ଚଣ୍ଡିଖୋଲ,୧୫ା୧୨(ଡି.ଏନ.ଏ.): ବଡ଼ଚଣା ବ୍ଲକ ଅଧୀନ ବାଲିପଡ଼ିଆ ପଞ୍ଚାୟତରେ ନିର୍ମିତ ପାନୀୟ ଜଳ ଯୋଗାଣ ପ୍ରକଳ୍ପଟି କାମରେ ଲାଗୁନି। ୨୦୧୮-୧୯ରେ ୧ କୋଟି ୩୦ ଲକ୍ଷ ଟଙ୍କା ବ୍ୟୟ କରାଯାଇ ଉକ୍ତ ପ୍ରକଳ୍ପ ନିର୍ମାଣ କରାଯାଇଥିଲା। ହେଲେ ପ୍ରକଳ୍ପଟି ତା’ର ମୂଳଲକ୍ଷ୍ୟରୁ ଦୂରେଇ ଯାଇଛି। ଏଠାରୁ ନିର୍ଗତ ପାଣି କ୍ଷାର ଯୁକ୍ତ ଓ କିଛି ସମୟ ରହିଲେ ପାଣିରେ ହଳଦୀ ରଙ୍ଗର ଆସ୍ତରଣ ଜମିଯାଉଛି। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବିଭାଗୀୟ ନିୟମ ଅନୁସାରେ ପାଣିର ମାନ ଠିକ୍ ନ ରହିଲେ ପ୍ରକଳ୍ପ ନିର୍ମାଣ ହେବା କଥା ନୁହେଁ। ମାତ୍ର ଏଠାରେ ପାଣିର ମାନ ଖରାପ ଥିଲେ ମଧ୍ୟ କାହା ସ୍ବାର୍ଥରେ ପ୍ରକଳ୍ପ ନିର୍ମାଣ କରାଗଲା ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ଏହି ପଞ୍ଚାୟତରେ ଜଳଜୀବନ ମିଶନ ଯୋଜନାରେ ଜନସାଧାରଣଙ୍କୁ ଶୁଦ୍ଧ ପାନୀୟ ଜଳ ଯୋଗାଣ ପାଇଁ ଉକ୍ତ ପ୍ରକଳ୍ପ ନିର୍ମାଣ କରାଯାଇଥିଲା। ଏଥିରେ ଏକ ପାଣି ଟାଙ୍କି ନିର୍ମାଣ ସହ ଗ୍ରାମର ପ୍ରତ୍ୟେକ ଘରକୁ ପାଣି ଯୋଗାଇବା ନିମନ୍ତେ ଟ୍ୟାପ ବସାଯାଇଥିଲା। ଏଥିନିମନ୍ତେ ଦୁଇଟି ସ୍ଥାନରେ ବୋରୱେଲ ଖନନ କରାଯାଇଥିଲା। ତେବେ ଠିକା ସଂସ୍ଥା ପକ୍ଷରୁ ପାଇପ୍ ବିଛା ସମୟରେ ଗ୍ରାମର ରାସ୍ତା ବିଭିନ୍ନ ସ୍ଥାନରେ ଖୋଳାଯାଇଥିଲେ ମଧ୍ୟ ଆଜି ଯାଏ ତାହା ମରାମତି କରାଯାଇନାହଁି। ବିଭିନ୍ନ ଗୃହ ନିକଟରେ ବସାଯାଇଥିବା ଟ୍ୟାପ୍ଗୁଡ଼ିକ ଅତ୍ୟନ୍ତ ନିମ୍ନମାନର ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ନିୟମ ଅନୁଯାୟୀ ଯେପରି ଭାବେ ପାଇପ୍ ବିଛା ଯିବା କଥା ତାହା କରାଯାଇନାହିଁ। ଅନ୍ୟପକ୍ଷରେ ବିଛା ଯାଇଥିବା ପାଇପ୍ ସବୁ ସ୍ବୀକୃତିପ୍ରାପ୍ତ କମ୍ପାନୀର ନୁହେଁ ବୋଲି ମଧ୍ୟ ଅଭିଯୋଗ ହୋଇଛି। ତେବେ ସବୁଠାରୁ ବଡ଼କଥା ହେଲେ ପ୍ରକଳ୍ପ ନିକଟରେ ଖୋଳାଯାଇଥିବା ବୋରୱେଲରୁ ବ୍ୟବହାର ଅନୁପଯୋଗୀ ପାଣି ବାହାରୁ ଥିଲେ ମଧ୍ୟ ଏବିଷୟରେ ଆଜି ଯାଏ ପଦକ୍ଷେପ ନିଆଯାଇନାହଁି। ଏନେଇ ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ କୁଳମଣି ବେହେରା କହିଛନ୍ତି, ପ୍ରକଳ୍ପ ନିକଟରେ ଥିବା ଦ୍ୱିତୀୟ ବୋରୱେଲରୁ ଜଳ ଯୋଗାଣ ପାଇଁ ପଦକ୍ଷେପ ନିଆଯିବ। ଯଦି କୌଣସି ବ୍ୟତିକ୍ରମ ଦେଖାଦିଏ ତା’ହେଲେ ମେଗା ପାନୀୟ ଜଳ ଯୋଗାଣ ଅଧୀନରେ ଏହି ପ୍ରକଳ୍ପ ଚାଲୁ କରାଯିବ।
