କୋକସରା,୨।୮(ଡି.ଏନ୍.ଏ.): କଳାହାଣ୍ଡି ଜିଲାର ବିଭିନ୍ନ ବ୍ଲକରେ ଗତକିଛି ଧରି ରାତିରେ ସନ୍ଦିଗ୍ଧ ବ୍ୟକ୍ତି ମାନେ ବୁଲୁଥିବା ଏବଂ ଚୋରି ଡକାୟତି କରୁଥିବା ନେଇ ବିଭିନ୍ନ ସୋସିଆଲ ମିଡ଼ିଆରେ ଖବର ଭାଇରାଲ ହେଉଛି। ଏହାକୁ ନେଇ ଲୋକଙ୍କ ମଧ୍ୟରେ ଏକ ଅଜଣା ଭୟ ଦେଖିବାକୁ ମିଳିଛି। କୋକସରା ବ୍ଲକରେ ମଧ୍ୟ ଏହି ଖବରର ପ୍ରଭାବ ଦେଖିବାକୁ ମିଳିଛି। ସନ୍ଧ୍ୟା ପରେ ରାସ୍ତା ଘାଟ ଖାଁ ଖାଁ ଲାଗୁଛି । ଲୋକେ ତାଟି କବାଟ ଦେଇ ଘରେ ରହୁଛନ୍ତି। ଏମିତିକି କୋକସରା ବ୍ଲକର ଅନେକ ପଞ୍ଚାୟତର ଗ୍ରାମ ଗୁଡିକରେ ଯୁବକମାନେ ସଂଘବଦ୍ଧ ହୋଇ ଗ୍ରାମର ସୁରକ୍ଷା ପାଇଁ ଦଳ ଦଳ ହୋଇ ବିଭିନ୍ନ ଗଳି, ଛକ, ରାସ୍ତାରେ ଠେଙ୍ଗା ଧରି ପହରା ଦେଉଛନ୍ତି। ଏସବୁ ମଧ୍ୟରେ ସୋସିଆଲ ମିଡ଼ିଆରେ ଭାଇରାଲ ହେଉଥିବା ଗୁଜବକୁ ବିଶ୍ୱାସ ନକରି କୌଣସି ଅଜଣା କିମ୍ବା ସନ୍ଦିଗ୍ଧ ଲୋକଙ୍କୁ ରାତିରେ ନିଜ ଅଞ୍ଚଳରେ ଦେଖିଲେ ପୋଲିସ ପ୍ରଶାସନକୁ ଖବର କରନ୍ତୁ ବୋଲି ନିଜ ପଞ୍ଚାୟତର ଲୋକଙ୍କୁ ସଚେତନ କରୁଛନ୍ତି ଯୁବ ସରପଞ୍ଚ। କୋକସରା ବ୍ଲକ ମୂଷାପାଲି ପଞ୍ଚାୟତର ଯୁବ ସରପଞ୍ଚ ଅକ୍ଷୟ କୁମାର ନାଏକ ନିଜ ପଂଚାୟତରେ ଗାଁ ଗାଁ ବୁଲି ଏପରି ଭାବେ ଲୋକଙ୍କୁ ସଚେତନତା କରୁଥିବା ଦେଖିବାକୁ ମିଳିଛି। ସରପଞ୍ଚଙ୍କ ଏହି ନିଆରା ଉଦ୍ୟମକୁ ପଞ୍ଚାୟତର ଜନସାଧାରଣ ମଧ୍ୟ ସାଧୁବାଦ ଦେଇଛନ୍ତି। ଅନ୍ୟପଟେ ଏନେଇ କୋକସରା ଥାନା ଅଧିକାରୀ ପ୍ରସନ୍ନ ବେହେରାଙ୍କୁ ପଚାରିବାରୁ ପୋଲିସ ମଧ୍ୟ ରାତି ତମାମ ପେଟ୍ରୋଲିଂ କରୁଛ। କୌଣସି ସନ୍ଦିଗ୍ଧ ଲୋକଙ୍କୁ ଦେଖିଲେ ଆଇନକୁ ହାତକୁ ନନେଇ ପୋଲିସକୁ ଖବର ଦେବାପାଇଁ ସଚେତନ କରାଯାଉଛି ବୋଲି କହିଛନ୍ତି।
