ନୂଆଦିଲ୍ଲୀ: ଖୋଲା ବଜାରରୁ ୫ ରାଜ୍ୟ ଅତିରିକ୍ତ ଋଣ ଉଠାଇବେ। ଏହି ରାଜ୍ୟଗୁଡ଼ିକ ମଧ୍ୟରେ ଆନ୍ଧ୍ରପ୍ରଦେଶ, କର୍ନାଟକ, ମଧ୍ୟପ୍ରଦେଶ, ତାମିଲନାଡୁ ଏବଂ ତେଲଙ୍ଗାନା ରହିଛନ୍ତି। ୧୬,୭୨୮ କୋଟି ଟଙ୍କାର ଅତିରିକ୍ତ ଋଣ ଉଠାଣ ନେଇ ଏହି ରାଜ୍ୟଗୁଡ଼ିକୁ ଅନୁମତି ମିଳିଛି। ଇଜ୍ ଅଫ୍ ଡୁଇଂ ବିଜ୍ନେସକୁ ବଢାଇବା ଲାଗି ସଂସ୍କାର ପ୍ରକ୍ରିୟା ତ୍ୱରାନ୍ବିତ ଦିଗରେ ଏଭଳି ପଦକ୍ଷେପ ସହାୟକ ହେବ ବୋଲି ଅର୍ଥମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। କରୋନା ମହାମାରୀ ପାଇଁ ରାଜ୍ୟଗୁଡିକ ସମ୍ବଳ ଯୋଗାଣ ଦିଗରେ ବିଭିନ୍ନ ସମସ୍ୟା ସାମ୍ନା କରୁଛନ୍ତି। ଚଳିତ ବର୍ଷ ମେ ମାସରେ ସରକାର ରାଜ୍ୟଗୁଡିକର ଋଣ ନିୟମରେ ପରିବର୍ତ୍ତନ କରିଛନ୍ତି। ରାଜ୍ୟ ସେମାନଙ୍କ ମୋଟ ଘରୋଇ ଉତ୍ପାଦ(ଏସ୍ଜିଡିପି)ର ଅତିରିକ୍ତ ୨% ଋଣ ଉଠାଇପାରିବେ ବୋଲି ସରକାର କହିଥିଲେ। ଲୋକାଭିମୁଖୀ ଯୋଜନା ଗ୍ରହଣ କରୁଥିଲେ ରାଜ୍ୟ ଏହାର ବ୍ୟବହାର କରିପାରିବେ।
ଓ୍ବାନ୍ ନେଶନ ଓ୍ବାନ୍ ରାଶନ କାର୍ଡ, ଇଜ୍ ଅଫ୍ ଡୁଇଂ ବିଜନେସ, ସହରାଞ୍ଚଳ ଶାସନ ବ୍ୟବସ୍ଥା ଏବଂ ଶକ୍ତି କ୍ଷେତ୍ର ସଂସ୍କାର ଭଳି ଅନ୍ୟ କିଛି ଦିଗରେ ଏଥିରେ ଫୋକସ କରାଯାଇଛି। ଓ୍ବାନ୍ ନେଶନ ଓ୍ବାନ୍ ରାଶନ କାର୍ଡ ସିଷ୍ଟମକୁ ଏବେ ସୁଦ୍ଧା ୧୦ ରାଜ୍ୟ କାର୍ଯ୍ୟକାରୀ କରାଇଛନ୍ତି। ସେହିଭଳି ୫ ରାଜ୍ୟ ଇଜ୍ ଅଫ୍ ଡୁଇଂ ବିଜନେସ, ସ୍ଥାନୀୟ ଶାସନ ବ୍ୟବସ୍ଥା କ୍ଷେତ୍ରରେ ୨ ରାଜ୍ୟ କାର୍ଯ୍ୟପନ୍ଥା ହାତକୁ ନେଇଛନ୍ତି। ସେହିଭଳି ଅତିରିକ୍ତ ଋଣ ଉଠାଣ ବାଦ୍ ରାଜ୍ୟଗୁଡିକୁ ପୁଞ୍ଜି ଖର୍ଚ୍ଚ ଲାଗି ସହାୟତା ଯୋଗାଣ ନେଇ କେନ୍ଦ୍ର ଯୋଜନା ହାତକୁ ନେଇଛି। ପ୍ରମୁଖ ୪ ସଂସ୍କାର ମଧ୍ୟରୁ ୩ଟିକୁ ଶେଷ କରିଥିଲେ ପୁଞ୍ଜି ଖର୍ଚ୍ଚ ଲାଗି ସରକାର ସ୍ବତନ୍ତ୍ର ସୁବିଧା ଯୋଗାଇ ଦେବେ। ଏଥିଲାଗି ୨ ହଜାର କୋଟି ଟଙ୍କାର ବ୍ୟବସ୍ଥା କରାଯାଇଛି। ଲୋକାଭିମୁଖୀ ସଂସ୍କାର ପ୍ରକ୍ରିୟା କାର୍ଯ୍ୟକାରୀ କରାଇବା ନେଇ ରାଜ୍ୟ ଲାଗି ଏକ ସମୟ ସୀମା ଧାର୍ଯ୍ୟ କରାଯାଇଛି। ଚଳିତ ବର୍ଷ ଫେବୃୟାରୀ ସୁଦ୍ଧା ସଂସ୍କାର ପ୍ରକ୍ରିୟା ଗ୍ରହଣ କରିଥିଲେ ସ୍ବତନ୍ତ୍ର ପାଣ୍ଠି ଲାଭ ନେଇ ରାଜ୍ୟ ଯୋଗ୍ୟ ବିବେଚିତ ହୋଇପାରିବେ।
