ହାଇଦ୍ରାବାଦ,୨୮।୫: କେଜିଏଫ୍ ରିଲିଜ ହେବାର ଅନେକ ଦିନ ବିତିଯାଇଥିଲେ ହେଁ ଆଜିଯାଏ ତାର କ୍ରେଜ କମିନାହିଁ। ହେଲେ ମନୋରଞ୍ଜନ ଲାଗି ଉଦ୍ଦିଷ୍ଟ ଫିଲ୍ମରୁ ସିଗାରେଟ୍ ଟାଣିବା କଳା ଶିଖିବା ଜଣେ ନାବାଳକଙ୍କୁ ମହଙ୍ଗା ପଡ଼ିଛି। ଚଳଚ୍ଚିତ୍ରର ମୁଖ୍ୟ ଭୂମିକା ରକି ଭାଇ ଚରିତ୍ରକୁ ଅନୁସରଣ କରି ଜଣେ ୧୫ ବର୍ଷୀୟ ପ୍ରଶଂସକ ପୁରା ପ୍ୟାକେଟ ସିଗାରେଟ୍ ଟାଣି ଦେଇଥିଲେ। ଏହା ପରେ ଉକ୍ତ ନାବାଳକଙ୍କ ସ୍ବାସ୍ଥ୍ୟାବସ୍ଥା ବିଗିଡି ଯାଇଛି। ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।
ନାବାଳକଜଣଙ୍କ ହାଇଦ୍ରାବାଦର। ତାଙ୍କୁ କେଜିଏଫ-୨ ପସନ୍ଦ ଆସିଥିଲା। ଏଥିପାଇଁ ସେ ଦୁଇ ଦିନରେ ଏହି ଫିଲ୍ମକୁ ତିନି ଥର ଲଗାତର ଦେଖିଥିଲେ। ଫିଲ୍ମ ଦେଖିବା ପରେ କେଜିଏଫ୍ର ଲିଡ୍ ଅଭିନେତା ୟଶଙ୍କ ସିଗାରେଟ ଟାଣିବା ତାକୁ ବେଶ ପ୍ରଭାବିତ କରିଥିଲା। ଏହାପରେ ନାବାଳକ ଜଣଙ୍କ ଏକାଥରକେ ପୂରା ପ୍ୟାକେଟ ସିଗାରେଟ ଟାଣି ନେଇଥିଲେ। ଫଳରେ ତାଙ୍କର ସ୍ବାସ୍ଥ୍ୟାବସ୍ଥା ବିଗିଡି ଯାଇଥିଲା। ତାଙ୍କୁ ନିଶ୍ୱାସ ନେବାରେ କଷ୍ଟ ଅନୁଭବ ହୋଇଥିଲା। ଏପରିକି ତାଙ୍କ ଗଳାରେ ଭୀଷଣ ଯନ୍ତ୍ରଣା ହୋଇଥିଲା। ଏହାପରେ ପରିବାର ଲୋକେ ଚିନ୍ତାରେ ପଡ଼ିଯାଇଥିଲେ। ପରେ ସେ ଅଧିକ ଗୁରୁତର ହେବା ପରେ ପରିବାର ଲୋକେ ହସ୍ପିଟାଲରେ ଭର୍ତ୍ତି କରିଛନ୍ତି।
