ମୁମ୍ବାଇ,୨୦।୪: ଲକ୍ଷ୍ନୌ ସୁପର ଜିଆଣ୍ଟସ ଅଧିନାୟକ କେ.ଏଲ ରାହୁଲଙ୍କୁ ଡବଲ୍ ଝଟକା ଲାଗିଛି। ଆଇପିଏଲ ୨୦୨୨ର ଏକ ମ୍ୟାଚରେ ତାଙ୍କ ଦଳ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁକୁ ୧୮ ରନରେ ପରାସ୍ତ କରିଛି। ଏହା ପରେ ରାହୁଲଙ୍କୁ ଆଇପିଏଲ ଆଚରଣ ବିଧି ଉଲ୍ଲଂଘନ କରିଥିବାରୁ ମ୍ୟାଚ ଫି’ର ୨୦ ପ୍ରତିଶତ ଜରିମାନା କରାଯାଇଛି। ରାହୁଲ ଆଇପିଏଲର ଆଚରଣ ସଂହିତା ଲେଭଲ-୧ ଅଧୀନରେ ଥିବା ଭୁଲକୁ ସ୍ବୀକାର କରି ତାଙ୍କ ଉପରେ ଲଗାଯାଇଥିବା ଜରିମାନା ମଧ୍ୟ ଗ୍ରହଣ କରିଛନ୍ତି। କେଏଲ ରାହୁଲଙ୍କ ବ୍ୟତୀତ ଲକ୍ଷ୍ନୌ ସୁପର ଜିଆଣ୍ଟସ ଅଲରାଉଣ୍ଡର ମାର୍କସ ଷ୍ଟୋଇନିସଙ୍କୁ ମଧ୍ୟ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ବିପକ୍ଷ ମ୍ୟାଚରେ ଆଇପିଏଲ ଆଚରଣ ବିଧି ଉଲ୍ଲଂଘନ କରାଯାଇଥିବାରୁ ତାଗିଦ କରାଯାଇଛି।
ଆରସିବି ବିପକ୍ଷ ମ୍ୟାଚରେ ଜୋସ ହେଜଲଉଡଙ୍କ ଏକ ବଲରେ ଏକ ବଡ଼ ସଟ ଖେଳିବାବେଳେ ଷ୍ଟୋଇନିସ ବୋଲ୍ଡ ହୋଇଥିଲେ। ଏହା ପରେ ଷ୍ଟୋନିସ ଅମ୍ପାୟାରଙ୍କ ଉପରେ ରାଗୁଥିବାର ନଜର ଆସିଥିଲେ। ତାଙ୍କ ଶବ୍ଦ ଷ୍ଟମ୍ପ ମାଇକ୍ରୋଫୋନରେ ରେକର୍ଡ କରାଯାଇଥିଲା।
