ନୂଆଦିଲ୍ଲୀ,୧୫।୧: ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ଏବି ଡି ଭିଲିୟର୍ସ କ୍ରିକେଟର ସମସ୍ତ ଫର୍ମାଟରୁ ସନ୍ୟାସ ନେଇଛନ୍ତି। ଏଥିସହ ସେ ଆଇପିଏଲ୍ ଖେଳିବେ ନାହିଁ ବୋଲି ମଧ୍ୟ ସ୍ପଷ୍ଟ କରିସାରିଛନ୍ତି। ହେଲେ ଏବେ ଫେବୃୟାରୀରେ ହେବାକୁ ଥିବା ମେଗା ନିଲାମ ପୂର୍ବରୁ କାହିଁକି ସେ ତାଙ୍କ ନାମ ପ୍ରତ୍ୟାହାର କରିଥିଲେ ସେ ନେଇ ଖୁଲାସା କରିଛନ୍ତି। ସେ ଆଇପିଏଲ୍ ଖେଳିବା ଜାରି ରଖିଥାନ୍ତେ। ହେଲେ କୋଭିଡ୍ ପରିସ୍ଥିତିକୁ ନେଇ ସେ ଏହି ଖେଳକୁ ଉପଭୋଗ କରିପାରୁ ନ ଥିଲେ। ଏଣୁ ଏଭଳି ନିଷ୍ପତ୍ତି ନେଇଥିବା କହିଛନ୍ତି।
ଏକ ସାକ୍ଷାତକାରରେ ଡି ଭିଲିୟର୍ସ କହିଛନ୍ତି, କ୍ରିକେଟ୍କୁ ଆଉ କିଛି ସମୟ ଖେଳି ପାରିଥାନ୍ତି, କିନ୍ତୁ ତାକୁ ଉପଭୋଗ କରିପାରୁ ନ ଥିଲି। ମୋତେ ଯାତ୍ରା କରିବାରେ କଷ୍ଟ ଅନୁଭବ ହେଉଥିଲା। ଆଇପିଏଲ୍ ପାଇଁ ଦୁଇରୁ ଅଢ଼େଇ ମାସ ଯାଏ ବାୟୋ ବବଲ୍ରେ ରହିବାକୁ ପଡ଼ିଥିଲା। ଖେଳାଳି ଭାବେ ସବୁକିଛି କଷ୍ଟସାଧ୍ୟ ହେଉଥିବା ବେଳେ ଖେଳକୁ ଉପଭୋଗ କରୁ ନ ଥିଲି। ଅନେକ ସମୟରେ ଦଳ ଲାଗି ରନ୍ ସ୍କୋର କରିବାରେ ସକ୍ଷମ ହେଉ ନ ଥିଲି। ଦଳର ଆବଶ୍ୟକତା ଅନୁଯାୟୀ ପ୍ରଦର୍ଶନ କରୁ ନ ଥିଲି। ସେତେବେଳେ ମୋତେ ଜୋତା ପିନ୍ଧିବାର ନୁହେଁ ବରଂ ଟାଙ୍ଗିବାର ସମୟ ଆସିଲା ବୋଲି ମନକୁ ଆସିଥିଲା ବୋଲି ସେ କହିଛନ୍ତି।
