ନୂଆଦିଲ୍ଲୀ,୧୩।୫(ପି.ଟି.): ଭାରତୀୟ ତାରକା ବ୍ୟାଡ୍ମିଣ୍ଟନ ଖେଳାଳି କିଡାମ୍ବୀ ଶ୍ରୀକାନ୍ତ ଓ ମହିଳା ଖେଳାଳି ସାଇନା ନେହ୍ବାଲଙ୍କ ଟୋକିଓ ଅଲିମ୍ପିକ୍ସ ଖେଳିବା ଆଶା ଶେଷ ହୋଇଛି। ସିଙ୍ଗାପୁର ଓପନ୍ ଟୁର୍ନାମେଣ୍ଟକୁ ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ବାତିଲ କରିବା ପରେ ଏହି ଦୁଇ ଖେଳାଳିଙ୍କ ଅଲିମ୍ପିକ୍ ଯୋଗ୍ୟତା ହାସଲ ଆଶା ଧୂଳିସାତ ହୋଇଛି। ଏହି ଟୁର୍ନାମେଣ୍ଟ ଅଲିମ୍ପିକ୍ସର କ୍ୱାଲିଫାଇଂ ଇଭେଣ୍ଟ ବିବେଚିତ ହେଉଥିଲା। କୋଭିଡ୍-୧୯ କାରଣରୁ ଜାରି କରାଯାଇଥିବା ଭ୍ରମଣଜନିତ କଟକଣା ପାଇଁ ଏହି କ୍ୱାଲିଫାଇଂ ଟୁର୍ନାମେଣ୍ଟକୁ ବାତିଲ କରାଯାଇଛି ବୋଲି ଆୟୋଜକମାନେ ସୂଚନା ଦେଇଛନ୍ତି।
ସିଙ୍ଗାପୁର ବ୍ୟାଡ୍ମିଣ୍ଟନ ଆସୋସିଏଶନ (ଏସ୍ବିଏ) ଓ ବିଡବ୍ଲ୍ୟୁଏଫ୍ ମିଳିତ ଭାବେ ଏହି ଟୁର୍ନାମେଣ୍ଟ ବାତିଲ କରିବାକୁ ନିଷ୍ପତ୍ତି ନେଇଛନ୍ତି। ସିଙ୍ଗାପୁର ଓପନ ଜୁନ୍ ୧ରୁ ୬ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ରହିଥିଲା। ଏହା ବିଡବ୍ଲ୍ୟୁଏଫ୍ ଓ୍ବାଲର୍ଡ ଟୁର୍ର ଏକ ସୁପର ୫୦୦ ଇଭେଣ୍ଟ ବିବେଚିତ ହେଉଥିଲା। ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିବାକୁ ଏହି ଟୁର୍ନାମେଣ୍ଟ ଶେଷ ସୁଯୋଗ ସୃଷ୍ଟି କରିଥିଲା। ଖେଳାଳି, ଅଫିସିଆଲ, ଆୟୋଜକ ଓ ସ୍ଥାନୀୟ ଲୋକଙ୍କ ସ୍ବାସ୍ଥ୍ୟ ଏବଂ ନିରାପତ୍ତାକୁ ଦୃଷ୍ଟିରେ ରଖି ଏହି ଟୁର୍ନାମେଣ୍ଟକୁ ବାତିଲ କରିବାକୁ ହେଲା ବୋଲି ବିଡବ୍ଲ୍ୟୁଏଫ୍ ତରଫରୁ କୁହାଯାଇଛି। ଟୁର୍ନାମେଣ୍ଟର ସଫଳ ଆୟୋଜନ ପାଇଁ ବିଡବ୍ଲ୍ୟୁଏଫ୍ ଓ ଆୟୋଜକ ସବୁମତେ ପ୍ରୟାସ କରିଥିଲେ। ତେବେ ସାରା ବିଶ୍ୱରେ କୋଭିଡ୍-୧୯ ମାମଲା ଦ୍ରୁତଗତିରେ ବୃଦ୍ଧି ପାଉଥିବାରୁ ଭ୍ରମଣଜନିତ କଟକଣା ଜାରି କରାଯାଇଛି।
ତେବେ ଟୋକିଓ ଅଲିମ୍ପିକ୍ସର କ୍ୱାଲିଫାଇଂ ନେଇ ପରେ ସ୍ପଷ୍ଟ କରାଯିବ ବୋଲି ବିଡବ୍ଲ୍ୟୁଏଫ୍ ତରଫରୁ କୁହାଯାଇଛି। ପ୍ରଥମେ ମାଲେସିଆ ଓପନ (ମେ’ ୨୫ରୁ ୩୦) ଓ ପରେ ସିଙ୍ଗାପୁର ଓପନ ବାତିଲ ହେବା ପରେ ସାଇନା ଓ ଶ୍ରୀକାନ୍ତଙ୍କ କ୍ୱାଲିଫାଇଂ ଆଶା ଏକପ୍ରକାର ଶେଷ ହୋଇଛି। ମାଲେସିଆ ଓପନ ବାତିଲ ହେବା ପରେ ବ୍ୟାଡ୍ମିଣ୍ଟନ ଆସୋସିଏଶନ ଅଫ୍ ଇଣ୍ଡିଆ (ବିଏଆଇ) ବିଡବ୍ଲ୍ୟଏଫ୍କୁ ଅଲିମ୍ପିକ କ୍ୱାଲିଫିକେଶନ ନେଇ ସ୍ପଷ୍ଟ କରିବାକୁ କହିଥିଲା। ପୁଣି କରୋନା ପାଇଁ ସିଙ୍ଗାପୁର ଭାରତରୁ ସବୁପ୍ରକାର ଭ୍ରମଣକୁ ବାତିଲ କରିଛି। ତେଣୁ ଏଭଳି ସ୍ଥିତିରେ ସାଇନା ଓ ଶ୍ରୀକାନ୍ତଙ୍କ ପାଇଁ ଆଉ କୌଣସି ସୁଯୋଗ ନାହିଁ ବୋଲି ଧରିନେବାକୁ ହେବ। ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିଥିବା ଭାରତୀୟ ବ୍ୟାଡ୍ମିଣ୍ଟନ ଖେଳାଳିମାନ ହେଲେ ପି.ଭି. ସିନ୍ଧୁ, ବି. ସାଇ ପ୍ରଣୀତ ଓ ପୁରୁଷ ଡବଲ୍ସ ଯୋଡି ଚିରାଗ ସେଟ୍ଟୀ ଓ ସାତ୍ତ୍ୱିକସାଇରାଜ ରାଙ୍କିରେଡ୍ଡୀ।
