ବମ୍ବେ: ପ୍ରସ୍ତୁତି ସରିଥିଲା। ଦିଲ୍ଲୀରେ ବିବାହ ପୋଷାକ ବି ପ୍ରସ୍ତୁତ କରିବାକୁ ଦିଆଯାଇଥିଲା। ହେଲେ ଗୋଟିଏ ଫୋନ କଲ୍ ସବୁକିଛି ବଦଳାଇ ଦେଇଥିଲା। କାରଣ ପ୍ରେମିକ ବିବାହ କରିବେ ନାହିଁ ବୋଲି ମନା କରିଦେଇଥିଲେ। ଆମେ କଥା ହେଉଛୁ ଅଭିନେତ୍ରୀ ନୀନା ଗୁପ୍ତାଙ୍କ କଥା। ଆତ୍ମଜୀବନୀ ‘ସଚ କହୁଁ ତୋ: ମେରି ଆତ୍ମକଥା’ରେ ନୀନା ଏଭଳି ଅନେକ ରହସ୍ୟ ଉପରୁ ପରଦା ହଟାଇଛନ୍ତି।
ପ୍ରେମିକଙ୍କ ନା ନନେଇ ନୀନା କହିଛନ୍ତି, ମୁଁ ତାଙ୍କ ଘରେ ରହୁଥିଲି। ସେ ଏବେ ନିଜର ବୈବାହିକ ଜୀବନରେ ବେଶ ଖୁସିରେ ଅଛନ୍ତି। ତାଙ୍କର ସନ୍ତାନ ଅଛନ୍ତି। ଜୀବିତ ଥିବାରୁ ସେ ଏହାକୁ ନିଶ୍ଚୟ ପଢ଼ିବେ। ମୁଁ ଯାହା କରିଥିଲି, ଭଗବାନ ଯାହା ଦେଇଥିଲେ, କିଛି ଭୁଲ ହୋଇଥିଲା ମୁଁ ତାହା ସ୍ବୀକାର କରୁଛି। ଏଣୁ ମୁଁ ଆଗକୁ ବଢ଼ିଯାଇଥିଲି। ମୋତେ ଏକ ସାଧାସିଧା ପରିବାର ଲୋଡ଼ା ଥିଲା। ସ୍ବାମୀ ଓ ପିଲାଙ୍କୁ ନେଇ ମୁଁ ଜୀବନ ଅତିବାହିତ କରିଥାନ୍ତି। ବିବାହ ପାଇଁ ମଧ୍ୟ ସମସ୍ତ ପ୍ରସ୍ତୁତି ସରିଥିଲା। ହେଲେ ସେ ଫୋନ କରି ତୁମକୁ ବିବାହ କରିପାରିବି ନାହିଁ ବୋଲି କହିଥିଲେ। ସେ ଏଭଳି କାହିଁକି କଲେ ତାହା ଜାଣିପାରି ନ ଥିଲେ ନୀନା। କିଂ କର୍ତ୍ତବ୍ୟ ବିମୂଢ଼ ହୋଇ ସେ ନିରବ ରହି ଜୀବନରେ ଆଗକୁ ବଢ଼ିବାକୁ ନିଷ୍ପତ୍ତି ନେଇଥିଲେ ବୋଲି ନୀନା କହିଛନ୍ତି।
