ନୂଆଦିଲ୍ଲୀ,୧୭।୩ : ବହୁଚର୍ଚ୍ଚିତ ୩,୭୦୦ କୋଟି ଟଙ୍କାର ଅଗୁସ୍ତା ଓ୍ବେଷ୍ଟଲ୍ୟାଣ୍ଡ ଭିଭିଆଇପି ହେଲିକପ୍ଟର କିଣା ଦୁର୍ନୀତିର ତଦନ୍ତ କରୁଥିବା କେନ୍ଦ୍ରୀୟ ତଦନ୍ତକାରୀ ଟିମ୍ (ସିବିଆଇ) ବୁଧବାର ପୂର୍ବତନ ପ୍ରତିରକ୍ଷା ସଚିବ ତଥା ପୂର୍ବତନ ସିଏଜି ଶଶୀକାନ୍ତ ଶର୍ମା ଏବଂ ଭାରତୀୟ ବାୟୁସେନାର କେତେଜଣ ଅବସରପ୍ରାପ୍ତ ଅଧିକାରୀଙ୍କ ବିରୋଧରେ ଅତିରିକ୍ତ ଚାର୍ଜଶିଟ୍ ଦାଖଲ କରିଛି। ହେଲିକପ୍ଟର କିଣା ଚୁକ୍ତିନାମାରେ ଲାଞ୍ଚ କାରବାର ସହ ସମ୍ପୃକ୍ତ ଶର୍ମାଙ୍କ ବିରୋଧରେ ମୋକଦ୍ଦମା ଚଳାଇବାକୁ ସିବିଆଇ ସରକାରଙ୍କୁ ଅନୁମତି ମାଗିଥିଲା। ଅନୁମତି ମିଳିବା ପରେ ତାଙ୍କ ବିରୋଧରେ ଅତିରିକ୍ତ ଚାର୍ଜଶିଟ୍ ଦାଖଲ ହୋଇଛି। ଶର୍ମା ୨୦୧୧ରୁ ୨୦୧୩ ମଧ୍ୟରେ ପ୍ରତିରକ୍ଷା ସଚିବ ରହିଥିଲେ। ଏହା ପରେ ୨୦୧୩ରୁ ୨୦୧୭ ତାଙ୍କୁ କମ୍ପ୍ଟ୍ରୋଲର ଆଣ୍ଡ୍ ଅଡିଟର ଜେନେରାଲ (ସିଏଜି) ନିଯୁକ୍ତ କରାଯାଇଥିଲା। ଶର୍ମାଙ୍କ ବ୍ୟତୀତ ଚାର୍ଜଶିଟ୍ରେ ତତ୍କାଳୀନ ଏୟାର ଭାଇସ୍ ମାର୍ଶାଲ ଯଶବୀର ସିଂ ପାନେସାର, ଉପମୁଖ୍ୟ ଟେଷ୍ଟ ପାଇଲଟ୍ ଏସ୍.ଏ. କୁନ୍ତେ, ତତ୍କାଳୀନ ଓ୍ବିଙ୍ଗ୍ କମାଣ୍ଡର ଥୋମା ମାଥ୍ୟୁ ଏବଂ ଗ୍ରୁପ୍ କ୍ୟାପ୍ଟେନ୍ ଏନ୍. ସନ୍ତୋଷଙ୍କ ନାଁ ରହିଛି। କୁନ୍ତେ ଏବଂ ସନ୍ତୋଷ ଏୟାର କମୋଡର ଭାବେ ଅବସର ଗ୍ରହଣ କରିଥିଲେ।
ଅଗୁସ୍ତା ଓ୍ବେଷ୍ଟଲ୍ୟାଣ୍ଡ କମ୍ପାନୀରୁ ୧୨ଟି ଭିଭିଆଇପି ହେଲିକପ୍ଟର କ୍ରୟ ନିମନ୍ତେ ଡିଲ୍ ଚୂଡ଼ାନ୍ତ କରିବା ଲାଗି ବ୍ୟାପକ ଲାଞ୍ଚ କାରବାର ଅଭିଯୋଗ ହୋଇଥିଲା। ଏଥିରେ ପୂର୍ବତନ ପ୍ରତିରକ୍ଷା ସଚିବ ସମ୍ପୃକ୍ତ ଥିବା ଜଣାପଡ଼ିବା ପରେ ୨୦୨୦ରେ ସିବିଆଇ ତଦନ୍ତ ଆଗେଇବା ନେଇ ସମ୍ପୃକ୍ତ ମନ୍ତ୍ରଣାଳୟର ଅନୁମତି ଚାହିଁଥିଲା। ୨୦୧୬ରେ ସିବିଆଇର ଏକ ସ୍ବତନ୍ତ୍ର ଟିମ୍ ଏହି ଦୁର୍ନୀତି ମାମଲାର ତଦନ୍ତ ଦାୟିତ୍ୱ ନେବା ପରେ ୨୦୧୭ ସେପ୍ଟେମ୍ବର ୧ରେ ପୂର୍ବତନ ଏୟାର ଚିଫ୍ ମାର୍ଶାଲ ଏସ୍.ପି. ତ୍ୟାଗୀ ଓ ଅନ୍ୟ ୧୧ ଜଣଙ୍କ ବିରୋଧରେ ପ୍ରଥମ ଚାର୍ଜଶିଟ୍ ଦାଖଲ କରିଥିଲା।
