ଓ୍ବାଶିଂଟନ,୨୯ା୪: ଆମେରିକା କହିଛି ୫୫ରୁ ଅଧିକ ଦେଶ ଇଣ୍ଟରନେଟର ଭବିଷ୍ୟତ ବିଷୟରେ ଏକ ଘୋଷଣାପତ୍ର ଜାରି କରିଛନ୍ତି। ଭାରତ ଭଳି ଦେଶ ପାଇଁ ଏହାର ଦ୍ୱାର ଏବେ ବି ଖୋଲା ଅଛି, ଯିଏ କି ଏଥିରେ ଯୋଗ ଦେଇପାରିବ।
ଆମେରିକା କହିଛି, ଇଣ୍ଟରନେଟ୍ର ଭବିଷ୍ୟତ ପାଇଁ ଘୋଷଣା ହେଉଛି ଡିଜିଟାଲ ସ୍ବାଧୀନତାର ବଢୁଥିବା ଧାରାର ପ୍ରତିକ୍ରିୟା, ୟୁକ୍ରେନ ଆକ୍ରମଣ ସମୟରେ ବିଶ୍ୱସନୀୟ ଖବର ସାଇଟ୍କୁ ଅବରୋଧ କରିବା ତଥା ପ୍ରଚାରକୁ ପ୍ରୋତ୍ସାହିତ କରିବା। ଏହି ଘୋଷଣା ଇଣ୍ଟରନେଟ୍ ଏବଂ ଡିଜିଟାଲ ଟେକ୍ନୋଲୋଜି ପାଇଁ ଏକ ସକାରାତ୍ମକ ଦୃଷ୍ଟିକୋଣକୁ ଆଗକୁ ନେବା ପାଇଁ ଅଂଶୀଦାରମାନଙ୍କ ମଧ୍ୟରେ ଏକ ରାଜନୈତିକ ପ୍ରତିବଦ୍ଧତାକୁ ପ୍ରତିପାଦିତ କରେ। ଏକବିଂଶ ଶତାବ୍ଦୀ ଦ୍ୱାରା ଉପସ୍ଥାପିତ ବିଶ୍ୱର ସୁଯୋଗ ଏବଂ ଆହ୍ବାନର ସମ୍ମୁଖୀନ ହୋଇ ଏହା ଇଣ୍ଟରନେଟର ପ୍ରତିଜ୍ଞାକୁ ପୁନଃ ଗୁରୁତ୍ୱ ଦେଇଥାଏ। ଏହା ଏକ ବିଶ୍ୱସ୍ତରୀୟ ଇଣ୍ଟରନେଟରେ ଅଂଶୀଦାରମାନଙ୍କ ପ୍ରତିବଦ୍ଧତାକୁ ମଧ୍ୟ ପ୍ରକାଶ କରେ। ଯାହା ପ୍ରକୃତରେ ଖୋଲା ଏବଂ ପ୍ରତିଯୋଗିତା, ଗୋପନୀୟତା ଏବଂ ମାନବିକ ଅଧିକାର ପ୍ରତି ସମ୍ମାନ ପ୍ରଦାନ କରିଥାଏ।
ଏହି ଘୋଷଣାକୁ ସମର୍ଥନ କରୁଥିବା ଦେଶଗୁଡ଼ିକର ତାଲିକା ମଧ୍ୟ ଆମେରିକା ପ୍ରକାଶ କରିଛି। ଏହି ଦେଶଗୁଡିକ ମଧ୍ୟରେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବେଲଜିୟମ, ବୁଲ୍ଗେରିଆ, କାନାଡା, ଡେନମାର୍କ, ୟୁରୋପୀୟ କମିଶନ, ଫ୍ରାନ୍ସ, ଜର୍ମାନୀ, ଗ୍ରୀସ, ହଙ୍ଗେରୀ, ଆୟର୍ଲାଣ୍ଡ, ଇସ୍ରାଏଲ, ଇଟାଲୀ, ଜାପାନ ଇତ୍ୟାଦି ଅନ୍ତର୍ଭୁକ୍ତ। ଭାରତ ବିଷୟରେ ଆମେରିକା ପ୍ରଶାସନର ଜଣେ ବରିଷ୍ଠ ଅଧିକାରୀ କହିଛନ୍ତି, ଭାରତ ଏହି ଘୋଷଣାନାମାରେ ବର୍ତ୍ତମାନ ପର୍ଯ୍ୟନ୍ତ ଅନ୍ତର୍ଭୂକ୍ତ ହୋଇନାହିଁ କିନ୍ତୁ ଭାରତ ଏହାର ଏକ ଅଂଶ ହେବାର ସମୟ ସମ୍ପୂର୍ଣ୍ଣ ହୋଇନାହିଁ। ଏବେ ବି ଭାରତ ପାଇଁ ଆମ ଦ୍ୱାର ଖୋଲା ଅଛି ବୋଲି ଆମେରିକା କହିଛି।
