ଫୁଲବାଣୀ ଅଫିସ,୮।୧: କନ୍ଧମାଳ ଜିଲାର ବିଭିନ୍ନ ଜଙ୍ଗଲରେ ମାଓବାଦୀମାନେ ନିଜ ଗତିବିଧି ଜାରି ରଖିଛନ୍ତି। ବିଭିନ୍ନ ସମୟରେ ଯବାନ ଏବଂ ମାଓବାଦୀ ମୁହାଁମୁହିଁ ହେଉଛନ୍ତି। ଗୁରୁବାର ଚକାପାଦ ଥାନା ଲେଙ୍ଗେରିମୁଣ୍ଡା ଗ୍ରାମ ନିକଟବର୍ତ୍ତୀ ଜଙ୍ଗଲରେ ଯବାନ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଏପରି କି ମାଓବାଦୀମାନେ ଯବାନଙ୍କ ଉପରକୁ ଗ୍ରେନେଡ ମାଡ଼ କରିଥିଲେ। ହେଲେ ଯବାନ ଏହାର ଉଚିତ ଜବାବ ଦେଇଥିଲେ। ଏହାର ମୁକାବିଳା କରି ନ ପାରି ମାଓବାଦୀମାନେ ଛତ୍ରଭଙ୍ଗ ଦେଇଥିଲେ ବୋଲି ଏସ୍ପି ଭିନୀତ ଅଗ୍ରୱାଲ ଶୁକ୍ରବାର ଜିଲା ପୋଲିସ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଗୁଳି ବିନିମୟ ପରେ ଜବାନଙ୍କ ସର୍ଚ୍ଚ ଅପରେଶନ ଆରମ୍ଭ ହୋଇଥିଲା। ଯବାନମାନେ ଏକ ମାଓବାଦୀ କ୍ୟାମ୍ପ ଠାବ କରିଥିଲେ। ସେଠାରୁ ଡିଟୋନେଟର, ହ୍ୟାଣ୍ଡ ଗ୍ରେନେଡ, ବିସ୍ଫୋରକ ସାମଗ୍ରୀ, ବିଦ୍ୟୁତ୍ ସରଞ୍ଜାମ, ଔଷଧ, ବ୍ୟାଟେରି, ଲିଫ୍ଲେଟ ଆଦି ଜବତ କରାଯାଇଥିବା ସେ ସୂଚନା ଦେଇଥିଲେ। ଘଟଣାସ୍ଥଳରେ ୧୫ରୁ ୨୦ ମାଓବାଦୀ ଥିବା ଅନୁମାନ କରାଯାଉଛି। ମାଓବାଦୀମାନେ ଓଡ଼ିଶା ଷ୍ଟେଟ କ୍ୟାଡରର ଥିଲେ। ବର୍ତ୍ତମାନ ସୁଦ୍ଧା ସେମାନେ କେଉଁ ଗ୍ରୁପ୍ର ତାହା ଚିହ୍ନଟ କରଯାଇ ନାହିଁ ବୋଲି ଏସ୍ପି କହିଛନ୍ତି।
