ଭୁବନେଶ୍ୱର, ୨୬।୪ (ବ୍ୟୁରୋ): କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବିଏସ୍ଇ) ଦ୍ୱାରା ପରିଚାଳିତ ଦଶମ ଓ ଦ୍ୱାଦଶ ଟର୍ମ-୨ ପରୀକ୍ଷା ମଙ୍ଗଳବାରଠାରୁ ଆରମ୍ଭ ହେବ। ଦେଶରେ ପ୍ରାୟ ୩୫ ଲକ୍ଷ ପିଲା ପରୀକ୍ଷା ଦେବେ। ଦଶମ ଶ୍ରେଣୀରେ ୨୧ ଲକ୍ଷରୁ ଊର୍ଦ୍ଧ୍ୱ ପିଲା ପରୀକ୍ଷା ଦେବାକୁ ଥିବାବେଳେ ଏଥିପାଇଁ ୭,୪୦୬ ପରୀକ୍ଷା କେନ୍ଦ୍ର କରାଯାଇଛି। ସେହିପରି ଦ୍ୱାଦଶରେ ପ୍ରାୟ ୧୪ଲକ୍ଷରୁ ଊର୍ଦ୍ଧ୍ୱ ପିଲା ୬,୭୨୦ ପରୀକ୍ଷା କେନ୍ଦ୍ରରେ ପରୀକ୍ଷା ଦେବେ। ପରୀକ୍ଷା ପୂର୍ବାହ୍ନ ସାଢ଼େ ୧୦ଟାରୁ ସାଢ଼େ ୧୨ଟା ପର୍ଯ୍ୟନ୍ତ ଅନୁଷ୍ଠିତ ହେବ। ତେବେ ୧୦ଟା ପୂର୍ବରୁ ପିଲାମାନେ ପରୀକ୍ଷା କେନ୍ଦ୍ରରେ ପହଞ୍ଚତ୍ବା ଦରକାର। ଏହାପରେ ଆଉ କାହାକୁ ଅନୁମତି ମିଳିବ ନାହିଁ। ୧୦ଟା ୧୫ରେ ପିଲାଙ୍କୁ ପ୍ରଶ୍ନପତ୍ର ମିଳିବ ଓ ପଢ଼ିବାକୁ ୧୫ ମିନିଟ୍ ସମୟ ଦିଆଯିବ। ତେବେ କରୋନା ନିୟମକୁ ପାଳନ କରାଯାଇ ପରୀକ୍ଷା କରିବା ପାଇଁ ପୂର୍ବରୁ ସିବିଏସ୍ଇ ନିର୍ଦ୍ଦେଶ ଦେଇଥିଲା। ଏଥିପାଇଁ ସବୁ ସ୍କୁଲରେ ବ୍ୟାପକ ବ୍ୟବସ୍ଥା କରାଯାଇଛି। ଇନ୍ଫ୍ରାରେଡ୍ ଥର୍ମୋମିଟର ପାଇଁ ବୋର୍ଡ ପକ୍ଷରୁ ପ୍ରତି ସ୍କୁଲକୁ ୫ହଜାର ଲେଖାଏ ଏବଂ ପରିଚ୍ଛନ୍ନତା, ସାନିଟାଇଜର, ମାସ୍କ ପାଇଁ ଦିନକୁ ପ୍ରତି ପିଲାଙ୍କ ପିଛା ୫ଟଙ୍କା ଦିଆଯାଇଛି।
