କେନ୍ଦୁଝର,୫ା୧୧(ସ୍ବ.ପ୍ର.): ସଦର ଥାନା ଅନ୍ତର୍ଗତ ବଡ଼ପଶି ନିକଟରେ ହୋଇଥିବା ମର୍ମନ୍ତୁଦ ସଡ଼କ ଦୁର୍ଘଟଣାରେ ୪ ଜଣଙ୍କ ଶୋଚନୀୟ ମୃତ୍ୟୁ ହୋଇଥିଲା। ଏନ୍ଏଚ୍ଏଆଇ କର୍ତ୍ତୃପକ୍ଷ ଓ ଠିକାଦାରଙ୍କ ଅବହେଳା, ଦାୟିତ୍ୱହୀନତା, ଖାମଖିଆଲ ମନୋଭାବ ଓ ତ୍ରୁଟିପୂର୍ଣ୍ଣ କାର୍ଯ୍ୟ ଯୋଗୁ ଏଭଳି ଦୁର୍ଘଟଣା ଗତ ୩ ତାରିଖରେ ଘଟିଥିଲା। ଏଥିପାଇଁ ଏନ୍ଏଚ୍ଏଆଇ ଓ ଠିକାଦାରଙ୍କୁ ଦାୟୀ କରି ସେମାନଙ୍କ ବିରୋଧରେ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ପାଇଁ ଘଷିପୁରା ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ପ୍ରାର୍ଥୀ ଜଗବନ୍ଧୁ ମହାନ୍ତ ଦାବି କରିଛନ୍ତି। ଏନେଇ ସେ ଏସ୍ପି କେନ୍ଦୁଝର, ଏନ୍ଏଚ୍ଏଆଇ ତଥା ପୋଲିସ ମହାନିର୍ଦ୍ଦେଶକ, କେନ୍ଦ୍ର ରାସ୍ତା ଓ ପରିବହନ ସଚିବଙ୍କୁ ମଧ୍ୟ ଚିଠି କରି କାର୍ଯ୍ୟାନୁଷ୍ଠାନ ଦାବି କରିଛନ୍ତି। ରାସ୍ତା ନିର୍ମାଣ କାମ ସରି ନ ଥିବାରୁ ଗୋଟିଏ ପାର୍ଶ୍ୱ ରାସ୍ତାରେ ଗାଡ଼ି ଚଳାଚଳ କରୁଥିବା ବେଳେ ସାବଧାନିକ ସୂଚନା କିମ୍ବା ବେଗ ନିୟନ୍ତ୍ରଣ ସୂଚନା ନ ଥିବାରୁ ଏଭଳି ଦୁର୍ଘଟଣା ଘଟିଥିବା ଅଭିଯୋଗ କରିଛନ୍ତି। ଏନେଇ ସଦର ଥାନାଧିକାରୀ ସୁନିଲ କର କହିଛନ୍ତି, ତାଙ୍କ ପାଖରେ ଏତଲା ପହଞ୍ଚିବା ପରେ ସେ ମତାମତ ଦେଇପାରିବେ। ରାସ୍ତା ଅବରୋଧ ନେଇ ଅନୁମତି ନିଆଯାଇଛି କି ନାହିଁ ଏବଂ ସେଭଳି କ୍ଷେତ୍ରରେ ଏନ୍ଏଚ୍ଏଆଇର ଗାଇଡ୍ଲାଇନ୍ ପାଳନ ହୋଇଛି କି ନାହିଁ ତଦନ୍ତ ହେବା ଜରୁରୀ ବୋଲି ଆଇନଜୀବୀ ସୁରଜ ମହାପାତ୍ର କହିଛନ୍ତି।
