ଭୁବନେଶ୍ୱର, ୭।୭(ବ୍ୟୁରୋ):ରାଜ୍ୟରେ ଚତୁର୍ଥ ପର୍ଯ୍ୟାୟ ଲକ୍ଡାଉନ୍ ଜାରି ରହିଥିବାବେଳେ ଅନେକ କଟକଣାକୁ କୋହଳ କରାଯାଇଛି। ଏହି ପରିପ୍ରେକ୍ଷୀରେ ୫%ରୁ ଅଧିକ ସଂକ୍ରମଣ ଥିବା ୧୦ଟି ଜିଲାରେ ପ୍ରାୟ ଦୋକାନ ଖୋଲିବାକୁ ନିର୍ଦ୍ଦେଶ ଦିଆଯାଇଥିଲେ ସୁଦ୍ଧା ମଲ୍ ଖୋଲିବାକୁ ଅନୁମତି ମିଳିନାହିଁ। ଏହାକୁ ନେଇ ଅନେକ ବ୍ୟବସାୟୀ ଅସନ୍ତୋଷ ପ୍ରକାଶ କରିବା ସହ ସେମାନଙ୍କ ଦୋକାନ ଓ ଶପିଂ କମ୍ପ୍ଲେକ୍ସ ମଲ୍ ଅନ୍ତର୍ଭୁକ୍ତ ହେଉ ନ ଥିବାରୁ ଏହାକୁ ଖୋଲିବାକୁ ଅନୁମତି ଦେବା ପାଇଁ ଅନୁରୋଧ କରିଥିଲେ। ମଙ୍ଗଳବାର ବିଏମ୍ସି ପକ୍ଷରୁ ଏ ନେଇ ସ୍ପଷ୍ଟୀକରଣ ଦିଆଯାଇଛି। ୨୫ ହଜାର ବର୍ଗଫୁଟରୁ କମ୍ କ୍ଷେତ୍ର ଥିବା ଦୋକାନ, ବ୍ୟବସାୟ ପ୍ରତିଷ୍ଠାନ ବା ଶପିଂ କମ୍ପ୍ଲେକ୍ସଗୁଡ଼ିକୁ ଦୋକାନ ଖୋଲିବାକୁ ଅନୁମତି ଦିଆଯାଇଛି। ଯେଉଁ କମ୍ପ୍ଲେକ୍ସଗୁଡିକ ଏକାଧିକ ମହଲାଯୁକ୍ତ ହୋଇଥିବ ତାହାକୁ ଗୋଟିଏ ୟୁନିଟ୍ ଭାବେ ବିଚାରକୁ ନିଆଯିବ। ଯଦି ବ୍ୟବସାୟୀ କମ୍ପ୍ଲେକ୍ସ ଗୁଡିକର ଗୋଟିଏ ଅଂଶକୁ ଖୋଲି ତାହାକୁ ୨୫ହଜାର ବର୍ଗଫୁଟରୁ କମ୍ ବୋଲି ଦାବି କରନ୍ତି, ତେବେ ତାହାକୁ ଗ୍ରହଣ କରାଯିବ ନାହିଁ। ସେହିପରି ଶପିଂ କମ୍ପ୍ଲେକ୍ସରେ ଥିବା ଅଫିସ୍ କମ୍ପ୍ଲେକ୍ସକୁ ମଧ୍ୟ ଗୋଟିଏ କମ୍ପ୍ଲେକ୍ସ ଭାବେ ଗଣାଯିବ। ତେଣୁ ଯେଉଁ ଦୋକାନ, ବ୍ୟବସାୟ ପ୍ରତିଷ୍ଠାନ ବା ଶପିଂ କମ୍ପ୍ଲେକ୍ସର ସମୁଦାୟ କ୍ଷେତ୍ର ସମୁଦାୟ ୨୫ହଜାର ବର୍ଗଫୁଟ ମଧ୍ୟରେ ହୋଇଥିବ କେବଳ ସେମାନେ ବ୍ୟବସାୟ କରିପାରିବେ ବୋଲି ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ସୂଚନା ଦିଆଯାଇଛି। ଏହା ବ୍ୟତୀତ ବ୍ୟବସାୟୀ ଓ ଗ୍ରାହକମାନେ ସମସ୍ତ କୋଭିଡ୍ ନିୟମକୁ କଡ଼ାକଡ଼ି ଭାବେ ପାଳନ କରିବେ। ସେହିପରି ବ୍ୟବସାୟ ସମୟରେ ସର୍ବାଧିକ ୨୫ ଜଣ ଗ୍ରାହକ ଏକ ସମୟରେ ଦୋକାନରେ ରହିପାରିବେ। ତେବେ ସେମାନଙ୍କ ମଧ୍ୟରେ ୬ଫୁଟର ଦୂରତା ରହିବା ଆବଶ୍ୟକ ବୋଲି ବିଏମ୍ସି ପକ୍ଷରୁ ନିର୍ଦ୍ଦେଶ ଦିଆଯାଇଛି।
