ଆନନ୍ଦପୁର,୯ା୩(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ପୌରପରିଷଦ ନିର୍ବାଚନ ପାଇଁ ବୁଧବାର ଯାଞ୍ଚ ପ୍ରକ୍ରିୟା ରହିଥିଲା। ଯାଞ୍ଚ ପ୍ରକ୍ରିୟା ପରେ ୧୪ ନଂ ଓ୍ବାର୍ଡର ଭାଜପା ପ୍ରାର୍ଥୀଙ୍କ ନାମାଙ୍କନରେ ତ୍ରୁଟିଥିବା ଏବଂ ତାଙ୍କ ପ୍ରାର୍ଥିପତ୍ରକୁ ନାକଚ କରିବା ଦାବିରେ ବିଜେଡି କର୍ମୀମାନେ ଉପଜିଲାପାଳଙ୍କ ନିକଟରେ ଅଭିଯୋଗ କରିବା ସହିତ କାର୍ଯ୍ୟାଳୟ ଘେରାଉ କରିଥିଲେ। ପ୍ରାର୍ଥିତ୍ୱରେ ରହିଥିବା ତ୍ରୁଟି ସମ୍ପର୍କରେ ଉପଜିଲ୍ଲାପାଳ ତଥା ନିର୍ବାଚନ ଅଧିକାରୀ ଗୋପୀନାଥ କୁଅଁରଙ୍କ ଦୃଷ୍ଟି ଆକର୍ଷଣ କରିବାରୁ ପାର୍ଥିପତ୍ର ଯାଞ୍ଚ ସମୟରେ ସମ୍ପୃକ୍ତ ୧୪ ନଂ ଓ୍ବାର୍ଡର ଭାଜପା ପ୍ରାର୍ଥୀଙ୍କ ନାମାଙ୍କନ ଠିକ୍ ଥିବା ଏବଂ ନିର୍ବାଚନ ଅଧିକାରୀ ଭାବେ ସେ ପ୍ରାର୍ଥିପତ୍ର ଉପରେ ସନ୍ତୋଷ ବ୍ୟକ୍ତି କରିଥିବାରୁ ଏହାକୁ କାଏମ କରାଯାଇଥିବା ଗଣମାଧ୍ୟମ ପ୍ରତିନିଧିଙ୍କ ନିକଟରେ ଉତ୍ତର ରଖିଥିଲେ।
ସୂଚନାଯୋଗ୍ୟ, ୧୪ ନଂ ଓ୍ବାର୍ଡର ଜ୍ୟୋତ୍ସ୍ନାରାଣୀ ଖୁଣ୍ଟିଆ, ଯାହାଙ୍କର ୨୯ ନଂ ବୁଥ୍ ଭୋଟର କ୍ରମିକ ସଂଖ୍ୟା ୮୧୯ ରହିଛି। ସେ ଭାଜପା ପକ୍ଷରୁ କାଉନସିଲ ପ୍ରାର୍ଥୀ ଭାବେ ନାମାଙ୍କନ ଦାଖଲ କରିଥିଲେ। ନାମାଙ୍କନ ଦାଖଲ ସମୟରେ ଭାଜପା ପକ୍ଷରୁ ମିଳିଥିବା ଦଳୀୟ ଟିକେଟ୍ ମଧ୍ୟ ଦାଖଲ କରିଥିଲେ। ସେ ଦାଖଲ କରିଥିବା ଦଳୀୟ ଟିକେଟରେ ତାଙ୍କ ନାମ ଜ୍ୟେତ୍ସ୍ନାରାଣୀ ସାହୁ ରହିଛି। ଯାହାକୁ ନେଇ ୧୪ ନଂ ଓ୍ବାର୍ଡର ବିଜେଡି କର୍ମୀମାନେ ବିରୋଧ କରିଥିଲେ। ଏଭଳି ତ୍ରୁଟିପୁର୍ଣ୍ଣ ପ୍ରାର୍ଥିପତ୍ରକୁ ନାକଚ କରିବା ଦାବିରେ ବିଜେଡି କର୍ମୀ ରଞ୍ଜନ କୁମାର ସାହୁ, ମନ୍ମଥ କୁମାର ସାହୁ, ସିଦ୍ଧାର୍ଥ ସାହୁ, ନିରଞ୍ଜନ ସାହୁ, ରଞ୍ଜନ କୁମାର ସାହୁ ପ୍ରମୁଖ ଉପଜିଲାପାଳଙ୍କ ନିକଟରେ ଅଭିଯୋଗ ପତ୍ର ଦାଖଲ କରିଛନ୍ତି।
