ନୂଆଦିଲ୍ଲୀ, ୨୦।୮ : ଭାରତୀୟ ପ୍ରତିରକ୍ଷା ବାହିନୀ ଫାଷ୍ଟ-ଟ୍ରାକ ମାର୍ଗ ମାଧ୍ୟମରେ ଗୁରୁତ୍ୱପୂର୍ଣ୍ଣ ଅସ୍ତ୍ରଶସ୍ତ୍ର ପ୍ରଣାଳୀ କ୍ରୟ କରିବା ପାଇଁ ଜରୁରୀକାଳୀନ କ୍ଷମତା ପାଇବେ। ସୂଚନାନୁସାରେ, ଆସନ୍ତା ସପ୍ତାହରେ ଅନୁଷ୍ଠିତ ହେବାକୁ ଥିବା ପ୍ରତିରକ୍ଷା ମନ୍ତ୍ରଣାଳୟର ଉଚ୍ଚ ସ୍ତରୀୟ ବୈଠକରେ ପ୍ରତିରକ୍ଷା ବାହିନୀଙ୍କୁ ଜରୁରୀକାଳୀନ ଅଧିଗ୍ରହଣ କ୍ଷମତା ପ୍ରଦାନ ପ୍ରସଙ୍ଗରେ ଆଲୋଚନା କରାଯାଇପାରେ।
ସୂତ୍ରରୁ ପ୍ରକାଶ ଯେ କାର୍ଯ୍ୟକ୍ଷମ ପ୍ରସ୍ତୁତିକୁ ଆହୁରି ମଜବୁତ କରିବା ପାଇଁ ସରକାର ପ୍ରତିରକ୍ଷା ବାହିନୀକୁ ଜରୁରୀକାଳୀନ ଅଧିଗ୍ରହଣ କ୍ଷମତା ଅଧୀନରେ ଗୁରୁତ୍ୱପୂର୍ଣ୍ଣ ଅସ୍ତ୍ରଶସ୍ତ୍ର କ୍ରୟ କରିବାକୁ ଅନୁମତି ଦେଇପାରନ୍ତି। ଜରୁରୀକାଳୀନ ଅଧିଗ୍ରହଣ କ୍ଷମତା ପ୍ରତିରକ୍ଷା ବାହିନୀକୁ ଫାଷ୍ଟ-ଟ୍ରାକ ମାର୍ଗରେ ଯେକୌଣସି ସିଷ୍ଟମ କିମ୍ବା ଯନ୍ତ୍ରପାତି କ୍ରୟ କରିବାକୁ ଅନୁମତି ଦେବ।
ଉଲ୍ଲେଖନୀୟ କଥା ହେଉଛି, ପାକିସ୍ତାନ ସହିତ ତୀବ୍ର ଉତ୍ତେଜନା ସମୟରେ, ୨୦୧୬ ରେ ଉରି ସର୍ଜିକାଲ ଷ୍ଟ୍ରାଇକ ପରେ ପ୍ରଥମ ଥର ପାଇଁ ପ୍ରତିରକ୍ଷା ବାହିନୀକୁ ଦିଆଯାଇଥିବା କ୍ଷମତା ମଧ୍ୟ ମେ ୨୦୨୦ ଠାରୁ ଚାଇନା ସହିତ ଚାଲିଥିବା ସାମରିକ ବିବାଦର ମୁକାବିଲା କରିବାରେ ସହାୟକ ହୋଇଛି।
ପୂର୍ବ ଅନୁମୋଦନରେ ପ୍ରତିରକ୍ଷା ବାହିନୀକୁ ଦିଆଯାଇଥିବା କ୍ଷମତା ଅନୁଯାୟୀ, ପ୍ରତିରକ୍ଷା ବାହିନୀର ୩୦୦ କୋଟି ଟଙ୍କା ମୂଲ୍ୟର ଉପକରଣ କାରବାର ସ୍ବାକ୍ଷର କରିବାର କ୍ଷମତା ଥିଲା। ଏହି ଉତ୍ପାଦଗୁଡିକ ତିନିମାସରୁ ଏକ ବର୍ଷ ମଧ୍ୟରେ ବିତରଣ କରିବାର ଥିଲା। ସଶସ୍ତ୍ର ବାହିନୀକୁ ସେମାନଙ୍କ ବଜେଟ ଆବଣ୍ଟନରୁ ନୂତନ ଅଧିଗ୍ରହଣ ପାଇଁ ଟଙ୍କା ଖର୍ଚ୍ଚ କରିବାକୁ ପଡିବ ଏବଂ ଏହି କାରବାର ପାଇଁ ପ୍ରତିରକ୍ଷା ମନ୍ତ୍ରଣାଳୟର ଅନୁମୋଦନ ନେବାର ଆବଶ୍ୟକତା ନାହିଁ।
