ଢେଙ୍କାନାଳ ଅଫିସ,୩।୧୨
ଢେଙ୍କାନାଳ ସହର କୁଞ୍ଜକାନ୍ତ ଅଞ୍ଚଳରେ ଥିବା ସାଇକୃପା ଆବାସିକ ମହାବିଦ୍ୟାଳୟର ଆଉ ୧୯ ଛାତ୍ରୀଛାତ୍ର ଗୁରୁବାର କରୋନା ଆକ୍ରାନ୍ତ ହୋଇଥିବା ଜଣାପଡିଛି। ଏହାକୁ ମିଶାଇ ଗତ ୩ଦିନ ମଧ୍ୟରେ ମୋଟ୍ ୫୬ ଜଣ କୋଭିଡ୍ ପଜିଟିଭ୍ ଚିହ୍ନଟ ହୋଇଥିବାରୁ ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ ଓ କର୍ମଚାରୀମାନେ କଲେଜ ସହ ହେଷ୍ଟଲକୁ ସିଲ୍ କରିଦେଇଛନ୍ତି। ଏଥିସହ ବିପର୍ଯ୍ୟୟ ପରିଚାଳନା, କୋଭିଡ୍ ନିୟମ ଉଲ୍ଲଂଘନ ଏବଂ ଅବହେଳା ପ୍ରଦର୍ଶନ ଅଭିଯୋଗରେ କଲେଜ ପରିଚାଳନା ପରିଷଦର ଚେୟାରମ୍ୟାନ ଅନ୍ନଦା କୁମାର ମହାନ୍ତିଙ୍କ ନାମରେ ପୌର ପରିଷଦ ପକ୍ଷରୁ ଟାଉନ ଥାନାରେ ଏକ ମାମଲା ଦାଏର କରାଯାଇଛି। ଉକ୍ତ ଅଞ୍ଚଳକୁ ୧୦ ତାରିଖ ପର୍ଯ୍ୟନ୍ତ ମାଇକ୍ରୋ କଣ୍ଟେନମେଣ୍ଟ ଜୋନ୍ ଭାବେ ଜିଲାପାଳ ଘୋଷଣା କରିଛନ୍ତି। ହେଲେ ପୌରସଂସ୍ଥା ପକ୍ଷରୁ ଏ ନେଇ କୌଣସି ବ୍ୟବସ୍ଥା କରାଯାଇ ନ ଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି।
ପ୍ରକାଶ ଯେ, ୩ ଦିନ ତଳେ ଆବାସିକ ମହାବିଦ୍ୟାଳୟର ୪ ଛାତ୍ରୀଛାତ୍ର କରୋନାରେ ଆକ୍ରାନ୍ତ ହୋଇଥିବା ଜଣାପଡିବା ପରେ ହଷ୍ଟେଲରେ ରହୁଥିବା ୨୬୦ ଜଣଙ୍କ ସ୍ବାବ୍ ଟେଷ୍ଟ କରାଯାଇଥିଲା। ସେମାନଙ୍କ ମଧ୍ୟରୁ ୨୧୦ ଜଣଙ୍କ ରିପୋର୍ଟ ବୁଧବାର ସନ୍ଧ୍ୟାରେ ଆସିଥିଲା। ୩୩ଜଣ କରୋନା ଆକ୍ରାନ୍ତ ବୋଲି ଜଣାପଡ଼ିବାରୁ କର୍ତ୍ତୃପକ୍ଷ କଲେଜକୁ ଛୁଟି ଘୋଷଣା କରିଥିଲେ। ତେଣୁ ଗୁରୁବାର ସକାଳୁ ପିଲାମାନେ ହଷ୍ଟେଲ ଛାଡ଼ିବା ଆରମ୍ଭ କରିଦେଇଥିଲେ। ଏହାପରେ ପୌରସଂସ୍ଥା ପକ୍ଷରୁ କଲେଜ ଏବଂ ହଷ୍ଟେଲକୁ ସିଲ୍ କରାଯିବା ସହ ବାକିଥିବା ୫୦ ଛାତ୍ରୀଛାତ୍ରଙ୍କ ସ୍ବାବ୍ ପରୀକ୍ଷା କରାଯାଇଥିଲା। ରିପୋର୍ଟ ଆସିବା ପରେ ସେମାନଙ୍କ ମଧ୍ୟରୁ ୧୯ଜଣ ସଂକ୍ରମିତ ହୋଇଥିବା ଜଣାପଡିଛି। ଆବାସିକ ମହାବିଦ୍ୟାଳୟର ଏତେ ସଂଖ୍ୟକ ଛାତ୍ରୀଛାତ୍ର ହଠାତ୍ କରୋନାରେ ଆକ୍ରାନ୍ତ ହେବା ଘଟଣାକୁ ନେଇ ନିକଟରେ ଥିବା ଅନ୍ୟ କେତେକ ଘରୋଇ ଶିକ୍ଷାନୁଷ୍ଠାନ, ଅଭିଭାବକ ଏବଂ ଅଞ୍ଚଳବାସୀଙ୍କ ମଧ୍ୟରେ ଆତଙ୍କ ଖେଳିଯାଇଛି। ଅନ୍ୟପଟେ କରୋନା ଆକ୍ରାନ୍ତଙ୍କ ସଂଖ୍ୟା ସୂଚନାକୁ ନେଇ ପୌରସଂସ୍ଥା ଓ ସ୍ବାସ୍ଥ୍ୟ ବିଭାଗ ମଧ୍ୟରେ ତାଳମେଳ ରହୁନାହିଁ। ପୌରସଂସ୍ଥା ପକ୍ଷରୁ ୫୬ ଆକ୍ରାନ୍ତ କୁହାଯାଉଥିବାବେଳେ ସ୍ବାସ୍ଥ୍ୟ ବିଭାଗ ୫୭ ବୋଲି କହୁଛି। କଲେଜ ପକ୍ଷରୁ ମଧ୍ୟ ପୌରସଂସ୍ଥାକୁ ସହଯୋଗ କରାଯାଉ ନାହିଁ। ଏ ସମ୍ପର୍କରେ ଜିଲାପାଳ ସରୋଜ କୁମାର ସେଠୀ କହିଛନ୍ତି, କୋଭିଡ୍ ନିୟମ ଠିକ୍ ଭାବେ ଅନୁପାଳନ କରି ନ ଥିବାରୁ କଲେଜ ପରିଚାଳନା ପରିଷଦ ଚେୟାରମ୍ୟାନ ଓ ପ୍ରିନ୍ସିପାଲଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଉତ୍ତର ସନ୍ତୋଷଜନକ ନ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆକ୍ରାନ୍ତମାନଙ୍କ ଘରକୁ ଯାଇ କଣ୍ଟାକ୍ଟ ଟ୍ରେସିଂ କରିବା ସହିତ ସେମାନଙ୍କ ସମ୍ପର୍କରେ ସବିଶେଷ ବିବରଣୀ ସଂଗ୍ରହ ପାଇଁ ସ୍ବାସ୍ଥ୍ୟ ବିଭାଗକୁ ନିର୍ଦ୍ଦେଶ ଦିଆଯାଇଛି। ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ କହିଛନ୍ତି, ଗାଇଡ ଲାଇନ ଉଲ୍ଲଂଘନ ଏବଂ ଅବହେଳା ପ୍ରଦର୍ଶନ କରାଯାଇଥିବାରୁ ସାଇକୃପା ଆବାସିକ ମହାବିଦ୍ୟାଳୟ ପରିଚାଳନା ପରିଷଦ ଅଧ୍ୟକ୍ଷଙ୍କ ନାମରେ ଟାଉନ ଥାନାରେ ମାମଲା ଦାଏର କରାଯାଇଛି। ସଦର ଏସ୍ଡିପିଓ ବିକାଶ ବେଉରା କହିଛନ୍ତି, ପୌର ସଂସ୍ଥା କର୍ତ୍ତୃପକ୍ଷଙ୍କଠାରୁ ଅଭିଯୋଗ ପାଇଛୁ। ଥାନା ଅଧିକାରୀ ଅନୁପସ୍ଥିତ ଅଛନ୍ତି। ଖୁବ୍ଶୀଘ୍ର ମାମଲା ରୁଜୁ କରାଯିବ।
