ଭୁବନେଶ୍ୱର, ୧୭।୧୦(ବ୍ୟୁରୋ): ବରିଷ୍ଠ ସାମ୍ବାଦିକ ନବୀନ ଦାସଙ୍କ ପୁଅ ମନୀଷ ଅନୁରାଗ ଦାସଙ୍କ ମୃତ୍ୟୁକୁ ନେଇ ଚର୍ଚ୍ଚାର ପରିସରକୁ ଆସିଥିବା ପାତ୍ରପଡ଼ାସ୍ଥିତ ସାଉଥ ସିଟି ହୋଟେଲ ଆଣ୍ଡ ବାର୍ର କାର୍ଯ୍ୟକଳାପ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରାଥମିକ ପର୍ଯ୍ୟାୟରେ ହୋଟେଲ ଓ ବାର୍କୁ ସିଲ୍ କରାଯାଇଛି। ମନୀଷଙ୍କ ମୃତ୍ୟୁ ପୂର୍ବରୁ ସେହିଦିନ ରାତିରେ ଜଣେ ପୋଲିସ କର୍ମଚାରୀଙ୍କ ଉପସ୍ଥିତି ନେଇ ଅଭିଯୋଗ ଆସିବା ପରେ ଘଟଣାର ତଦନ୍ତ ଜଣେ ଅତିରିକ୍ତ ଡିସିପିଙ୍କ ଦ୍ୱାରା କରାଯାଉଛି ବୋଲି ଡିସିପି ଉମାଶଙ୍କର ଦାସ କହିଛନ୍ତି। ଭୁବନେଶ୍ୱର ହାବିଲ୍ଦାର ଓ କନଷ୍ଟେବଳ ସଂଘ ସମ୍ପାଦକ ପ୍ରସନ୍ନ ବେହେରା ଉକ୍ତ ବାରକୁ ତାଙ୍କ ଭାଇଙ୍କ ନାମରେ ଲିଜ୍ରେ ନେଇ ଚଳାଉଥିବା ଜଣାପଡ଼ିଛି। ତେଣୁ ପୋଲିସ ଘଟଣାକୁ ଗମ୍ଭୀରତାର ସହ ନେଇ ତଦନ୍ତ ଆରମ୍ଭ କରିଛି। କୋଭିଡ୍ କଟକଣା ଏବଂ ସହରର ସମସ୍ତ ବାର୍ ରାତି ୧୦ଟା ପରେ ତାଲା ପଡୁଥିବାବେଳେ ସାଉଥ ସିଟି ବାର୍ ରାତି ତମାମ ଖୋଲା ରହୁଥିଲା। ଏନେଇ ସ୍ଥାନୀୟ ଲୋକ ଅଭିଯୋଗ କରିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନ ଥିଲା। ଗତ ୯ତାରିଖ ବିଳମ୍ବିତ ରାତିରେ ଉକ୍ତ ବାର୍ରେ ବିଲ୍ ପଇଠକୁ ନେଇ ମନୀଷ ଏବଂ ଅଭିଯୁକ୍ତଙ୍କ ମଧ୍ୟରେ ବଚସା ହେବା ପରେ ପୋଲିସ କଣ୍ଟ୍ରୋଲ ରୁମ୍କୁ ଫୋନ ଆସିଥିଲା। ସୂଚନା ପାଇ ତମାଣ୍ଡୋ ଥାନା ଅଧୀନରେ ଥିବା ପିସିଆର ଭ୍ୟାନ ପହଞ୍ଚତ୍ଥିଲା। ହେଲେ ହେଟେଲରେ ପୋଲିସ କର୍ମଚାରୀଙ୍କୁ ଭ୍ୟାନ୍ ଦେଖି ଫେରି ଆସିଥିଲା।
ମନୀଷଙ୍କ ମୃତ୍ୟୁ ପରେ ତାଙ୍କ ମୋବାଇଲକୁ ଅଭିଯୁକ୍ତମାନେ ନେଇଯାଇଥିଲେ, ଯାହାକି ବର୍ତ୍ତମାନ ସୁଦ୍ଧା ମିଳିପାରି ନାହିଁ। ମନୀଷଙ୍କ ମୃତ୍ୟୁକୁ ଲୁଚାଇବାକୁ ଉଦ୍ୟମ କରିଥିବା ୩ ସାଙ୍ଗଙ୍କୁ ଗିରଫ କରାଯାଇଥିଲେ ସୁଦ୍ଧା କାହା ଆଘାତରେ ମନୀଷଙ୍କ ମୃତ୍ୟୁ ହେଲା, କିଏ ପାଣିକୁ ଫିଙ୍ଗିଲେ, ସେ ସମ୍ପର୍କରେ କୌଣସି ସ୍ପଷ୍ଟ ସୂଚନା ପୋଲିସ ଦେଇନାହିଁ। ଅଭିଯୁକ୍ତମାନେ ପୋଖରୀ ପାଖରେ ଓଦା ଅବସ୍ଥାରେ ଥିବା ଜଣେ ପ୍ରତ୍ୟକ୍ଷଦର୍ଶୀ ଦେଖିଥିବା ଡିସିପି କହିଛନ୍ତି। ସିସିଟିଭି ଫୁଟେଜ, ଶେଷ ଫୋନ କଲ୍ ରେକର୍ଡ ଏବଂ ସାକ୍ଷୀଙ୍କ ବୟାନକୁ ନେଇ ଅଭିଯକ୍ତଙ୍କୁ କିପରି ଦୋଷୀ ପ୍ରମାଣିତ କରାଯିବ ତାକୁ ନେଇ ପ୍ରଶ୍ନ ଉଠୁଛି। ବ୍ୟବଚ୍ଛେଦ ରିପୋର୍ଟ, ଏଫ୍ଏମ୍ଟି ଓ ଅନ୍ୟାନ୍ୟ ରିପୋର୍ଟକୁ ଅପେକ୍ଷା ଥିବାବେଳେ ଅଭିଯୁକ୍ତଙ୍କୁ ରିମାଣ୍ଡରେ ଆଣିବାକୁ ପୋଲିସ ଆବେଦନ କରିଛି।
