ନୂଆଦିଲ୍ଲୀ,୮।୭: ଜଣଗଣନା ପାଇଁ ଏବେ କାଗଜ ଫର୍ମ ନୁହେଁ ମୋବାଇଲ ଆପ୍ର ହେବ ବ୍ୟବହାର। ପୂର୍ବରୁ କାଗଜ ଫର୍ମରେ ସୂଚନା ଏକତ୍ରିତ କରି ଏହାର ବିଶ୍ଳେଷଣ କରିବା ବହୁ କଷ୍ଟକର ହେବା ସହ ଏହାର ପ୍ରକ୍ରିୟା ମଧ୍ୟ ବହୁ ଲମ୍ବା ଧରି ଚାଲୁଥିଲା। ଫଳରେ ଏହାକୁ ସହଜ ଓ ସମୟସାପେକ୍ଷ କରିବା ପାଇଁ ସରକାର ଏଭଳି ନିଷ୍ପତ୍ତି ନେଇଛନ୍ତି। ୨୦୨୧ରେ ପ୍ରାୟ ୭ ବିଲିୟନରୁ ଅଧିକ ନାଗରିକଙ୍କ ପେପରଲେସ୍ ଜନଗଣନା ପାଇଁ ଆଧୁନିକ ମୋବାଇଲ ଆପ୍ ତିଆରି କରାଯାଇଛି। ଆସନ୍ତା ବର୍ଷ ଏପ୍ରିଲରୁ ଜଣଗଣନା ଆରମ୍ଭ ହେବାକୁ ଥିବା ବେଳେ ଚଳିତ ଅଗଷ୍ଟରୁ ଏହି ଆପ୍ର ପରୀକ୍ଷାମୂଳକ ଭାବେ ବ୍ୟବହାର କରାଯିବ। ସେହିପରି ଜଣଗଣନା କାର୍ଯ୍ୟ ପାଇଁ ଚୟନ ହୋଇଥିବା ଶିକ୍ଷକଙ୍କୁ ଏନେଇ ପ୍ରଶିକ୍ଷଣ ଦିଆଯିବ। ଶିକ୍ଷକଙ୍କ ମୋବାଇଲ୍ରେ ଏହି ଆପ୍କୁ ଇନ୍ଷ୍ଟଲ୍ କରାଯିବା ପରେ ଡାଟା ସଂଗ୍ରହ ପାଇଁ ସୂଚନା ଦିଆଯିବ। ହେଲେ ଏହାର ବିକଳ୍ପରେ କାଗଜ ଫର୍ମ ମଧ୍ୟ ରହିବ। ତେବେ ଅଧିକ ସଂଖ୍ୟାରେ ଲୋକେ କାଗଜ ଫର୍ମ ବଦଳରେ ମୋବାଇଲକୁ ବ୍ୟବହାର କରିବେ ବୋଲି ସରକାର ଆଶା ପୋଷଣ କରିଛନ୍ତି। କାରଣ ଏହା କେବଳ ସହଜ ନୁହେଁ ବରଂ କମ୍ ସମୟରେ ଅଧିକ ଡାଟା ଏକତ୍ରିତ କରାଯାଇପାରିବ। ତେବେ ଏହି କାର୍ଯ୍ୟ ପାଇଁ ୨୭ ଲକ୍ଷ ଲୋକଙ୍କୁ ନିୟୋଜିତ କରାଯିବାକୁ ଥିବା ବେଳେ ଏହା ଆରମ୍ଭ ହେବା ପୂର୍ବରୁ ସେମାନଙ୍କୁ ତାଲିମ୍ ଦିଆଯିବ ବୋଲି ସୂଚନା ମିଳିଛି। ୨୦୨୧ ଜଣଗଣନାରେ ଏହି ଆପ୍ ଦ୍ୱାରା ପ୍ରତ୍ୟେକ ନାଗରିକଙ୍କ ବିଷୟରେ ୬୦ରୁ ଅଧିକ ସୂଚନା ସଂଗ୍ରହ କରାଯାଇପାରିବ। ଘରେ ଉପଲବ୍ଧ ସୁବିଧା, ପାନୀୟ ଜଳ, ଯାନବାହନ, ବିଜୁଳି, ଧର୍ମ, ବ୍ୟବସାୟ, ଲିଙ୍ଗ, ସାକ୍ଷରତା, ମାତୃଭାଷା ଆଦି ଏହି ସୂଚନାରେ ସାମିଲ ରହିବ। ସେହିପରି ଏନ୍ପିଆର ପାଇଁ ଏହି ଆପ୍ରେ ଅଲଗା ବିଭାଗ ରହିବ। ଏଥିରେ ନାମ, ଜନ୍ମତିଥି, ପିତାଙ୍କ ନାମ, ଆଧାର, ପାସପୋର୍ଟ, ମୋବାଇଲ ନମ୍ବର, ପାନକାର୍ଡ ନମ୍ବର ଓ ମତଦାତାଙ୍କ ପରିଚୟ ପତ୍ର ସଂଖ୍ୟା ଆଦି ସାମିଲ କରାଯିବ ବୋଲି ଜଣାପଡ଼ିଛି। ଏହାପରେ ଏଥିରୁ ସଂଗ୍ରହ କରାଯାଇଥିବା ଡାଟାକୁ ରାଷ୍ଟ୍ରୀୟ ଜନସଂଖ୍ୟା ରେଜିଷ୍ଟରରେ ଏଣ୍ଟ୍ରି କରାଯିବା ପରେ ନାଗରିକତା କାର୍ଡ ଜାରି କରାଯିବ।
