ଅନୁଗୋଳ ଅଫିସ, ୨୫।୩: କରୋନା କଟକଣା ମଧ୍ୟରେ ଆସନ୍ତା ମେ ୩ରେ ହେକବ ମାଟ୍ରିକ ପରୀକ୍ଷା। ଚଳିତବର୍ଷ ଅନୁଗୋଳ ଜିଲାର ୧୮ ହଜାର ୯୯୬ ଛାତ୍ରୀଛାତ୍ର ମାଟ୍ରିକ ପରୀକ୍ଷା ଦେବେ। ତେବେ ୯ ମାସ ଧରି ଅନ୍ଲାଇନ୍ରେ ପଢ଼ିଥିବା ଏହି ଛାତ୍ରୀଛାତ୍ରମାନେ ଏବେ ଶ୍ରେଣୀଗୃହରେ ଶିକ୍ଷାଲାଭ କରୁଛନ୍ତି। ସରକାରଙ୍କ ପକ୍ଷରୁ ରଖାଯାଇଥିବା ଶହେ ଦିନିଆ କ୍ଲାସ୍ ମଧ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ପ୍ରାୟ ୯୫ ପ୍ରତିଶତ ପାଠପଢ଼ା ହୋଇସାରିଥିବାରୁ ଏବେ ରିଭିଜନ ଉପରେ ଗୁରୁତ୍ୱ ଦିଆଯାଉଛି। ଚଳିତମାସର ବାକି ଦିନଗୁଡ଼ିକରେ ପୁରୁଣା ପାଠର ଆଲୋଚନା କରାଯିବ। ଏହାପରେ ଏପ୍ରିଲ୍ ୫ରୁ ୧୦ ଯାଏ ପ୍ରି-ବୋର୍ଡ ପରୀକ୍ଷା କରାଯାଇ ମାଟ୍ରିକ ପରୀକ୍ଷାକୁ ନେଇ ଛାତ୍ରୀଛାତ୍ରଙ୍କ ମନରୁ ଭୟ ଦୂର କରାଯିବ।
କରୋନା କାରଣରୁ ଗତ ଏକବର୍ଷ ହେଲା ପାଠପଢ଼ା ବାଧାପ୍ରାପ୍ତ ହୋଇଥିବାରୁ ଏଥର ମାଟ୍ରିକ ପରୀକ୍ଷାକୁ ନେଇ ସରକାରଙ୍କ ପକ୍ଷରୁ କେତେକ ପରିବର୍ତ୍ତନ କରାଯାଇଛି। ୧୦୦ ମାର୍କ ପରିବର୍ତ୍ତେ ୮୦ ମାର୍କର ପରୀକ୍ଷା ପାଇଁ ନିଷ୍ପତ୍ତି ନିଆଯାଇଛି। ସେହିପରି ଦୀର୍ଘ ୯ ମାସ ପରେ ଗତ ଜାନୁୟାରୀ ୮ରୁ ସ୍କୁଲ ଖୋଲାଯାଇ ପିଲାଙ୍କୁ ମାତ୍ର ଶହେ ଦିନିଆ ଶ୍ରେଣୀଶିକ୍ଷା ଦିଆଯାଉଛି। ପାଠ୍ୟକ୍ରମ ଶେଷ କରିବାକୁ ରବିବାରିଆ କ୍ଲାସ ମଧ୍ୟ କରାଯାଉଛି। ସ୍ବଳ୍ପ ସମୟ ମଧ୍ୟରେ ପିଲା ଯେପରି ଭଲଭାବେ ପ୍ରସ୍ତୁତି କରିପାରିବେ ସେଥିପାଇଁ ଗଣଶିକ୍ଷା ବିଭାଗ ପକ୍ଷରୁ ‘ଶିକ୍ଷା ଦର୍ପଣ’ ଯୋଗାଇ ଦିଆଯାଇଛି। ଦୋଳ, ହୋଲି ଓ ଏପ୍ରିଲ ୧ରେ ସ୍କୁଲ ଛୁଟି ଥିବାରୁ ଏହା ପୂର୍ବରୁ ପୁରୁଣା ପାଠର ଆଲୋଚନାକୁ ଜୋରଦାର କରିବାକୁ ଲକ୍ଷ୍ୟ ରଖାଯାଇଛି। ତେବେ ପ୍ରି-ବୋର୍ଡ ପରୀକ୍ଷାକୁ ନେଇ ଛାତ୍ରୀଛାତ୍ରମାନେ ବେଶ୍ ଉତ୍ସାହିତ ରହିଛନ୍ତି। କାରଣ ସମ୍ପୂର୍ଣ୍ଣ ମାଟ୍ରିକ ପରୀକ୍ଷା ଶୈଳୀରେ ଏହା କରାଯିବାକୁ ଥିବାରୁ ପିଲାମାନଙ୍କୁ ଆଗାମୀ ମାଟ୍ରିକ ପରୀକ୍ଷାରେ ଆଉ ଅସୁବିଧାର ସମ୍ମୁଖୀନ ହେବାକୁ ପଡ଼ିବ ନାହିଁ। ଏହାଦ୍ୱାରା ସେମାନଙ୍କ ମନରେ ଥିବା ପରୀକ୍ଷା ଭୟ ମଧ୍ୟ ଦୂର ହୋଇଯିବ। ରହିଯାଇଥିବା ଦ୍ୱନ୍ଦ୍ୱ ଦୂର କରିବା ସହ କେଉଁ ବିଷୟରେ ଅଧିକ ପ୍ରସ୍ତୁତି ଆବଶ୍ୟକ, ତାହା ମଧ୍ୟ ପିଲାଙ୍କୁ ଜଣାପଡ଼ିଯିବ। ଏହି ପରୀକ୍ଷା ପରେ ମଧ୍ୟ ୧୫ ଦିନ ଛାତ୍ରୀଛାତ୍ରଙ୍କ ଦ୍ୱନ୍ଦ୍ୱ ଦୂର କରାଯିବା ପାଇଁ କ୍ଲାସ ସହ ରିଭିଜନ୍ ହେବ। ସେହିପରି ଲୋ ଆଚିଭର କ୍ଲାସ ମଧ୍ୟ ପୂର୍ବଭଳି ଜାରି ରହିବ ବୋଲି ଜିଲା ଶିକ୍ଷା ବିଭାଗ ପକ୍ଷରୁ କୁହାଯାଇଛି।
ପରୀକ୍ଷା ସୁରୁଖୁରୁରେ ଆୟୋଜନ ହେବ
ଚଳିତବର୍ଷ ବିଭିନ୍ନ ଅସୁବିଧା ମଧ୍ୟରେ ଶିକ୍ଷାଦାନ କରାଯାଇଛି। ପାଠପଢ଼ା ପ୍ରାୟତଃ ଶେଷ ହୋଇଆସିଲାଣି। ରିଭିଜନ ଓ ପ୍ରି-ବୋର୍ଡ ପରୀକ୍ଷା ଛାତ୍ରୀଛାତ୍ରଙ୍କ ପ୍ରସ୍ତୁତିକୁ ପୂର୍ଣ୍ଣ କରିପାରିବ। ମାଟ୍ରିକ୍ ପରୀକ୍ଷା କିଭଳି ସୁରୁଖୁରୁରେ ଆୟୋଜନ କରାଯିବ, ସେ ନେଇ ବ୍ୟବସ୍ଥା ହେଉଛି।
-କଳ୍ପନା ବେହେରା, ଜିଲା ଶିକ୍ଷା ଅଧିକାରୀ
ଶିକ୍ଷା ଦର୍ପଣ ଚିନ୍ତା ଦୂର କରିଛି
ଦୀର୍ଘଦିନ ଧରି ଅନ୍ଲାଇନ୍ ପଢ଼ା ଯୋଗୁ ମାଟ୍ରିକ ପରୀକ୍ଷାକୁ ନେଇ ଚିନ୍ତା ବଢ଼ିଯାଇଥିଲା। କିପରି ପ୍ରସ୍ତୁତି ଶେଷ କରିବୁ ତାହା ଜାଣିପାରୁ ନ ଥିଲୁ। କିନ୍ତୁ ଶହେ ଦିନିଆ ଶ୍ରେଣୀଶିକ୍ଷା ସହ ଶିକ୍ଷା ଦର୍ପଣ ଆମ ଚିନ୍ତା ଦୂରକରି ପାରିଛି। ଶିକ୍ଷକମାନେ ମଧ୍ୟ ସହଯୋଗ କରୁଛନ୍ତି।