ପ୍ରତିରକ୍ଷା ବାହିନୀ ଏହି ଅଧିଗ୍ରହଣ ମାଧ୍ୟମରେ ସେମାନଙ୍କର ପ୍ରସ୍ତୁତିକୁ ମଜବୁତ କରିଛନ୍ତି। ଜରୁରୀକାଳୀନ ହସ୍ତାନ୍ତର କ୍ଷମତାର ଏକ ଅଂଶ ଭାବରେ ଭାରତୀୟ ବାୟୁସେନା ଏବଂ ସେନା ହେରାନ ମାନବ ବିହୀନ ବିମାନ ଯାନ କ୍ରୟ କରିଛନ୍ତି ଯାହା ବର୍ତ୍ତମାନ ଲଦାଖ ଏବଂ ଉତ୍ତର-ପୂର୍ବରେ ଚାଇନାର କାର୍ଯ୍ୟକଳାପ ଉପରେ ନଜର ରଖିବା ପାଇଁ ନିୟୋଜିତ ହୋଇଛି। ଏହା ବ୍ୟତୀତ ସେନା କ୍ଷେପଣାସ୍ତ୍ର ମଧ୍ୟ କିଣିଛି। ଯାହା ଦୂରରୁ ଭୂମି ଉପରେ ଟାର୍ଗେଟ କରିବାକୁ ସକ୍ଷମ।
ଭାରତୀୟ ପ୍ରତିରକ୍ଷା ବାହିନୀରେ ହାମର କ୍ଷେପଣାସ୍ତ୍ରର ସାମିଲ ହେବା ଦ୍ୱାରା ରାଫାଲ ଯୁଦ୍ଧ ବିମାନର ଶକ୍ତି ମଧ୍ୟ ବୃଦ୍ଧି କରିଛି, ଯାହା ଦୀର୍ଘ ଦୂରରୁ ବଙ୍କର୍ ପରି ହାର୍ଡ ଗ୍ରାଉଣ୍ଡ ଟାର୍ଗେଟର ଲକ୍ଷ୍ୟଭେଦ କରିବାକୁ ସକ୍ଷମ। ସୂଚନାନୁସାରେ, ଭାରତୀୟ ସଶସ୍ତ୍ର ବାହିନୀ ବିଭିନ୍ନ ପର୍ଯ୍ୟାୟରେ ସରକାର ସେମାନଙ୍କୁ ଦେଇଥିବା ଜରୁରୀକାଳୀନ କ୍ରୟ କ୍ଷମତାକୁ ବହୁଳ ଭାବରେ ବ୍ୟବହାର କରିଛନ୍ତି। ଶତ୍ରୁମାନଙ୍କ ଦ୍ୱାରା କୌଣସି ବିବାଦ କିମ୍ବା ଆକ୍ରମଣର ମୁକାବିଲା ପାଇଁ ଆବଶ୍ୟକ ଅସ୍ତ୍ରଶସ୍ତ୍ର ସହିତ ନିଜକୁ ସଜ୍ଜିତ କରିପାରିଛନ୍ତି।
ଏହି କ୍ଷମତାକୁ ସରକାର ପୁନର୍ବାର ପ୍ରତିରକ୍ଷା ବାହିନୀକୁ ପ୍ରଦାନ କରୁଛନ୍ତି ଯେଉଁ ସମୟରେ ଚାଇନା ତାଇୱାନ ସାମ୍ନାରେ ଆକ୍ରମଣାତ୍ମକ ଯୁଦ୍ଧାଭ୍ୟାସ କରୁଛି ଏବଂ କ୍ଷେପଣାସ୍ତ୍ର ନିକ୍ଷେପ କରି ଶକ୍ତି ପ୍ରଦର୍ଶନ କରୁଛି। ଅପରପକ୍ଷରେ ଗୁଜୁରାଟ ଉପକୂଳ ନିକଟରେ ଭାରତ ସହିତ ସାମୁଦ୍ରିକ ସୀମାରେ ପାକିସ୍ତାନୀ ଏଜେନ୍ସିମାନେ ମଧ୍ୟ ଅଭିଯାନ କରିବାକୁ ଚେଷ୍ଟା କରୁଛନ୍ତି। ଏହାର ଜବାବ ଦେବାକୁ ଏଭଳି ପଦକ୍ଷେପ ପୁଣି ଗ୍ରହଣ କରାଯିବ ବୋଲି କୁହାଯାଉଛି।
