ବ୍ରିଷ୍ଟଲ,୨୮।୬: ଭାରତ ବିପକ୍ଷ ପ୍ରଥମ ମହିଳା ଦିନିକିଆ କ୍ରିକେଟ ମ୍ୟାଚ୍ରେ ୯୧ ବଲ ବାକିଥାଇ ଇଂଲଣ୍ଡ ୮ ଉଇକେଟରେ ବିଜୟୀ ହୋଇଛି। ଟସ୍ ହାରି ପ୍ରଥମେ ବ୍ୟାଟିଂ କରି ଭାରତ ନିର୍ଦ୍ଧାରିତ ୫୦ ଓଭରରେ ୮ ଉଇକେଟ ହରାଇ ୨୦୧ ରନ ସଂଗ୍ରହ କରିଥିଲା। ଜବାବରେ ଇଂଲଣ୍ଡ ୩୪.୫ ଓଭରରେ ୨ ଉଇକେଟ ବିନିମୟରେ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଓପନର ଟମି ବିମଣ୍ଟ ୮୭ ଓ ନାତାଲି ସ୍କିଭର ୭୪ ରନକରି ଅପରାଜିତ ରହିଥିଲେ। ଅଧିନାୟିକା ହିଥର ନାଇଟ ୧୮ ଓ ଲରେନ ଓ୍ବିନ୍ଫିଲ୍ଡ-ହିଲ୍ ୧୬ ରନକରି ଯଥାକ୍ରମେ ଏକତା ବିଷ୍ଟ ଓ ଝୁଲଣ ଗୋସ୍ବାମୀଙ୍କ ଦ୍ୱାରା ଆଉଟ ହୋଇଥିଲେ। ବିଜୟ ସହ ଇଂଲଣ୍ଡ ୩ ମ୍ୟାଚ୍ ବିଶିଷ୍ଟ ସିରିଜରେ ୧-୦ରେ ଅଗ୍ରଣୀ ହୋଇଛି।
ମିଥାଲିଙ୍କ ଧୈର୍ଯ୍ୟପୂର୍ଣ୍ଣ ବ୍ୟାଟିଂ
ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଭାରତ ୨୭ ରନରେ ଦୁଇ ଓପନରଙ୍କୁ ହରାଇ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଶେଫାଳି ବର୍ମା ୧୫ ଓ ସ୍ମୃତି ମାନ୍ଧନା ୧୦ ରନ କରି ଯଥାକ୍ରମେ କାଥେରାଇନ ବ୍ରଣ୍ଟ ଓ ଅନ୍ୟା ଶ୍ରୁବସ୍ଲେଙ୍କ ଦ୍ୱାରା ଆଉଟ୍ ହୋଇଥିଲେ। ଏହାପରେ ଅଧିନାୟିକା ମିଥାଲି ରାଜ ଓ ପୁନମ ରାଉତ ତୃତୀୟ ଉଇକେଟରେ ୯୪ ବଲରୁ ୫୬ ରନକରି ସ୍ଥିତି ସମ୍ଭାଳିବାକୁ ପ୍ରୟାସ କରିଥିଲେ। ପୁନମ ୩୨ ରନକରି କେଟ୍ କ୍ରସ୍ଙ୍କ ଦ୍ୱାରା ଆଉଟ୍ ହେବାପରେ ହରମନପ୍ରୀତ କୌର ମାତ୍ର ୧ ରନକରି ସୋଫି ଏକ୍ଲେଷ୍ଟୋନ୍ଙ୍କ ଦ୍ୱାରା ଆଉଟ୍ ହୋଇଥିଲେ। ପଞ୍ଚମ ଉଇକେଟ ମିଥାଲି ଓ ଦୀପ୍ତି ଶର୍ମା ୮୫ ବଲରୁ ୬୫ ରନ ସଂଗ୍ରହ କରିଥିଲେ। ୩୦ ରନକରିବା ପରେ ଦୀପ୍ତି ଶ୍ରୁବସ୍ଲେଙ୍କ ଦ୍ୱିତୀୟ ଶିକାର ହୋଇଥିଲେ। ଏହାପରେ ଷଷ୍ଠ ଉଇକେଟ ଭାବେ ମିଥାଲି ଆଉଟ ହୋଇଥିଲେ। ୧୩୬ ମିନିଟ କ୍ରିଜ୍ରେ ରହି ୧୦୮ଟି ବଲ ଖେଳି ୭ ଚୌକା ସହ ୭୨ ରନର ଧୈର୍ଯ୍ୟପୂର୍ଣ୍ଣ ଅର୍ଦ୍ଧଶତକୀୟ ଇନିଂସ ଖେଳି ସେ ଏକ୍ଲେଷ୍ଟୋନଙ୍କ ଦ୍ୱାରା ବୋଲ୍ଡ ହୋଇ ପ୍ୟାଭିଲିୟନ ଫେରିଥିଲେ। ଏଥିସହ ମିଥାଲି କ୍ୟାରିୟରର ୫୬ତମ ଅର୍ଦ୍ଧଶତକ ହାସଲ କରିଛନ୍ତି। ପୂଜା ବସ୍ତ୍ରକାର ୧୭ ବଲରୁ ୨ ଚୌକା ସହ ୧୫ ରନ ଏକଲେଷ୍ଟୋନଙ୍କ ତୃତୀୟ ଶିକାର ହୋଇଥିଲେ। ଉଇକେଟକିପର ବ୍ୟାଟ୍ସଓମ୍ୟାନ ତାନିୟା ଭାଟିଆ ୭ ରନକରି ବ୍ରଣ୍ଟଙ୍କ ବଲରେ ଷ୍ଟମ୍ପ ଆଉଟ ହୋଇଥିଲେ। ଶିଖା ପାଣ୍ଡେ ୩ ଓ ଝୁଲଣ ଗୋସ୍ବାମୀ ୧ ରନକରି ଅପରାଜିତ ରହିଥିଲେ। ବୋଲିଂରେ ଇଂଲଣ୍ଡ ତରଫରୁ ଏକ୍ଲେଷ୍ଟୋନ ସର୍ବାଧିକ ୩, ବ୍ରଣ୍ଟ ଓ ଶ୍ରୁବସ୍ଲେ ୨ଟି ଲେଖାଏ, କେଟ୍ କ୍ରସ୍ ଗୋଟିଏ ଉଇକେଟ ଅକ୍ତିଆର କରିଥିଲେ।
