ବାଲେଶ୍ୱର ଅଫିସ, ୨୦।୮: ବାଲେଶ୍ୱର ସହର ଉପକଣ୍ଠ ଦହପଡ଼ା-ଫୁଲାଡ଼ି ମଧ୍ୟଦେଇ ପ୍ରବାହିତ ବୁଢ଼ାବଳଙ୍ଗ ନଦୀର ଦକ୍ଷିଣପାର୍ଶ୍ୱରେ ହୋଇଥିବା ପଥରପ୍ୟାକିଂ ଧସିଛି। ନଦୀକୂଳିଆ ଗାଁକୁ ଥିବା ବିପଦ ଥିବା ଆଶଙ୍କା ନେଇ ସ୍ଥାନୀୟ ବାସିନ୍ଦା ଜିଲା ପ୍ରଶାସନଠାରେ ଅଭିଯୋଗ ଆଣିଛନ୍ତି।
ବୁଢ଼ାବଳଙ୍ଗ ନଦୀ ଦକ୍ଷିଣପାର୍ଶ୍ୱରେ ଅନ୍ୟୁନ ୪୦ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ହୋଇଥିବା ପଥରପ୍ୟାକିଂ କାମ ୬ ମାସ ନ ପୂରୁଣୁ ପୁଣି ପଥର ଖସି ନଦୀଗର୍ଭକୁ ଯାଇଛି। ପ୍ୟାକିଂ ବେଳେ ସ୍ପର ଠିକ୍ ଭାବେ ନ ହେବା, ମଧ୍ୟମଧରଣର ଗଣ୍ଡରେ ପଥର ଡମ୍ପିଂ କରା ନ ଯାଇ ମାଟିକୁ ସଜାଡ଼ି ପଥରପ୍ୟାକିଂ ହୋଇଥିଲା। ଚଳିତ ଲଘୁଚାପଜନିତ ବର୍ଷା ପ୍ରଭାବରେ ନଦୀରେ ଆସିଥିବା ସାମାନ୍ୟ ବନ୍ୟାରେ ୨୦ ଫୁଟ୍ରୁ ଅଧିକ ପଥର ପ୍ୟାକିଂ ନଦୀଗର୍ଭକୁ ଧସିଯାଇଛି। ଏଥିସହ ପଥରପ୍ୟାକିଂର ଆଗକୁ ମଧ୍ୟ କିଛି ଅଂଶ କୂଳକ୍ଷୟ ହୋଇଛି। ପ୍ୟାକିଂରେ ଅତ୍ୟନ୍ତ ଛୋଟପଥର ଦେବା, ପଥର ସଂଯୋଗୀକରଣରେ ସିମେଣ୍ଟ ଜଏଣ୍ଟ ନ ହେବା ଓ ସର୍ବୋପରି ଆଡ଼ିବନ୍ଧରୁ ଉପରକୁ ପାଖାପାଖି ଦେଢ଼ମିଟର ପଥର ଦିଆ ନ ଯିବା ଏହା ଧସିବାର ଅନ୍ୟତମ କାରଣ ବୋଲି ଆଶଙ୍କା କରାଯାଉଛି। ସେହିପରି ଉକ୍ତ ସ୍ଥାନରେ ଏକ ମଧ୍ୟମଧରଣର ଗଣ୍ଡ ରହିଛି। ଗଣ୍ଡ ପାର୍ଶ୍ୱରେ ଗାର୍ଡ଼ୱାଲ କିମ୍ବା ବଡ଼ ବଡ଼ ପଥର ଡମ୍ପିଂ କରାଯାଇ କୂଳକ୍ଷୟ ନିମନ୍ତେ ପଥର ପ୍ୟାକିଂ କରାଯିବା କଥା। ହେଲେ କାଁ ଭାଁ ପଥର ଡମ୍ପିଂ କରାଯାଇ ଯେନତେନ ଏହି ପ୍ୟାକିଂ କରାଯାଇଥିଲା। ପ୍ରତିବର୍ଷ ବୁଢ଼ାବଳଙ୍ଗ ନଦୀ କୂଳକ୍ଷୟ ନିମନ୍ତେ କୋଟି କୋଟି ଟଙ୍କା ଖର୍ଚ୍ଚ ହେଉଛି। ଏହାର କିଛିଦିନ ପରେ ପୁଣି ମରାମତି ପାଇଁ କାର୍ଯ୍ୟ କରାଯାଉଥିବାରୁ ବାରମ୍ବାର ରାଜସ୍ବହାନି ହେଉଛି। ଏହାକୁ ନେଇ ସାଧାରଣରେ ଆଲୋଚନା ହେଉଛି।
ସେହିପରି ସହର ଉପକଣ୍ଠସ୍ଥ ଅକ୍ତିଆରପୁର ଛକପରଠାରୁ ୫୦୦ ମିଟର, ୫୦୦ରୁ ୯୫୦ ଓ ୫୦୦ରୁ ୧୪୫୦ ମିଟର ପର୍ଯ୍ୟନ୍ତ ୩ଟି ପର୍ଯ୍ୟାୟରେ ମଧ୍ୟ ୫କୋଟିରୁ ଊର୍ଦ୍ଧ୍ୱ ଟଙ୍କାର ପଥରପ୍ୟାକିଂ ଚଳିତବର୍ଷ ହୋଇଛି। ଏହି ପଥରପ୍ୟାକିଂର କିଛି ଅଂଶରୁ ପଥର ଖସିବା ମଧ୍ୟ ଆରମ୍ଭ ହେଲାଣି। ପଥର ଯୋଡ଼ାଣି ମୁଣ୍ଡକୁ କଂକ୍ରିଟ୍ରେ ଜଏଣ୍ଟ କରା ନ ଯିବା ଦ୍ୱାରା ସାମାନ୍ୟ ବର୍ଷାପାଣିରେ ପଥର ଉପରେ ମାଡ଼ ହେଉଛି ଓ ପଥର ମଧ୍ୟରେ ଥିବା ଫାଙ୍କାରୁ ମାଟି ନଦୀଗର୍ଭକୁ ବାହାରିଯିବାରୁ ଅତି ସହଜରେ ପ୍ୟାକିଂ ପଥର ଖସୁଛି। ନିମ୍ନମାନର କାମ ହେଉଥିବା ବେଳେ ବିଭାଗୀୟ ଯନ୍ତ୍ରୀ ଓ ଅଧିକାରୀ ଏହାକୁ ଧ୍ୟାନ ନ ଦେବା ହେତୁ ନଦୀକୂଳିଆ ଗ୍ରାମବାସୀ ନାହଁି ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହି ସମସ୍ୟାକୁ ଦୃଷ୍ଟି ଦେବା ପାଇଁ ଜିଲାପାଳଙ୍କୁ ଅନୁରୋଧ କରିବା ସହ ବିଧିବଦ୍ଧ ତଦନ୍ତ ନିମେନ୍ତ ଗ୍ରାମବାସୀ ଦାବି କରିଛନ୍ତି।
