ଭୁବନେଶ୍ୱର, ୧୬।୩ (କ୍ରୀଡ଼ା ପ୍ରତିନିଧି)-
ଓଡ଼ିଶା କୁସ୍ତି ଆସୋସିଏଶନ ଆନୁକୂଲ୍ୟରେ କଟକର ସଚିନ ତେନ୍ଦୁଲକର ଇନ୍ଡୋର ହଲ୍ରେ ଜୁନିୟର ଏବଂ କ୍ୟାଡେଟ୍ ବାଳକ ଫ୍ରିଷ୍ଟାଇଲ କୁସ୍ତି ପ୍ରତିଯୋଗିତା ସୋମବାର ଆରମ୍ଭ ହୋଇଛି। ଜୁନିୟର ବିଭାଗରେ ୧୮ରୁ ୨୦ ବର୍ଷ ବର୍ଗରେ ୫୭, ୬୧, ୬୫, ୭୦, ୭୪, ୭୯ ଓ ୮୬ କେଜି ବିଭାଗରେ ଏବଂ କ୍ୟାଡେଟ୍ ବାଳକ ସବ୍ଜୁନିୟର ୧୬-୧୭ ବୟସ ବର୍ଗରେ ୪୫, ୪୮, ୫୧, ୫୫, ୬୦, ୬୫, ୭୧ ଓ ୮୦ କେଜି ବିଭାଗରେ ପ୍ରତିଯୋଗିତା ହେଉଛି। ପ୍ରତିଯୋଗିତାରେ ୫ ଜିଲା ପୁରୀ, ସମ୍ବଲପୁର, ଢେଙ୍କାନାଳ, ଖୋର୍ଦ୍ଧା ଓ କଟକରୁ ୪୫ ରେସ୍ଲର ଅଂଶଗ୍ରହଣ କରିଛନ୍ତି। ଚଳଚ୍ଚିତ୍ର ଅଭିନେତା ଅରିନ୍ଦମ ରୟ ଅତିଥିଭାବେ ଯୋଗଦେଇ ପ୍ରତିଯୋଗିତାକୁ ଉଦ୍ଘାଟନ କରିଥିଲେ। ଆୟୋଜକ ଆସୋସିଏଶନ ସଭାପତି ରାମଚନ୍ଦ୍ର ପାଢ଼ୀ, ସମ୍ପାଦକ କିଶୋର ବେହେରା, ପୂର୍ବତନ ସମ୍ପାଦକ ବିନୋଦ କୁମାର ଦାସ, ଉପସଭାପତି ଦେବେନ୍ଦ୍ର ସାହୁ, ପରାମର୍ଶଦାତା ନୀଳମଣି ସାହୁ, ବିରଜା ପ୍ରସାଦ ଦାସ, କୋଷାଧ୍ୟକ୍ଷ କୁମାର ରାୟ ପ୍ରମୁଖ ଉପସ୍ଥିତ ଥିଲେ।
