ମୁମ୍ବାଇ: ଦେଶରେ ବଢି ଚାଲିଛି କରୋନା ମହାମାରୀ ସହ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା । ଏହାକୁ ଦୃଷ୍ଟିରେ ରଖି ରାଜ୍ୟ ସରକାରମାନେ ବିଭିନ୍ନ ପ୍ରକାର କଟକଣା ଲାଗୁ କରିଛନ୍ତି । ଏବେ ସିମେନା ହଲ ନ ଖୋଲିବା ଅବା ୫୦ ପ୍ରତିଶତ ଦର୍ଶକରେ ଖୋଲିବାକୁ ଅନୁମତି ଦିଆଯାଇଛି । ଏପରି ସ୍ଥଳେ ହଲରେ ରିଲିଜ୍ ହେବାକୁ ଥିବା ଫିଲ୍ମ ଗୁଡିକ ବହୁ କ୍ଷତି ସହିବେ ବୋଲି ଅନୁମାନ କରାଯାଇଛି । ଦୀର୍ଘ ପ୍ରାୟ ଦେଢ ବର୍ଷ ହେବ ମନୋରଞ୍ଜନ ଦୁନିଆରେ ଗ୍ରହଣ ଲଗାଇ ଦେଇଥିଲା କରୋନା ମହାମାରୀ । ଏବେ ସ୍ଥିତି ସାମାନ୍ୟ ସୁଧୁରିବାରୁ ସମସ୍ତେ ଧିରେ ଧିରେ ଅଣ୍ଟା ଭିଡିବା ଆରମ୍ଭ କରିଥିଲେ । ଆଉ ଠିକ୍ ଏତିକି ବେଳେ ପୁଣିଥେରେ ପାହାର ଦେଇଛି କରୋନା ସହ ଏହାର ନୂଆ ଭାରିଏଣ୍ଟ ଓମିକ୍ରନ୍ । ତେବେ ନିର୍ଦ୍ଦେଶକ ଏସ୍ ଏସ୍ ରାଜମୌଳିଙ୍କ ବହୁ ପ୍ରତିକ୍ଷିତ ଫିଲ୍ମ ‘ଆର୍ଆର୍ଆର୍’ ଇତିମଧ୍ୟରେ ୧୦୦ କୋଟି କ୍ଷତି ସହିଥିବା ଅନୁମାନ କରାଯାଉଛି । ଫିଲ୍ମ ରିଲିଜ୍ ହେବାକୁ ଯେତେ ବିଳମ୍ବ ହେବ ଏପଟେ କ୍ଷତି ସେହି ପରିମାଣରେ ହେବ ବୋଲି କୁହାଯାଉଛି । ସୂଚନାଯୋଗ୍ୟ, ଫିଲ୍ମ ଡିଷ୍ଟ୍ରିବ୍ୟୁଶନ ଓ ଅନ୍ୟ ରାଇଟ୍ସ ପାଇଁ ୮୯୦ କୋଟି ଟଙ୍କା ଖର୍ଚ୍ଚ ହୋଇସାରିଲାଣି । ଫିଲ୍ମଟି ୭ ଜାନୁୟାରୀ ଅର୍ଥାତ୍ ଶୁକ୍ରବାର ବଡ ପରଦାରେ ରିଲିଜ୍ ହୋଇ ଥାଆନ୍ତା । କନ୍ତୁ କରୋନା ମହାମାରୀ ସବୁକୁ ବିଗାଡି ଦେଲା । ଫିଲ୍ମର ନିର୍ମାତା କହିଛନ୍ତି ଫିଲ୍ମର ପ୍ରମୋଶନରେ ଏବେସୁଦ୍ଧା ପାଖାପାଖି ୧୫-୧୬ କୋଟିଟଙ୍କା ଖର୍ଚ୍ଚ ହୋଇ ସାରିଲାଣି । ଯେଉଁମାନେ ଆଗରୁ ବୁକିଂ କରୁଥିଲେ ଏବେ ସେମାନଙ୍କର ଟଙ୍କା ଫେରାଇ ଦିଆଯାଇଛି । ଏବେ ଫିଲ୍ମଟି ନିର୍ଦ୍ଧାରିର ସମୟରେ ରିଲିଜ୍ ନ ହେବା ନିର୍ମାତାଙ୍କ ପାଇଁ କୋଟି କୋଟି ଟଙ୍କାର କ୍ଷତି ବୋଲି କୁହାଯାଉଛି । ସୂଚନାଯୋଗ୍ୟ, ଫିଲ୍ମ ‘ଆର୍ଆର୍ଆର୍’ ଜାନୁୟାରୀ ୭, ୨୦୨୨ରେ ରିଲିଜ୍ ହେବାର ଥିଲା । ହେଲେ କରୋନା ମହାମାରୀ ଯୋଗୁ ଏବେ ଏହାର ରିଲିଜ୍ ତାରିଖକୁ ଘୁଞ୍ଚାଇ ଦିଆଯାଇଛି । ପୁଣି ଯେବେ ଏହା ରିଲିଜ୍ କରାଯିବ ପୁଣିଥରେ ପ୍ରମୋଶନରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି ଅନୁମାନ କରାଯାଉଛି ।
