ଭୁବନେଶ୍ୱର, ୩।୪(ବ୍ୟୁରୋ): ଛତିଶଗଡ଼ର ଶହୀଦ ବୀର ନାରାୟଣ ସିଂ ଅନ୍ତର୍ଜାତୀୟ ଷ୍ଟାଡିୟମ୍ରୁ ସାରା ଦେଶକୁ ବ୍ୟାପିଗଲା ସଂକ୍ରମଣ, ଯାହା ଏବେ ଭୟଙ୍କର ରୂପ ନେଇଛି। ସେହିଠାରୁ ହିଁ ସଂକ୍ରମଣ ଓଡ଼ିଶାକୁ ପଶିଥିବା ଆଶଙ୍କା କରାଯାଉଛି। ସୀମାନ୍ତ ନୂଆପଡ଼ା, କଳାହାଣ୍ଡି ଆଦି ଜିଲା ଦେଇ ପୂରା ରାଜ୍ୟକୁ ବ୍ୟାପି ଚାଲିଛି କରୋନା। ୨୪ଘଣ୍ଟାରେ ୪୬୧ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଥିବାବେଳେ ନୂଆପଡ଼ା ଜିଲାରୁ ସର୍ବାଧିକ ୮୬ଜଣ ରହିଛନ୍ତି। ସେହିଭଳି ଖୋର୍ଦ୍ଧା ୬୯, ସୁନ୍ଦରଗଡ଼ ୬୨, କଳାହାଣ୍ଡି ୩୬, ବରଗଡ଼ ୩୨ ଓ ଅନ୍ୟ ଜିଲାରେ ଚିହ୍ନଟ ଆକ୍ରାନ୍ତଙ୍କ ସଂଖ୍ୟା ଏହା ତଳକୁ ରହିଛି। ଫଳରେ ମୋଟ ସଂକ୍ରମିତଙ୍କ ସଂଖ୍ୟା ୩,୪୧,୭୭୨ରେ ପହଞ୍ଚତ୍ଛି। ଓଡ଼ିଶା ସମେତ ଦେଶରେ କରୋନାର ଦ୍ୱିତୀୟ ଲହର ହୁହୁ ହୋଇ ମାଡ଼ି ଚାଲିଥିବାବେଳେ ଏଭଳି ଏକ ସୂଚନା ଏବେ ବଡ଼ ବିପଦର ଆଭାସ ଦେଉଛି।
ଗତ ମାସ ୫ ତାରିଖରୁ ୨୧ ପର୍ଯ୍ୟନ୍ତ ଉକ୍ତ ଷ୍ଟାଡିୟମ୍ରେ ରୋଡ୍ ସେଫ୍ଟି ଓ୍ବାର୍ଲଡ ସିରିଜ୍ ଟି୨୦ କ୍ରିକେଟ ମ୍ୟାଚ୍ ଅନୁଷ୍ଠିତ ହୋଇଥିଲା। ହଜାର ହଜାର ଦର୍ଶକ ପାଭିଲିୟନ୍ରେ ବସିଥିବାବେଳେ କୋଭିଡ୍ ନିୟମ ପାଳନ କରି ନ ଥିବା ଦେଖାଯାଇଥିଲା। ସେହି ଖେଳ ପରେ ହିଁ ସଚିନ ତେନ୍ଦୁଲକର ଓ ୟୁସୁଫ୍ ପଠାନ କରୋନାରେ ଆକ୍ରାନ୍ତ ହୋଇଥିବା ଏବଂ ଛତିଶଗଡ଼ରେ ସଂକ୍ରମଣ ବଢ଼ିଛି। ସେହିପରି ସେହିଠାରୁ ହିଁ ବହୁ ଦର୍ଶକ ସଂକ୍ରମିତ ହୋଇଥିବା କୁହାଯାଉଛି। ଏହା ଜଣାପଡିବା ପରେ ଓଡ଼ିଶାରେ ଏବେ ଭାଳେଣି ପଡିଛି। କାରଣ ଏହି ଖେଳ ଦେଖିବାକୁ ଓଡ଼ିଶାରୁ ବହୁ ଦର୍ଶକ ଯାଇଥିଲେ। ପୁଣି ପ୍ରତିଦିନ ସୀମାନ୍ତ ଜିଲାର ଲୋକେ ଛତିଶଗଡ଼ ଯାଇ ସଂକ୍ରମିତ ହେଉଛନ୍ତି।
ତେବେ ଏ ପ୍ରସଙ୍ଗରେ ଗୃହ ରାଷ୍ଟ୍ରମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର କହିଛନ୍ତି, ସ୍ଥିତି ଉପରେ ନଜର ରଖାଯାଇଛି। ଜିଲାପାଳମାନଙ୍କୁ ଆବଶ୍ୟକ ପଦକ୍ଷେପ ନେବାକୁ କୁହାଯାଇଛି। ଅଧିକ ସଂକ୍ରମିତ ଚିହ୍ନଟ ହେଲେ କଣ୍ଟେନମେଣ୍ଟ କରାଯାଉଛି। ନୂଆପଡ଼ା ଓ କଳାହାଣ୍ଡି ପରିସ୍ଥିତି ଉପରେ କଡ଼ା ନଜର ରଖାଯାଇଛି। ଛତିଶଗଡ଼ରେ ହୋଇଥିବା ମ୍ୟାଚ୍ ଦେଖିବାକୁ ବିଭିନ୍ନ ଅଞ୍ଚଳର ଲୋକ ଏକତ୍ରିତ ହୋଇଥିଲେ। ତେଣୁ ସେଠାରୁ ମହାମାରୀ ସଂକ୍ରମଣ ଅଧିକ ବଢ଼ିଥିବା ଅନୁମାନ କରାଯାଉଛି। ହେଲେ ସୀମା ସିଲ୍ ସମାଧାନ ନୁହେଁ। ଛତିଶଗଡ଼ରୁ କଳାହାଣ୍ଡି, ନୂଆପଡ଼ାକୁ ଆସୁଥିବା ଲୋକଙ୍କୁ ଟେଷ୍ଟିଂ ପାଇଁ କୁହାଯାଇଛି। ପ୍ରବେଶ ପଥରେ ଯାଞ୍ଚକୁ କଡ଼ାକଡ଼ି କରାଯାଇଛି ବୋଲି ମନ୍ତ୍ରୀ କହିଛନ୍ତି।
