ନୂଆଦିଲ୍ଲୀ,୧୯।୬: କରୋନା ମହାମାରୀ ଭୂତାଣୁ ଯୋଗୁ ପୃଥିବୀରେ ଆତଙ୍କ ସୃଷ୍ଟି କରିଥିବା ଚାଇନା ଏବେ ଭାରତରେ ନୂଆ ସଙ୍କଟ ସୃଷ୍ଟି କରିବା ଲାଗି ଷଡ଼ଯନ୍ତ୍ର ରଚିଛି। ଭାରତର ଟେଲିକମ୍ ସେକ୍ଟର, ସରକାରୀ କ୍ଷେତ୍ର, ପ୍ରତିରକ୍ଷା ସମେତ ଅନ୍ୟ ଗୁରୁତ୍ୱପୂର୍ଣ୍ଣ ସେକ୍ଟର ଉପରେ ସାଇବର ଆକ୍ରମଣ ଲାଗି ଡ୍ରାଗନ ବ୍ଲୁପ୍ରିଣ୍ଟ୍ ପ୍ରସ୍ତୁତ କରିଛି। ଚାଇନାର ବ୍ଲୁପ୍ରିଣ୍ଟ୍ ତାଲିକାରେ ଏନ୍ଟିପିସି ମଧ୍ୟ ରହିଛି। ଏକ ସାଇବର ଇଣ୍ଟେଲଜେନ୍ସ ଏଜେନ୍ସି ପକ୍ଷରୁ କରାଯାଇଥିବା ତଦନ୍ତରୁ ଏ ସମ୍ପର୍କରେ ଜଣାପଡ଼ିଛି। ଆମେରିକାୟ ପକ୍ଷରୁ ପ୍ରକାଶ ପାଇଥିବା ଏସମ୍ପର୍କିତ ରିପୋର୍ଟରେ ମଧ୍ୟ ସାଇବର ଆକ୍ରମଣ ବିଷୟରେ ଉଲ୍ଲେଖ କରାଯାଇଛି। ଭାରତରେ ସାଇବର ଆକ୍ରମଣ ଅଭିଯାନ ଚାଇନାର ସୈନ୍ୟ ବାହିନୀର ଏକ ସ୍ବତନ୍ତ୍ର ଶାଖା ଦ୍ୱାରା କରାଯାଉଛି। ୨୦୨୧ ମାର୍ଚ୍ଚରେ ଏ ସମ୍ପର୍କରେ ଜଣାପଡ଼ିଥିବା ରିପୋର୍ଟରେ ଦର୍ଶାଯାଇଛି। ପୂର୍ବ ଲଦାଖର ଗଲଓ୍ବାନ ଘାଟି ହିଂସା ପରେ ଚାଇନା ପକ୍ଷରୁ ଏଭଳି ଷଡ଼ଯନ୍ତ୍ର ରଚାଯାଇଛି। ୨୦୧୫ରେ ଚାଇନା ସୈନ୍ୟ ବାହିନୀର ପୁନର୍ଗଠନ ପରେ ସାଇବର ଆକ୍ରମଣ ଷଡ଼ଯନ୍ତ୍ର କରାଯାଇଥିବା ରିପୋର୍ଟରେ ପ୍ରକାଶ ପାଇଛି।
