ମୁମ୍ବାଇ: ଭାରତୀୟ ଶେୟାର ବଜାରର ବୃଦ୍ଧି ଧାରା ଜାରି ରହିଛି। ମଙ୍ଗଳବାର ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ)ର ସେନ୍ସେକ୍ସ ସର୍ବକାଳୀନ ରେକର୍ଡ ସ୍ତରରେ ରହିଛି। ରିଲାଏନ୍ସ ଇଣ୍ଡଷ୍ଟ୍ରିଜ, ଏଚ୍ଡିଏଫ୍ସି ବ୍ୟାଙ୍କ ଏବଂ ଭାରତୀ ଏୟାରଟେଲ ଭଳି କମ୍ପାନୀର ଶେୟାର କାରବାର ଏହି ସମୟରେ ଭଲ ରହିଛି। ବିଶ୍ୱ ଶେୟାର ବଜାରଗୁଡିକରେ ଉନ୍ନତ ପ୍ରଦର୍ଶନ ଏବଂ ବିଦେଶୀ ପୋର୍ଟଫୋଲିଓ ନିବେଶକଙ୍କ ନିବେଶ ବଢ଼ିବାରୁ ଶେୟାର ବଜାରରେ କାରବାର ଊର୍ଦ୍ଧ୍ୱଗାମୀ ରହିଛି। ୩୦ ଶେୟାର ବିଶିଷ୍ଟ ସେନ୍ସେକ୍ସ ଦିନ ମଧ୍ୟରେ ନୂଆ ରେକର୍ଡ ସ୍ତର ୪୯,୫୬୯.୧୪ ସ୍ତର ଛୁଇଁଥିଲା। କାରବାର ଶେଷ ବେଳକୁ ଏହା ୨୪୯.୭୯ ପଏଣ୍ଟ(୦.୫୦%) ଉଚ୍ଚରେ ରହି ୪୯,୫୧୭.୧୧ ପଏଣ୍ଟରେ ବନ୍ଦ ହୋଇଛି।
ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ(ନିଫ୍ଟି) କାରବାର ୭୮.୭୦(୦.୫୪%) ୧୪,୫୬୩.୪୫ ପଏଣ୍ଟ ସ୍ତରରେ ବନ୍ଦ ହୋଇଛି। ଏହା ଦିନ ମଧ୍ୟରେ ୧୪,୫୯୦.୬୫ ପଏଣ୍ଟ ସ୍ତର ଛୁଇଁଥିଲା। ସେନ୍ସେକ୍ସରେ ଏସ୍ବିଆଇ ସବୁଠାରୁ ଭଲ କାରବାର ହାସଲ କରିଛି। ଏହାର ଶେୟାର କାରବାର ପ୍ରାୟ ୪% ବଢିଛି। ସେହିଭଳି ଭାରତୀ ଏୟାରଟେଲ, ରିଲାଏନ୍ସ ଇଣ୍ଡଷ୍ଟ୍ରିଜ, ଏଚ୍ଡିଏଫ୍ସି ବ୍ୟାଙ୍କ, ଆଇଟିସି, ଆକ୍ସିସ ବ୍ୟାଙ୍କ ଏବଂ ଏନ୍ଟିପିସିର ଶେୟାର ପ୍ରଦର୍ଶନ ବେଶ୍ ଉନ୍ନତ ରହିଥିଲା। ଏସିଆନ ପେଣ୍ଟସ, ହିନ୍ଦୁସ୍ଥାନ ୟୁନିଲିଭର ଲିମିଟେଡ୍, ନେସ୍ଲେ ଇଣ୍ଡିଆ, ଟାଇଟାନ, କୋଟାକ ବ୍ୟାଙ୍କର ଶେୟାର କାରବାର କ୍ଷତିଗ୍ରସ୍ତ ହୋଇଛି। ସୋମବାର ବିଦେଶୀ ପୋର୍ଟଫୋଲିଓ ନିବେଶକମାନେ ୩,୧୩୮ କୋଟି ଟଙ୍କା ନିବେଶ କରିଛନ୍ତି। କେବଳ ସିଓଲକୁ ଛାଡି ଏସିଆର ଅନ୍ୟ ପ୍ରମୁଖ ଶେୟାର ବଜାରଗୁଡିକର କାରବାର ବେଶ୍ ଉନ୍ନତ ରହିଛି। ସେହିଭଳି ୟୁରୋପ ଶେୟାର ବଜାର ମଧ୍ୟ ଉନ୍ନତ ରହିଥିବା ଜଣାପଡ଼ିଛି।
