ନୂଆଦିଲ୍ଲୀ,୧୪ା୨: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ପ୍ରତିଶ୍ରୁତି ଦେଇଛନ୍ତି ଯେ ଯଦି ରାଜ୍ୟରେ ପୁନର୍ବାର ଭାଜପା କ୍ଷମତାକୁ ଆସେ ତେବେ କର୍ନାଟକର ହିଜାବକୁ ନେଇ ବିବାଦ ମଧ୍ୟରେ ସମାନ ନାଗରିକ ସଂହିତା (ୟୁନିଫର୍ମ ସିଭିଲ କୋଡ) କାର୍ଯ୍ୟକାରୀ ହେବ।
ସମାନ ନାଗରିକ ସଂହିତା ସବୁବେଳେ ଭାଜପାର ଏଜେଣ୍ଡାରେ ସାମିଲ ହୋଇଛି। ଏହା ଦଳର ନିର୍ବାଚନ ପ୍ରତିଶ୍ରୁତିର ଏକ ଅଂଶ ହୋଇଛି। ହିଜାବ ବିବାଦ ମାଧ୍ୟମରେ ସମାନ ନାଗରିକ ସଂହିତା ଲାଗୁ କରିବା ପାଇଁ ଭାଜପା ଯୋଜନା କରୁଥିବା ନେଇ ଏବେ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି। ଧାମିଙ୍କ ମନ୍ତବ୍ୟ ପରେ ଏନେଇ ଆଲୋଚନା ଅଧିକ ହେଉଛି।
୧୯୯୮ ଲୋକସଭା ନିର୍ବାଚନରେ ଅଟଳ ବିହାରୀ ବାଜପେୟୀଙ୍କ ନେତୃତ୍ୱରେ ଭାଜପା ୩ ଟି ପ୍ରମୁଖ ପ୍ରତିଶ୍ରୁତି ଉପରେ ଭୋଟ ମାଗିଥିଲା ସେଗୁଡ଼ିକ ହେଉଛି ଧାରା ୩୭୦ ରଦ୍ଦ, ଅଯୋଧ୍ୟାରେ ବିବାଦୀୟ ସ୍ଥାନରେ ରାମ ମନ୍ଦିର ନିର୍ମାଣ ଏବଂ ସମାନ ନାଗରିକ ସଂହିତାର କାର୍ଯ୍ୟକାରିତା ବାଜପେୟୀଙ୍କ ନେତୃତ୍ୱରେ ଭାଜପା ୧୩ ଦଳର ଏକ ମିଳିତ ମଞ୍ଚ ଗଠନ କରି ସରକାର ଗଠନ କଲା। ମାତ୍ର ଭାଜପା ନିଜ ଲକ୍ଷ୍ୟ ସ୍ଥଳରେ ପହଞ୍ଚି ପାରି ନ ଥିଲା।
୨୦୧୪ରେ ନରେନ୍ଦ୍ର ମୋଦିଙ୍କ ନେତୃତ୍ୱରେ ଭାଜପା ସମ୍ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିଥିଲା। ଏହା ପରେ ମଧ୍ୟ ଦଳ ପ୍ରଥମ କାର୍ଯ୍ୟକାଳରେ ଏହି ପ୍ରସଙ୍ଗରେ କୌଣସି ପଦକ୍ଷେପ ଗ୍ରହଣ କରି ହୋଇ ନ ଥିଲା।
୨୦୧୯ରେ କ୍ରମାଗତ ଦ୍ୱିତୀୟ ଥର ପାଇଁ ଭାଜପା ସମ୍ପୂର୍ଣ୍ଣ ସଂଖ୍ୟାଗରିଷ୍ଠତା ପାଇବା ପରେ ଦ୍ୱିତୀୟ କାର୍ଯ୍ୟକାଳର ଆରମ୍ଭରେ, ଅଗଷ୍ଟ ୨୦୧୯ରେ, ଧାରା ୩୭୦ ଅନୁଯାୟୀ ଜମ୍ମୁ କଶ୍ମୀରକୁ ଦିଆଯାଇଥିବା ସ୍ବତନ୍ତ୍ର ମାନ୍ୟତା ରଦ୍ଦ କରା ଯାଇଛି। ଅଯୋଧ୍ୟା ବିବାଦରେ ମନ୍ଦିର ସପକ୍ଷରେ କୋର୍ଟଙ୍କ ନିଷ୍ପତ୍ତି ଭାଜପାର ଆଉ ଏକ ବଡ ନିର୍ବାଚନ ପ୍ରତିଶ୍ରୁତି ମଧ୍ୟ ପୂରଣ ହୋଇଛି।
ବର୍ତ୍ତମାନ ଭାଜପାର ମୁଖ୍ୟ ଏଜେଣ୍ଡା ହେଉଛି ସମାନ ନାଗରିକ ସଂହିତା, ଯାହା ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇନାହିଁ। ୟୁନିଫର୍ମ ସିଭିଲ କୋଡକୁ ନେଇ ବିବାଦ ୭୦ ବର୍ଷରୁ ଅଧିକ ପୁରୁଣା। ପାର୍ଲାମେଣ୍ଟରେ ଏହା ଉପରେ ଦୀର୍ଘ ବିତର୍କ ମଧ୍ୟ ହୋଇଥିଲା।
ସମ୍ବିଧାନ ଡ୍ରାଫ୍ଟର ଧାରା ୩୫, ଯାହା ସମ୍ବିଧାନ ଗ୍ରହଣ ହେବା ପରେ ଧାରା ୪୪ ରେ ପରିଣତ ହୋଇଛି। ଏଥିରେ ସମଗ୍ର ଭାରତରେ ନାଗରିକଙ୍କ ପାଇଁ ଏକ ୟୁନିଫର୍ମ ସିଭିଲ କୋଡ ସୁରକ୍ଷିତ କରିବାକୁ ରାଜ୍ୟ ଚେଷ୍ଟା କରିବା ଉପରେ ଗୁରୁତ୍ୱାରୋପ କରାଯାଇଛି।
ଏବେ ଭାଜପା ହିଜାବ ବିବାଦ ମାଧ୍ୟମରେ ସମାନ ନାଗରିକ ସଂହିତା ଲାଗୁ ଉପରେ ଧ୍ୟାନ କେନ୍ଦ୍ରୀତ କରିଥିବା ଚର୍ଚ୍ଚା ହେଉଛି।
