ମୁମ୍ବାଇ: ପର୍ସନାଲ ହେଉ ବା ପ୍ରଫେସନାଲ । କିଛି ନା କିଛି କାରଣ ପାଇଁ ଅନେକ ସମୟରେ ଚର୍ଚ୍ଚାରେ ରହିଥାଆନ୍ତି ମଲାଇକା ଆରୋରା । ନିକଟରେ ସେ ଏକ ସାକ୍ଷାତ୍କାରରେ ଏମିତି କିଛି କଥା କହିଛନ୍ତି ଯାହା ତାଙ୍କ ପ୍ରଶଂସକଙ୍କୁ ଚମକାଇ ଦେଇଛି । ମଲାଇକା ୧୯୯୮ରେ ବଲିଉଡ ଅଭିନେତା ଅରବାଜ ଖାଁଙ୍କୁ ବିବାହ କରିଥିଲେ । ହେଲେ ଦୀର୍ଘ ୧୯ ବର୍ଷର ସମ୍ପର୍କ ପରେ ୨୦୧୭ରେ ଏମାନେ ପରସ୍ପରଠାରୁ ଅଲଗା ହୋଇ ଯାଇଥିଲେ । ଏହି ୧୯ ବର୍ଷ ମଧ୍ୟରେ ଖୁବ୍ କଷ୍ଟ ପାଇଥିବା କହିଛନ୍ତି ମଲାଇକା । ସେ କହିଛନ୍ତି ଅରବାଜଙ୍କ ସହ ସେ ଥିବା ବେଳେ ଖୁବ୍ ଭୟ କରୁଥିଲେ ଏମିତିକି ସେ ନିଜକୁ ଦୁର୍ବଳ ବୋଲି ବି ଭାବୁଥିଲେ । ହେଲେ ଏମିତି ଏକ ସମୟ ଆସିଲା ଯେତେବେଳେ ସେ ଅରବାଜଙ୍କଠାରୁ ଅଲଗା ହେବାକୁ ଚିନ୍ତା କରିଥିଲେ । ହେଲେ ତାଙ୍କୁ ପଛକୁ ଟାଣୁଥିଲା ପୁଅ ଅରହାନ । ସେ ନିଜ ପୁଅ କଥା ଚିନ୍ତା କରି ଆହୁରି ଦୁର୍ବଳ ହୋଇ ଯାଉଥିବା ବେଳେ ଦିନେ କିନ୍ତୁ ସ୍ଥିର କରିଥିଲେ ସେ ସିଙ୍ଗଲ ମଦରର ଭୂମିକା ସମ୍ପାଦନ କରିବେ । ଅର୍ଥାତ୍ ଏକା ଏକା ପୁଅକୁ ପାଳିବେ । କାରଣ ସେ ଯେଉଁ ସମୟରେ ଅରବାଜଙ୍କଠାରୁ ଅଲଗା ହେବାକୁ ଚିନ୍ତା କରୁଥିଲେ ସେତେବେଳେ ପୁଅ ପାଇଁ ତାଙ୍କର ଆବଶ୍ୟକତା ଅଧିକ ଥିଲା । ଶେଷରେ ୨୦୧୭ରେ ସେ ଅରବାଜଙ୍କଠାରୁ ଅଲଗା ହୋଇ ପୁଅ ପ୍ରତି ଧ୍ୟାନ ଦେବା ସହ ଜଣେ ୱର୍ାକିଂ ସିଙ୍ଗଲ ମଦର ଭୂମିକାରେ ଅନ୍ୟମାନଙ୍କ ପାଇଁ ପ୍ରେରଣା ସାଜିବେ ବୋଲି ଲାଗି ପଡିଥିଲେ । ଆଉ ଏବେ ମଲାଇକା ଏକଦମ ଷ୍ଟ୍ରଙ୍ଗ ହୋଇ ଯାଇଛନ୍ତି । ୨୦୧୭ରେ ସେ ଅରବାଜଙ୍କଠାରୁ ଅଲଗା ହେବା ପରେ ୨୦୧୯ରେ ବଲିଉଡ ନାୟକ ଅର୍ଜୁନ କପୁରଙ୍କ ସହ ରିଲେସନଶିପରେ ରହିଥିବା ଆଲୋଚନା ହେଉଛି । ମଲାଇକା ଅର୍ଜୁନଙ୍କଠାରୁ ୧୨ ବର୍ଷ ସାନ ହୋଇଥିବା ବେଳେ ତାଙ୍କର ଏହି ରିଲେସନଶିପ ଖୁବ୍ ଚର୍ଚ୍ଚାରେ । ହେଲେ ଏଥିପ୍ରତି ଏହି ପ୍ରେମୀ ଯୁଗଳ ଆଦୌ ଧ୍ୟାନ ଦିଅନ୍ତି ନାହିଁ ।
