ପାଟଣା,୨୫।୯(ସ୍ବ.ପ୍ର.): ଯୁବ ସାମ୍ବାଦିକ ଅରିନ୍ଦମ ଦାସ (ସାମୀ) ଶନିବାର ପଞ୍ଚଭୂତରେ ବିଲୀନ ହୋଇଛନ୍ତି। ଜନ୍ମସ୍ଥାନ କେନ୍ଦୁଝର ଜିଲା ରାଜନଗର ପଞ୍ଚାୟତର ରାଇକଳା ନିକଟ ବୈତରଣୀ ନଦୀକୂଳରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି। ତାଙ୍କ ଦାଦା ପୁଅ ଭାଇ ମାନସ ରଞ୍ଜନ ଦାସ ମୁଖାଗ୍ନି ଦେଇଛନ୍ତି। ସଂସ୍କାର ସମୟରେ ତାଙ୍କ ଦାଦା ଧରଣୀଧର ଦାସ, ସ୍ତ୍ରୀ ସମୀକ୍ଷା ବେହେରା ଏବଂ ଅଢ଼େଇ ବର୍ଷର ପୁଅ ସାନ୍ଭିକ୍ ଉପସ୍ଥିତ ଥିଲେ। ସେ ସ୍ବର୍ଗତ ଯୁଗୋଳ କିଶୋର ଦାସଙ୍କ ଏକମାତ୍ର ପୁଅ ଥିଲେ। ଜନ୍ମମାଟିରେ ତାଙ୍କ ପାର୍ଥିବ ଶରୀର ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା। ଗାଁ ଦାଣ୍ଡ କାନ୍ଦବୋବାଳିରେ ଫାଟି ପଡ଼ିଥିଲା। ପରେ ସବାଧାରରେ ମରଶରୀରକୁ ଗାଁ ଶ୍ମଶାନ ଅଭିମୁଖେ ନିଆଯାଇଥିଲା। ପାଟଣା ବିଧାୟକ ଜଗନ୍ନାଥ ନାୟକ ତାଙ୍କୁ କାନ୍ଧେଇ ନେଇଥିଲେ। ବହୁ ବିଶିଷ୍ଟ ବ୍ୟକ୍ତିତ୍ୱ ତାଙ୍କ ପୈତୃକ ଘରେ ଶେଷ ଦର୍ଶନ କରିବା ସହ ଶ୍ମଶାନରେ ପହଞ୍ଚି ଥିଲେ। ପାଟଣା ବିଧାୟକ ଜଗନ୍ନାଥ ନାଏକ, ଘଷିପୁରା ବିଧାୟକ ବଦ୍ରିନାରାୟଣ ପାତ୍ର, ବିଜେଡି ଜିଲା ସଭାପତି ମାଧବ ସର୍ଦ୍ଦାର, ପାଟଣା ବ୍ଲକ ଅଧ୍ୟକ୍ଷ ବିଶ୍ୱନାଥ ନାୟକ ପ୍ରମୁଖ ଗଭୀର ଶୋକ ପ୍ରକାଶ କରିବା ସହ ଶେଷ ଦର୍ଶନ କରିଛନ୍ତି। ପାଟଣା ପ୍ରେସ କ୍ଲବ ତରଫରୁ ରାଜଗରସ୍ଥିତ ଦଧିବାମନ ଜିଉ ଜଗନ୍ନାଥ ମନ୍ଦିରରେ ତାଙ୍କ ବିୟୋଗରେ ନୀରବ ପ୍ରାର୍ଥନା ସହ ଅମର ଆତ୍ମାର ସଦ୍ଗତି କାମନା ପାଇଁ ଦୀପ ପ୍ରଜ୍ଜ୍ୱଳନ କରାଯାଇଥିଲା।
ଉଲ୍ଲେଖଯୋଗ୍ୟ, କଟକ ମୁଣ୍ଡଳୀଠାରେ ଜଳସ୍ରୋତରେ ଫସିଥିବା ଏକ ହାତୀ ସମ୍ପର୍କରେ ଖବର ସଂଗ୍ରହ ପାଇଁ ଓଡ୍ରାଫ ଟିମ୍ ସହ ଶୁକ୍ରବାର ଅରିନ୍ଦମ ବୋଟ୍ ଯୋଗେ ମହାନଦୀ ଭିତରକୁ ଯାଇଥିଲେ। ମାତ୍ର ପ୍ରଖର ସ୍ରୋତରେ ବୋଟ୍ଟି ଓଲଟି ପଡ଼ିବାରୁ ସେ ନଦୀରେ ଭାସି ଯାଇଥିଲେ। ପରେ କଟକ ବଡ଼ ମେଡିକାଲରେ ତାଙ୍କୁ ମୃତ ଘୋଷଣା କରାଯାଇଥିଲା।
