜୀବିତ ଥିଲେ।
