ମୁମ୍ବାଇ, ୨୬ା୬: ଇମର୍ଜେନ୍ସି ସମୟରେ ଗିରଫ ହୋଇ ଜେଲ୍ ଯାଇଥିବା ବ୍ୟକ୍ତିଙ୍କୁ ପେନ୍ସନ୍ ପ୍ରଦାନ କରାଯାଇ ସେମାନଙ୍କୁ ସମ୍ମାନିତ କରାଯିବ ବୋଲି ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ୍ କହିଛନ୍ତି। ବିଧାନସଭାରେ ପ୍ରଶ୍ନକାଳ ସମୟରେ ସେ କହିଛନ୍ତି ଯେ, ବିନା ଦୋଷରେ ଗିରଫ ହୋଇ ବହୁ ଲୋକ ଚାକିରି ହରାଇଥିଲେ। ସେମାନଙ୍କ ମଧ୍ୟରୁ ଅନେକ ଏବେ ଗରିବ। ତେଣୁ ସେମାନଙ୍କୁ ପେନ୍ସନ ଯୋଗାଇ ଦିଆଯିବ ବୋଲି ସରକାର ନିଷ୍ପତ୍ତି ନେଇଥିବା ସେ ପ୍ରକାଶ କରିଛନ୍ତି। ଏଥିଲାଗି ୩,୨୬୭ ଆବେଦନକୁ ଗ୍ରହଣ କରାଯାଇଛି। ଏହାକୁ ଜିଲାପାଳଙ୍କ ନେତୃତ୍ୱରେ ଗଠିତ କମିଟି ତଦାରଖ କରିବା ପରେ ବିଚାର କରାଯିବ। ଏହି ପେନ୍ସନ ଲାଗି ୪୨ କୋଟି ଟଙ୍କାର ବଜେଟ୍ ଚୂଡାନ୍ତ ହୋଇଥିବା ଜଣାପଡ଼ିଛି। ଇମର୍ଜେନ୍ସି ବେଳେ ମାସେ ଜେଲ୍ ଯାଇଥିବା ବ୍ୟକ୍ତିଙ୍କୁ ମାସିକ ୫ ହଜାର ଟଙ୍କା ଓ ମାସାଧିକ କାଳ ଜେଲ୍ ଯାଇଥିବା ବ୍ୟକ୍ତିଙ୍କୁ ମାସିକ ୧୦ ହଜାର ଟଙ୍କାର ପେନ୍ସନ ଯୋଗାଇ ଦେବାକୁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି। ଜେଲରେ ରହି ମୃତ୍ୟୁବରଣ କରିଥିବା ବ୍ୟକ୍ତିଙ୍କ ନିକଟ ସମ୍ପର୍କୀୟଙ୍କୁ ମାସିକ ୨,୫୦୦ରୁ ୫୦୦୦ ଟଙ୍କା ମିଳିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
