ସିଡନୀ,୭।୧: ସିଡନୀ କ୍ରିକେଟ ଗ୍ରାଉଣ୍ଡରେ (ଏସସିଜି) ଅଷ୍ଟ୍ରେଲିଆ ବିପକ୍ଷରେ ଖେଳାଯାଉଥିବା ତୃତୀୟ ଟେଷ୍ଟ ମ୍ୟାଚ ପୂର୍ବରୁ ଟିମ ଇଣ୍ଡିଆର ଦ୍ରୁତ ବୋଲର ମହମ୍ମଦ ସିରାଜ ଜାତୀୟ ସଂଗୀତରେ ଭାବପ୍ରବଣ ହୋଇଥିଲେ। ସିରାଜ ତାଙ୍କ ଭାବନାକୁ ନିୟନ୍ତ୍ରଣ କରିପାରି ନ ଥିଲେ ଏବଂ ତାଙ୍କ ଆଖିରୁ ଲୁହ ବାହାରୁଥିଲା। କ୍ରିକେଟ ଅଷ୍ଟ୍ରେଲିଆର ମହମ୍ମଦ ସିରାଜଙ୍କ ଏହି ଭିଡିଓକୁ ନିଜ ଟୁଇଟର ହ୍ୟାଣ୍ଡେଲରେ ଶେୟାର କରିଛି। ସୂଚନାଯୋଗ୍ୟ,ମହମ୍ମଦ ସିରାଜ ତାଙ୍କର ଦ୍ୱିତୀୟ ଟେଷ୍ଟ ମ୍ୟାଚ ଖେଳୁଛନ୍ତି। ମେଲବୋନର୍ର୍ରେ ସିରାଜ ତାଙ୍କର ଟେଷ୍ଟ ଡେବ୍ୟୁ କରିଥିଲେ। ଅଷ୍ଟ୍ରେଲିଆ ଗସ୍ତ ସମୟରେ ତାଙ୍କ ପିତାଙ୍କର ମୃତ୍ୟୁ ହୋଇଥିଲା, କିନ୍ତୁ ସେ ଭାରତକୁ ଫେରିପାରି ନ ଥିଲେ। ଆଘାତ କାରଣରୁ ଟିମ ଇଣ୍ଡିଆରୁ ବାହାରିଥିବା ମହମ୍ମଦ ଶାମିଙ୍କ ସ୍ଥାନରେ ଦ୍ରୁତ ବୋଲର ମହମ୍ମଦ ସିରାଜଙ୍କୁ ଡେବ୍ୟୁ କରିବାର ସୁଯୋଗ ମିଳିଥିଲା। ମେଲବୋନର୍ର୍ରେ ସିରାଜ ମୋଟ ୫ଟି ଉଇକେଟ ନେଇଥିଲେ। ୨୦୧୩ରେ ମହମ୍ମଦ ଶାମିଙ୍କ ପରେ ସେ ପ୍ରଥମ ଭାରତୀୟ ବୋଲର ହୋଇଥିଲେ ଯିଏକି ତାଙ୍କର ପ୍ରଥମ ମ୍ୟାଚରେ ୫ଟି ଉଇକେଟ ନେଇଥିଲେ। ୨୦୧୩ରେ ୱେଷ୍ଟଇଣ୍ଡିଜ ବିପକ୍ଷରେ ଶାମି ୯ ଉଇକେଟ ନେଇଥିଲେ। ହାରାହାରି ୨୩.୪୪ରେ ୩୮ଟି ପ୍ରଥମ ଶ୍ରେଣୀ ମ୍ୟାଚ ରେ ସିରାଜ ୧୫୨ ଉଇକେଟ ନେଇଛନ୍ତି। ଅଷ୍ଟ୍ରେଲିଆରେ କରୋନା ପ୍ରୋଟୋକଲ ହେତୁ ମହମ୍ମଦ ସିରାଜ ଶେଷ ମୁହୂର୍ତ୍ତରେ ମଧ୍ୟ ତାଙ୍କ ପିତାଙ୍କୁ ଦେଖା କରିବାକୁ ଭାରତ ଆସିପାରି ନ ଥିଲେ। ପିତାଙ୍କ ମୃତ୍ୟୁ ସତ୍ତ୍ୱେ ପରିବାରଠାରୁ ଦୂରରେ ଥିବା ଭାରତୀୟ ଦ୍ରୁତ ବୋଲର ମହମ୍ମଦ ସିରାଜ କହିଛନ୍ତି ଯେ, ଅଧିନାୟକ ବିରାଟ କୋହଲିଙ୍କ ଶକ୍ତିଶାଳୀ ହେବାକୁ ପରାମର୍ଶ ତାଙ୍କୁ ଅଷ୍ଟ୍ରେଲିଆ ବିପକ୍ଷ କଡ଼ା ସିରିଜ ପ୍ରସ୍ତୁତିରେ ବହୁତ ସାହାଯ୍ୟ କରିଛି।
