ମୁମ୍ବାଇ,୨୯ା୬(ପି.ଟି.): ମୁମ୍ବାଇରେ ଶୁକ୍ରବାର ପ୍ରବଳ ବର୍ଷାରେ ୩ ଜଣଙ୍କ ମୃତ୍ୟୁ ହେବା ସହ ୫ ଆହତ ହୋଇଛନ୍ତି। ଚଳିତ ବର୍ଷ ବହୁ ବିଳମ୍ବରେ ମୌସୁମୀ ମହାରାଷ୍ଟ୍ର ଛୁଇଁଥିବାବେଳେ ଆରମ୍ଭରୁ ବିପର୍ଯ୍ୟୟ ସୃଷ୍ଟି କରିଛି। ମୁମ୍ବାଇର ରାସ୍ତାଘାଟ ଜଳାର୍ଣ୍ଣବ ହୋଇଯିବାରୁ ଟ୍ରାଫିକ୍ ଜାମ୍ ହୋଇଛି। ଅଧିକାଂଶ ଟ୍ରେନ୍ ଚଳାଚଳରେ ବିଳମ୍ବ ଘଟିଛି। ଡ୍ରେନ୍ ଜାମ୍ ଯୋଗୁ ସହରତଳି ଅଞ୍ଚଳର ଲୋକଙ୍କ ଘରେ ବର୍ଷାପାଣି ପଶିଯାଇଛି। ବିଦ୍ୟୁତ ତାର ସଂସ୍ପର୍ଶରେ ଆସି ଅନ୍ଧେରୀ ଓ ଗୋରେଗାଓଁ ଅଞ୍ଚଳରେ ୩ ଜଣଙ୍କ ମୃତ୍ୟୁ ଘଟିଥିବା ବିଏମ୍ସି ମୁଖପାତ୍ର କହିଛନ୍ତି। ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଦାଦର, ଓ୍ବାଡଲା, ଓ୍ବର୍ଲି, କୁର୍ଲା, ଚେମ୍ବୁର, ବାନ୍ଦ୍ରା, କାଣ୍ଡିଭିଲି, ବିଖ୍ରୋଲି, କଞ୍ଜୁରମାର୍ଗ ଆଦି ଅଞ୍ଚଳ ଜଳାର୍ଣ୍ଣବ ହୋଇଛି। ମହାରାଷ୍ଟ୍ରରେ କ୍ରମାଗତ ୪ ଦିନ ହେଲା ବର୍ଷା ଲାଗିରହିଥିବାବେଳେ ନାସିକ୍ରେ ୨ ଜଣଙ୍କ ମୃତ୍ୟୁ ଘଟିଛି।
