ଭୁବନେଶ୍ୱର, ୭।୪(କ୍ରୀଡ଼ା ପ୍ରତିନିଧି)- ଟୋକିଓ ଅଲିମ୍ପିକ୍ସ ପାଇଁ ରିଲେ ଟ୍ରାଏଲ ଇଭେଣ୍ଟ ପୋଲାଣ୍ଡର ସିଲେସିଆସ୍ଥିତ ଚୋର୍ଜୋଠାରେ ମେ’ ୧ ଓ ୨ ତାରିଖରେ ଅନୁଷ୍ଠିତ ହେବ। ଏହି ଓ୍ବାଲର୍ଡ ଆଥ୍ଲେଟିକ୍ସ ରିଲେରେ ଭାରତର ତିନୋଟି ଟିମ୍ ଭାଗନେବ। ତାହାହେଲା ମହିଳା ୪x୧୦୦ ମିଟର, ମହିଳା ୪x୪୦୦ ମିଟର ଏବଂ ପୁରୁଷ ୪x୪୦୦ ମିଟର ରିଲେ। ଅଲିମ୍ପିକ୍ସର ଯୋଗ୍ୟତା ପର୍ଯ୍ୟାୟ ଇଭେଣ୍ଟଭାବେ ବିବେଚିତ ହେଉଥିବା ଏହି ପ୍ରତିଯୋଗିତାର ମହିଳା ୪x୧୦୦ ମିଟର ରିଲେ ରେସ୍ ଟିମ୍ରେ ସ୍ପ୍ରିଣ୍ଟ କୁଇନ୍ ଓଡ଼ିଶାର ଦୂତୀ ଚାନ୍ଦ ସ୍ଥାନ ପାଇଛନ୍ତି। ଆଥ୍ଲେଟିକ ଫେଡେରେଶନ ଅଫ୍ ଇଣ୍ଡିଆ (ଏଏଫ୍ଆଇ) ପକ୍ଷରୁ ଟୁଇଟ୍ କରି ଏହା ସ୍ପଷ୍ଟ କରାଯାଇଛି। ଦୂତୀଙ୍କ ବ୍ୟତୀତ ଏହି ଦଳରେ ସ୍ଥାନ ପାଇଥିବା ଅନ୍ୟ ଆଥ୍ଲେଟମାନେ ହେଲେ ଏସ. ଧନଲକ୍ଷ୍ମୀ, ହିମା ଦାସ, ଅର୍ଚ୍ଚନା ସୁସେନ୍ଦ୍ରନ, ହିମାଶ୍ରୀ ରୟ ଓ ଏ.ଟି. ଧନେଶ୍ୱରୀ। ସେହିପରି ୪x ୪୦୦ ମିଟର ଦଳରେ ଏମ.ଆର. ପୁଭମ୍ମା, ଶୁଭ ଭେଙ୍କଟେଶ୍, କିରନ, ଅଞ୍ଜଳି ଦେବୀ, ଆର. ରେବତୀ, ଭି.କେ. ବିସ୍ମୟ ଓ ଜିସ୍ନା ମାଥ୍ୟୁ। ପୁରୁଷ ୪x୪୦୦ ମିଟର ରିଲେ ଦଳରେ ଅମୋଜ ଜ୍ୟାକବ, ନାଗାନାଥନ ପାଣ୍ଡି, ମହମ୍ମଦ ଆନାସ ୟାହିୟା, ଆରୋକା ରାଜୀବ, ସାର୍ଥକ ଭାମ୍ବ୍ରି, ଆୟାସାମୀ ଧରୁନ ଓ ନିର୍ମଳ ନୋଆ ଟମ୍ ସ୍ଥାନ ପାଇଛନ୍ତି। ”ଆଗାମୀ ପ୍ରତିଯୋଗିତାକୁ ଦୃଷ୍ଟିରେ ରଖି ମୁଁ ଅଭ୍ୟାସକୁ ଜୋରଦାର କରିଛି। ନିଜ ଫିଟ୍ନେସରେ ମଧ୍ୟ ପର୍ଯ୍ୟାପ୍ତ ଉନ୍ନତି ଆଣିଛି। ଏବେ ସମସ୍ତ ପ୍ରତିଯୋଗୀ ବ୍ୟକ୍ତିଗତଭାବେ ଟ୍ରେନିଂ ନେଉଥିଲେ ହେଁ ଚଳିତ ମାସ ୧୦ ତାରିଖରୁ ପଟିଆଲାରେ ଏକତ୍ରିତ ହୋଇ ମିଳିତଭାବେ ଅଭ୍ୟାସ କରିବେ। ମୁଁ ମଧ୍ୟ ସେହିଦିନ ପଟିଆଲା ଯାଇ ଅନ୍ୟ ୫ ଆଥଲେଟ୍ଙ୍କ ସହ ମିଶି ଟ୍ରେନିଂ ନେବି। ଭାରତୀୟ ଦଳ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିବା ଆଶା ରଖିଛି“ ବୋଲି ୧୦୦ ମିଟରରେ ଜାତୀୟ ରେକର୍ଡ ଧାରିଣୀ ଦୂତୀ ପ୍ରକାଶ କରିଛନ୍ତି। ପ୍ରକାଶ ଯୋଗ୍ୟ ଯେ, ଓ୍ବାଲର୍ଡ ଆଥଲେଟିକ୍ସ ରିଲେର ଟପ୍-୮ ଟିମ୍ ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିବେ। ୨୦୧୯ରେ ଦୋହାରେ ଅନୁଷ୍ଠିତ ବିଶ୍ୱ ଚାମ୍ପିୟନଶିପ୍ରେ ପ୍ରଭାବୀ ପ୍ରଦର୍ଶନ କରି ଭାରତୀୟ ୪x୪୦୦ ମିଟର ମିକ୍ସଡ ରିଲେ ଦଳ ଟୋକିଓ ଟିକେଟ ପାଇ ସାରିଛି। ୨୦୧୯ ଦୋହା ଏସିଆନ ଆଥଲେଟିକ୍ ଚାମ୍ପିୟନଶିପ୍ରେ ଭାରତୀୟ ଆଥଲେଟ୍ମାନେ ପୋଲାଣ୍ଡରେ ବଡ଼ ଅନ୍ତର୍ଜାତୀୟ ଇଭେଣ୍ଟରେ ଭାଗନେବାକୁ ଯାଉଛନ୍ତି। ଏଥିପାଇଁ ଏଏଫ୍ଆଇ ପକ୍ଷରୁ ମୋଟ ୨୦ ଆଥଲେଟ୍ଙ୍କ ନାମ ଘୋଷଣା କରାଯାଇଛି।
