ଭାରତୀୟ କ୍ରିକେଟ ଦଳର ପାଚେରି କୁହାଯାଉଥିବା ଚେତେଶ୍ୱର ପୂଜାରା ଆଜି ୩୧ତମ ଜନ୍ମଦିନ ପାଳନ କରୁଛନ୍ତି। ୧୯୮୮ରେ ଜାନୁୟାରୀ ୨୫ ରାଜକୋଟରେ ଜନ୍ମ ହୋଇଥିବା ପୂଜାରା ନିକଟରେ ଅଷ୍ଟ୍ରେଲିଆରେ ଟିମ ଇଣ୍ଡିଆର ଐତିହାସିକ ବିଜୟରେ ପୂଜାରା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ପିଲାଦିନରୁ ବହୁ ସଂଘର୍ଷ କରି ପୂଜାରା ଏହି ସ୍ଥାନରେ ପହଞ୍ଚି ପାରିଛନ୍ତି। କେବଳ ପୂଜାରା ନୁହେଁ, ତାଙ୍କ ସଫଳତାରେ ତାଙ୍କ ମା’ଙ୍କର ମଧ୍ୟ ବଡ଼ ହାତ ରହିଛି। ଚେତେଶ୍ୱର ପୂଜାରା ଛୋଟ ଥିବାବେଳେ ତାଙ୍କ ମା’ ରିନା ସ୍ବପ୍ନ ଦେଖିଥିଲେ ଯେ, ତାଙ୍କ ପୁଅ ଦିନେ ଭାରତ ପାଇଁ କ୍ରିକେଟ ଖେଳିବେ। ଚେତେଶ୍ୱରଙ୍କ ପିତା ଅରବିନ୍ଦ ପୂଜାରା ମଧ୍ୟ ଖୁବ କମ ବୟସରେ ତାଙ୍କ ପୁଅର ପ୍ରତିଭାକୁ ଚିହ୍ନିଥିଲେ। ଅରବିନ୍ଦ ପୂଜାରା ନିଜେ ରଣଜୀ ଟ୍ରଫି ଖେଳିଛନ୍ତି। ଚେତେଶ୍ୱର ପୂଜାରାଙ୍କୁ ପ୍ରଥମ ଚମଡ଼ା ବଲ ବ୍ୟାଟ୍ ତାଙ୍କ ମା’ଙ୍କ ଦ୍ୱାରା ଉପହାର ସ୍ବରୂପ ଦିଆଯାଇଥିଲା। ପୂଜାରାଙ୍କ ମା’ ୧୫୦୦ ଟଙ୍କା ମୂଲ୍ୟର ଏକ ବ୍ୟାଟ କିଣି ପୁଅକୁ ଦେଇଥିଲେ। ପୂଜାରାଙ୍କ ମା’ ସେହି ବ୍ୟାଟ ପାଇଁ କିସ୍ତିରେ ଟଙ୍କା ଦେଇଥିଲେ। କେବଳ ଏତିକି ନୁହେଁ, ଯେତେବେଳେ ପୂଜାରାଙ୍କୁ ୮ ବର୍ଷ ହୋଇଥିଲା, ସେ ଛୋଟ ଥିବାରୁ ଅନ୍ୟ ବ୍ୟାଟିଂ ପ୍ୟାଡ ତାଙ୍କୁ ଫିଟ ହେଉ ନ ଥିଲା। ଏହା ପରେ ମା’ ହାତରେ ପୁଅ ପାଇଁ ପ୍ୟାଡ ସିଲେଇ କରିଥିଲେ।
କଠିନ ପରିଶ୍ରମ ହେତୁ ଚେତେଶ୍ୱର ପୂଜାରା ପ୍ରଥମ ଶ୍ରେଣୀ କ୍ରିକେଟରେ ପ୍ରସିଦ୍ଧ ହୋଇଥିଲେ, କିନ୍ତୁ ତାଙ୍କ ମା ଭାରତ ପାଇଁ ଖେଳୁଥିବା ପୁଅକୁ ଦେଖିପାରି ନ ଥିଲେ। ଚେତେଶ୍ୱର ପୂଜାରାଙ୍କ ଡେବ୍ୟୁ ପୂର୍ବରୁ ତାଙ୍କ ମାଙ୍କର କର୍କଟ ରୋଗରେ ମୃତ୍ୟୁ ହୋଇଥିଲା। ଚେତେଶ୍ୱର ପୂଜାରା ତାଙ୍କ ମା’ଙ୍କୁ ହରାଇଥିଲେ କିନ୍ତୁ ତାଙ୍କ ସ୍ବପ୍ନକୁ ସାକାର କରିବା ପାଇଁ କୌଣସି ସୁଯୋଗ ହାତଛଡା କରି ନଥିଲେ। ସେ ଅକ୍ଟୋବର ୯, ୨୦୧୦ରେ ଅଷ୍ଟ୍ରେଲିଆ ବିପକ୍ଷରେ ଟେଷ୍ଟ ଡେବ୍ୟୁ କରିଥିଲେ। ପୂଜାରା ଆଜି ଦୁନିଆର ସର୍ବୋତ୍ତମ ଟେଷ୍ଟ କ୍ରିକେଟରମାନଙ୍କ ମଧ୍ୟରୁ ଅନ୍ୟତମ। ଚେତେଶ୍ୱର ପୂଜାରା ୮୧ ଟେଷ୍ଟରେ ୬୧୧୧ ରନ ସଂଗ୍ରହ କରିଛନ୍ତି ଏବଂ ତାଙ୍କର ହାରାହାରି ୪୭.୭୪ ରହିଛି। ସେ ୧୮ ଶତକ ଏବଂ ୨୮ ଅର୍ଦ୍ଧଶତକ ହାସଲ କରିଛନ୍ତି। ଅଷ୍ଟ୍ରେଲିଆ ବିପକ୍ଷ ସିରିଜରେ ସେ ଗୋଟିଏ ଶତକ ହାସଲ କରିପାରି ନ ଥିଲେ କିନ୍ତୁ ସେ ୯୨୮ ବଲ ସମ୍ମୁଖୀନ ହୋଇ ଅଷ୍ଟ୍ରେଲୀୟ ବୋଲରମାନଙ୍କୁ ରୋକିଥିଲେ। ୩ ଅର୍ଦ୍ଧଶତକ ହାସଲ କରି ସିରିଜରେ ସେ ୨୭୧ ରନ ସଂଗ୍ରହ କରିଥିଲେ ଏବଂ ଟିମ ଇଣ୍ଡିଆ ୨-୧ରେ ସିରିଜ୍ ଜିତିଥିଲା।
