ନୂଆଦିଲ୍ଲୀ, ୪ା୨: ଆମେରିକାର ପ୍ରମୁଖ କମ୍ପାନୀ ଆମାଜନ ସହ ବିବାଦରେ ଫସିଥିବା ଫ୍ୟୁଚର ଗ୍ରୁପ୍ର ମୁଖ୍ୟ ନିର୍ବାହୀ କିଶୋର ବିୟାନୀଙ୍କୁ ବଡ଼ ଝଟକା ଲାଗିଛି। ଦେଶର ଶେୟାର ବଜାର ନିୟନ୍ତ୍ରକ ଭାରତୀୟ ପ୍ରତିଭୂତି ଏବଂ ବିନିମୟ ବୋର୍ଡ (ସେବି) କିଶୋର ବିୟାନୀ ଏବଂ ତାଙ୍କ ଭାଇ ଅନୀଲଙ୍କୁ ସିକ୍ୟୁରିଟି ବଜାରରେ ଭାଗନେବାରୁ ବ୍ୟାନ୍ ଲଗାଇଛନ୍ତି। ଫ୍ୟୁଚର ଗ୍ରୁପ୍ର ରିଟେଲ କମ୍ପାନୀ ଫ୍ୟୁଚର ରିଟେଲ ଶେୟାରରେ ଇନ୍ସାଡର ଟ୍ରେଡିଂର ଯାଞ୍ଚ ପରେ ସେବି ଏଭଳି ପ୍ରତିବନ୍ଧକ ଲଗାଇଥିବା ଜଣାପଡିଛି। ମାର୍ଚ୍ଚ ଏବଂ ଏପ୍ରିଲ ୨୦୧୭ରେ କମ୍ପାନୀ ଏଭଳି ବେଆଇନ କାର୍ଯ୍ୟକଳାପରେ ସାମିଲ ରହିଥିବା ଅଭିଯୋଗ ଆସିଥିଲା। ଏହି ଆଧାରରେ ସେବି ଶକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ନିର୍ଦ୍ଦେଶ ମୁତାବକ, ବିୟାନୀ ଆଗାମୀ ୨ ବର୍ଷ ଯାଏ ଫ୍ୟୁଚର ରିଟେଲର ସିକ୍ୟୁରିଟିକୁ କ୍ରୟ ବିକ୍ରୟ କିମ୍ବା ଡିଲ୍ କରିପାରିବେ ନାହିଁ। ସେବି ଏହାର ଯାଞ୍ଚରେ ପାଇଛି ଯେ, ବିୟାନୀ ଫ୍ୟୁଚର କର୍ପୋରେଟ ସିକ୍ୟୁରିଟିଜ ପ୍ରାଇଭେଟ ଲିମିଟେଡ୍ ନାମରେ ଏକ ଟ୍ରେଡିଂ ଆକାଉଣ୍ଟ ଖୋଲିଥିଲେ। ଫ୍ୟୁଚର ରିଟେଲ କମ୍ପାନୀର ଡିମର୍ଜର ନିଷ୍ପତ୍ତି ସାର୍ବଜନୀନ ହେବା ପୂର୍ବରୁ ଏହି ଆକାଉଣ୍ଟ ଦ୍ୱାରା କମ୍ପାନୀ ଶେୟାରକୁ କିଣାବିକା କରାଯାଇଥିଲା। ସେବି ଫ୍ୟୁଚର କର୍ପୋରେଟ ସିକ୍ୟୁରିଟିଜ ଏବଂ ବିୟାନୀ ଭ୍ରାତାଙ୍କ ଉପରେ କୋଟିଏ ଟଙ୍କା ଲେଖାଏ ଜରିମାନା ଲଗାଇଛନ୍ତି। ୪୫ ଦିନ ମଧ୍ୟରେ ଜରିମାନା ରାଶି ପ୍ରଦାନ କରିବାକୁ କୁହାଯାଇଛି। ବିୟାନୀ ଫ୍ୟୁଚର ଗ୍ରୁପ୍ର ରିଟେଲ ଏବଂ ହୋଲ୍ସେଲ କାରବାରକୁ ଗତବର୍ଷ ମୁକେଶଙ୍କ ରିଲାଏନ୍ସ ରିଟେଲକୁ ବିକ୍ରି କରିବା ଲାଗି ଡିଲ୍ କରିଥିଲେ। ଏହି ଡିଲ୍କୁ ଆମାଜନ କୋର୍ଟରେ ଚ୍ୟାଲେଞ୍ଜ କରିଥିଲା।
ଫ୍ୟୁଚର ରିଟେଲ- ରିଲାଏନ୍ସ ଡିଲ୍ ଉପରେ ରୋକ
ଫ୍ୟୁଚର ରିଟେଲ ଏବଂ ରିଲାଏନ୍ସ ଡିଲ୍କୁ ଦିଲ୍ଲୀ ଉଚ୍ଚ ନ୍ୟାୟାଳୟ ମଙ୍ଗଳବାର ରୋକ ଲଗାଇଛନ୍ତି। ସଙ୍ଗାପୁର ଇଣ୍ଟରନ୍ୟାଶନାଲ ଆର୍ବିଟ୍ରେଶନ ଦ୍ୱାରା ପ୍ରଦାନ କରାଯାଇଥିବା ଏମର୍ଜେନ୍ସି ଆଓ୍ବାର୍ଡ ଭାରତ ଲାଗି ମଧ୍ୟ କାର୍ଯ୍ୟକାରୀ ହେବ ବୋଲି କୋର୍ଟ କହିଛନ୍ତି। ୨୪,୭୩୧ କୋଟି ଟଙ୍କାରେ ଏହି ଡିଲ୍ ହୋଇଥିବା ବେଳେ ଏଥିରେ ଆଗକୁ ନ ବଢିବା ଲାଗି ଫ୍ୟୁଚର ଗ୍ରୁପ୍କୁ ନିର୍ଦ୍ଦେଶ ରହିଛି। ଆଗାମୀ ନିର୍ଦ୍ଦେଶ ନ ଆସିବା ଯାଏ ଏହି ଡିଲ୍ ଆଗକୁ ବଢ଼ିପାରିବ ନାହିଁ। ପିଟିଶନକାରୀ ଆମାଜନ ଅଧିକାରକୁ ରକ୍ଷା କରିବା ଦିଗରେ କୋର୍ଟ ଏଭଳି ନିର୍ଦ୍ଦେଶ ଦେଇଥିବା କହିଛନ୍ତି। ଅଫର ପକ୍ଷରେ ଏହି ଡିଲ୍ ଅଟକିଲେ ରିଟେଲ କାରବାର ଆଗକୁ ବଢାଇବା କଷ୍ଟକର ବୋଲି ଫ୍ୟୁଚର ଗ୍ରୁପ୍ ପକ୍ଷରୁ ସୂଚନା ରହିଛି।
