ଲକ୍ଷ୍ନୌ,୧।୧- ଦୁଇ ବର୍ଷ ତଳେ ଚୋରି ହୋଇଥିବା କାର୍ ମାଲିକଙ୍କୁ ହଠାତ୍ ଏକ ଅଟୋ ସର୍ଭିସିଂ ସେଣ୍ଟରରୁ କଲ୍ ଆସିଥିଲା। ଫିଡ୍ବ୍ୟାକ୍ ପାଇଁ କରାଯାଇଥିବା ଫୋନକଲରେ ସର୍ଭିସିଂ ପରେ କାରକୁ ବିଥୁର ପୋଲିସ ଷ୍ଟେଶନର ଅଫିସର କୌଶଳେନ୍ଦ୍ର ପ୍ରତାପ ସିଂଙ୍କ ନିକଟକୁ ପଠାଇ ଦିଆଯାଇଛି ବୋଲି ସର୍ଭିସ ସେଣ୍ଟର ପକ୍ଷରୁ କୁହାଯାଇଥିଲା।
ଉଲ୍ଲେଖଥାଉ କି, ଗତ ଜୁଲାଇରେ ଗ୍ୟାଙ୍ଗଷ୍ଟର ବିକାଶ ଦୁବେ ଓ ତା ସାଥିଙ୍କ ଆକ୍ରମଣରେ ଆହତ ହୋଇଥିଲେ କୌଶଳେନ୍ଦ୍ର। ଏହି ଘଟଣାରେ ପ୍ରାଣ ହରାଇଥିଲେ ୮ ଜଣ ପୋଲିସ କର୍ମୀ। ସର୍ଭିସିଂ କରାଇବାକୁ ନେଇ ନ ଥିଲେ କୌଶଳେନ୍ଦ୍ର ଉକ୍ତ ଚୋରି ହୋଇଥିବା କାରକୁ ବ୍ୟବହାର କରିଥାନ୍ତେ। କାର ମାଲିକ ଓମେନ୍ଦ୍ର ସୋନିଙ୍କ କହିବା ଅନୁଯାୟୀ, ୨୦୧୮ ଡିସେମ୍ବର ୩୧ ତାରିଖରେ ବାରା ଅଞ୍ଚଳର ଏକ କାର ଓ୍ବାଶିଂ ସେଣ୍ଟରରୁ ଚୋରି ହୋଇଥିଲା ତାଙ୍କ ଓ୍ବାଗନର କାର। ଏ ନେଇ ବାରା ଥାନାରେ ଏଫ୍ଆଇଆର ମଧ୍ୟ ଦାୟର କରିଥିଲେ ହେଲେ କାର୍ ମିଳି ନ ଥିଲା।
ସର୍ଭିସିଂ ପରେ କାରର କଣ୍ଡିସନ ସମ୍ପର୍କରେ ଜାଣିବା ପାଇଁ କେଟିଏଲ ସର୍ଭିସ ସେଣ୍ଟର ପକ୍ଷରୁ ଗତ ବୁଧବାର ଓମେନ୍ଦ୍ରଙ୍କୁ ଫୋନ ଯାଇଥିଲା। ସବୁ କିଛି ଜାଣିବା ପରେ ଉକ୍ତ ପୋଲିସ କାହିଁକି କାରକୁ ଫେରାଇ ନ ଥିଲେ ବୋଲି ଅଭିଯୋଗ କରିଥିଲେ। ନିଜ ପତିକ୍ରିୟାରେ ସିଂ କହିଛନ୍ତି, କାରଟି ତାଙ୍କୁ ଏକ ପରିତ୍ୟକ୍ତ ସ୍ଥାନରୁ ମିଳିଥିଲା। ସୂଚନା ଥାଉକି, ଜବତ ହୋଇଥିବା ଯାନକୁ ପୋଲିସ ବ୍ୟବହାର କରିପାରିବ ନାହିଁ। ନିୟମ ଅନୁଯାୟୀ କାର ମିଳିବା ପରେ ବିଥୁର ପୋଲିସ ବାରା ଥାନାକୁ ଏ ସମ୍ପର୍କରେ ସୂଚନା ଦେଇଥାନ୍ତା। ତେବେ କାର ସମ୍ପର୍କରେ ବିଥୁର ପୋଲିସ କୌଣସି ପ୍ରକାର ସୂଚନା ଦେଇ ନ ଥିବା ବାରା ଥାନା ଅଧିକାରୀ କହିଛନ୍ତି। ଏ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି।
