ଥିରୁଭାନନ୍ତପୁରମ,୧୨।୧: ଭାରତୀୟ ବୋଲର ଏସ ଶ୍ରୀସନ୍ଥ ୭ ବର୍ଷ ପରେ କ୍ରିକେଟ ପଡ଼ିଆକୁ ଫେରିଛନ୍ତି। ସୟଦ ମୁସ୍ତାକ ଅଲି ଟ୍ରଫିରେ ସେ କେରଳ ପକ୍ଷରୁ ଖେଳୁଛନ୍ତି। କେରଳ ଦଳର ପେସ୍ ଆକ୍ରମଣର ନେତୃତ୍ୱ ନେଇଥିବା ଶ୍ରୀସନ୍ଥ ପୁଡୁଚେରୀ ବିପକ୍ଷରେ ଚାରି ଓଭରରେ ୨୯ ରନ୍ ଦେଇ ଗୋଟିଏ ଉଇକେଟ ନେଇଥିଲେ। ସେ ପୁଡୁଚେରୀ ବ୍ୟାଟ୍ସମ୍ୟାନ ଫାବିଦ ଅହମ୍ମଦଙ୍କୁ ଆଉଟ କରିଥିଲେ। ଉଇକେଟ ନେବା ପରେ ଶ୍ରୀସନ୍ଥ ଭାବପ୍ରବଣ ହୋଇଥିଲେ। ମ୍ୟାଚ ଫିକ୍ସିଂ ଅଭିଯୋଗ ଉପରେ ୭ ବର୍ଷର ପ୍ରତିବନ୍ଧକ ସାମ୍ନା କରିବା ପରେ ଶ୍ରୀସନ୍ଥଙ୍କ ଏହା ହେଉଛି ପ୍ରଥମ ଟୁର୍ନାମେଣ୍ଟ। ଆଇପିଏଲରେ ସ୍ପଟ ଫିକ୍ସିଂରେ ସମ୍ପୃକ୍ତ ଥିବା ଅଭିଯୋଗରେ କ୍ରିକେଟ ବୋର୍ଡ ଅଫ ଇଣ୍ଡିଆ (ବିସିସିଆଇ) ଦ୍ୱାରା ଶ୍ରୀସନ୍ଥଙ୍କୁ ବାସନ୍ଦ କରାଯାଇଥିଲା। ଏହି ମ୍ୟାଚରେ ୩୭ ବର୍ଷୀୟ ଦ୍ରୁତ ବୋଲର ଶ୍ରୀସନ୍ଥ ସମ୍ପୂର୍ଣ୍ଣ ଆକ୍ରମଣାତ୍ମକ ଦେଖାଯାଉଥିଲେ। ସେ ଦ୍ୱିତୀୟ ଓଭରରେ ଗୋଟିଏ ଉଇକେଟ ନେଇଥିଲେ। ଏହାପରେ ଶ୍ରୀସନ୍ଥ ମଧ୍ୟ କ୍ରିଜକୁ ଛୁଇଁ ପ୍ରଣାମ କରିଥିଲେ। ଆନ୍ତର୍ଜାତୀୟ କ୍ରିକେଟରେ ନିଷେଧ ହେବା ପୂର୍ବରୁ ଶ୍ରୀସନ୍ଥ ୨୭ଟି ଟେଷ୍ଟରେ ୮୭ ଉଇକେଟ ନେଇଛନ୍ତି ଏବଂ ୫୩ଟି ଦିନିକିଆରେ ୭୫ ଉଇକେଟ ନେଇଛନ୍ତି।
