ନୂଆଦିଲ୍ଲୀ: ମେଜର ପୋର୍ଟ ଅଥରିଟିଜ ବିଲ୍ ୨୦୨୦କୁ ବୁଧବାର ପାର୍ଲାମେଣ୍ଟର ମଞ୍ଜୁରୀ ମିଳିଛି। ବନ୍ଦର ଏବଂ ଜାହାଜ ଚଳାଚଳ ରାଷ୍ଟ୍ରମନ୍ତ୍ରୀ ମନସୁଖଲାଲ୍ ମାଣ୍ଡବୀୟ ଏହି ବିଲ୍କୁ ରାଜ୍ୟ ସଭାରେ ଉପସ୍ଥାପନ କରିଥିଲେ। ଏହି ବିଲ୍କୁ ବର୍ତ୍ତମାନ ରାଷ୍ଟ୍ରପତିଙ୍କ ଅନୁମୋଦନ ଲାଗି ପଠାଯିବ। ଏହାଦ୍ୱାରା ବନ୍ଦର ଭିତ୍ତିଭୂମି ସମ୍ପ୍ରସାରଣ ଏବଂ ବାଣିଜ୍ୟ କାରବାରକୁ ପ୍ରୋତ୍ସାହିତ କରିବା ଦିଗରେ ସରକାର ବିଭିନ୍ନ ଯୋଜନା ହାତକୁ ନେବେ ବୋଲି ଜଣାପଡ଼ିଛି। ଉକ୍ତ ବିଲ୍ରେ ନିଷ୍ପତ୍ତି ନେବା କ୍ଷମତାର ବିକେନ୍ଦ୍ରୀକରଣ ଏବଂ ବନ୍ଦର କ୍ଷେତ୍ରରେ ପ୍ରଫେସନାଲିଜମ ଏବଂ ଦକ୍ଷତା ବୃଦ୍ଧି ଉପରେ ଫୋକସ କରାଯାଇଛି। ଅଂଶୀଦାରଙ୍କ ଲାଗି ତ୍ୱରିତ ନିଷ୍ପତ୍ତି ବ୍ୟବସ୍ଥା ଏବଂ ପ୍ରକଳ୍ପଗୁଡ଼ିକର କାର୍ଯ୍ୟାନ୍ବୟନ ଦିଗରେ ମଧ୍ୟ ଏଥିରେ ଧ୍ୟାନ ରଖାଯାଇଛି।
ସେହିଭଳି ପୋର୍ଟଗୁଡ଼ିକରେ ଗ୍ଲୋବାଲ ପ୍ରାକ୍ଟିସ, ପ୍ରମୁଖ ବନ୍ଦରଗୁଡ଼ିକରେ ସ୍ବଚ୍ଛତା, କାର୍ଯ୍ୟଦକ୍ଷତା ବୃଦ୍ଧି, ଆନୁଷ୍ଠାନିକ ବିଧି ବ୍ୟବସ୍ଥାର ଆଧୁନିକୀକରଣ ଭଳି ପ୍ରମୁଖ ଦିଗଗୁଡ଼ିକୁ ଉକ୍ତ ବିଲ୍ରେ ଗୁରୁତ୍ୱାରୋପ କରାଯାଇଛି। ପୂର୍ବ ତୁଳନାରେ ନୂଆ ବିଲ୍କୁ ଅଧିକ ବ୍ୟବସ୍ଥିତ କରାଯାଇଛି। ଏଥିରେ ୧୩୪ ପରିବର୍ତ୍ତେ ୭୬ ସେକ୍ସନ ରହିଛି। ବନ୍ଦର କର୍ତ୍ତୃପକ୍ଷ ବୋର୍ଡକୁ ସରଳୀକରଣ କରିବା ଲାଗି ଏଥିରେ ପ୍ରସ୍ତାବ ଦିଆଯାଇଛି। ବୋର୍ଡରେ ୧୧ରୁ ୧୩ ସଦସ୍ୟ ରହିପାରିବେ। ଏହାବାଦ୍ ଏଥିରେ ପ୍ରଫେଶନାଲ ଏବଂ ସ୍ବାଧୀନ ସଦସ୍ୟ ଏବଂ ସରକାରଙ୍କ ନୋମିନି ମଧ୍ୟ ରହିବେ। ପ୍ରମୁଖ ବନ୍ଦରଗୁଡିକରେ ଟାରିଫ ଅଥରିଟିଙ୍କ ଭୂମିକାରେ ମଧ୍ୟ ପରିବର୍ତ୍ତନ କରାଯିବ। ବନ୍ଦର କର୍ତ୍ତୃପକ୍ଷ ବର୍ତ୍ତମାନ ଟାରିଫ ନିର୍ଦ୍ଧାରଣ କରିବାକୁ ସକ୍ଷମ ହେବେ। ପିପିପି ଅପରେଟରଙ୍କୁ ମଧ୍ୟ ଟାରିଫ ନିର୍ଦ୍ଧାରଣ କରିବାର ଅନୁମତି ମିଳିବ। ଏଭଳି ଅନ୍ୟ ପ୍ରସ୍ତାବ ଏହି ବିଲ୍ରେ ରହିଥିବା ଜଣାପଡ଼ିଛି।