-ସ୍ବାତୀ ସାଗରିକା ଆଚାର୍ଯ୍ୟ, ଛାତ୍ରୀ
ପ୍ରି-ବୋର୍ଡ ଭୟ ଛଡ଼ାଇବ
ଏବେ ରିଭିଜନ୍ କ୍ଲାସ୍ ଚାଲିବ। ଆସନ୍ତା ମାସରେ ଏକ ପ୍ରି-ବୋର୍ଡ ପରୀକ୍ଷା ମଧ୍ୟ ଆୟୋଜନ କରାଯିବ। ମାଟ୍ରିକ ପରୀକ୍ଷା ପରି ଏହାର ଆୟୋଜନ ହେଉଥିବାରୁ ଏହାଦ୍ୱାରା ପରୀକ୍ଷା ଭୟ ଛାଡ଼ିଯିବ। କେଉଁ ବିଷୟରେ ଦୁର୍ବଳ ରହିଛୁ ତାହା ଜାଣିପାରିବୁ।
-ଆଲୋକ ପ୍ରଧାନ, ଛାତ୍ର
ଭଲଭାବେ ପ୍ରସ୍ତୁତ ହୋଇଗଲୁଣି
ସ୍କୁଲ ଖୋଲାଯିବା ପରେ ପାଠପଢ଼ାକୁ ନେଇ ଥିବା ଚିନ୍ତା ଦୂର ହୋଇପାରିଥିଲା। ଏବେ ଶ୍ରେଣୀଗୃହରେ ଆଗ୍ରହର ସହ ପଢ଼ି ନିଜକୁ ଆଗାମୀ ପରୀକ୍ଷା ପାଇଁ ପ୍ରସ୍ତୁତ କରୁଛୁ। ବର୍ତ୍ତମାନ ସୁଦ୍ଧା ୯୫ ପ୍ରତିଶତ ଶିକ୍ଷାଦାନ ସରିଛି। ତେଣୁ ପରୀକ୍ଷା ପାଇଁ ଆଉ ଭୟ ନାହିଁ।
-ସରସ୍ବତୀ ସାହୁ, ଛାତ୍ରୀ
ଏବେ ପରୀକ୍ଷାର ସମୟ
ଆସନ୍ତା ଏପ୍ରିଲ ୫ରୁ ପ୍ରି-ବୋର୍ଡ । ଏହା ହିଁ ଆମ ପ୍ରସ୍ତୁତିର ସୂଚନା ଦେବ। ଏହା ପୂର୍ବରୁ ଭଲଭାବେ ପ୍ରସ୍ତୁତ ହେବାକୁ ପଡ଼ିବ। ଏଥିରେ ଭଲ କରିପାରିଲେ ମାଟ୍ରିକ ପରୀକ୍ଷା ପାଇଁ ଅଧିକ ଚିନ୍ତା କରିବାକୁ ପଡ଼ିବ ନାହିଁ। ତେଣୁ ସବୁ ବିଷୟରେ ଭଲଭାବେ ପ୍ରସ୍ତୁତ ହେବାକୁ ପଡ଼ିବ।
-ତନୁଶ୍ରୀ ସରକାର, ଛାତ୍ରୀ
ଶିକ୍ଷକମାନେ ନିଷ୍ଠାର ସହ କାର୍ଯ୍ୟ ତୁଲାଉଛନ୍ତି
ଶହେ ଦିନିଆ ପାଠ୍ୟ ଖସଡ଼ାକୁ ଶିକ୍ଷକମାନେ ଶେଷ କରିବା ସ୍ଥିତିରେ ପହଞ୍ଚତ୍ଛନ୍ତି। ବିନା ଛୁଟିରେ ନିଜ କାର୍ଯ୍ୟ ନିଷ୍ଠାର ସହ ସମାପନ କରିଛନ୍ତି। ମାଟ୍ରିକ ପରୀକ୍ଷା ପୂର୍ବରୁ ପ୍ରି-ବୋର୍ଡ ଏକ ଭଲ ପ୍ଲାଟଫର୍ମ। ଏହାଦ୍ୱାରା ପିଲାମାନେ ଭଲ ଫଳ କରିବେ।
-ସରୋଜ ପାଣିଗ୍ରାହୀ, ଓଷ୍ଟାର ରାଜ୍ୟ ଉପସଭାପତି
