ଭଞ୍ଜନଗର,୨୧।୧୧(ଡି.ଏନ.ଏ)-ଗଞ୍ଜାମ ଜିଲା ବେଲଗୁଣ୍ଠା ଫାଣ୍ଡି ପୋଲିସ ଶନିବାର ଏକ ଆନ୍ତଃଜିଲା ଲୁଟେରା ଦଳର ୪ଜଣଙ୍କୁ ଗିରଫ କରିବାରେ ସକ୍ଷମ ହୋଇଛି। ସେମାନେ ହେଲେ ବୁଗୁଡ଼ା ଥାନା ଘୋଳପୁରର ଲକ୍ଷ୍ମୀ ପାତ୍ର ତାଙ୍କ ପୁଅ ଉତ୍ତମ, ଜ୍ୱାଇଁ ପୋଚାଲୁଣ୍ଡିର ଚିରଞ୍ଜୀବି ପାତ୍ର ଏବଂ ଉତ୍ତମଙ୍କ ସମ୍ପର୍କୀୟ ଶଳା ନରସିଂହପୁର ଥାନା ରଣେଶପୁରର ଜାପାନି ପାତ୍ର। ଏମାନେ ମିଶି ଚୋରି ପାଇଁ ଯୋଜନା କରୁଥିଲେ। ଅଭିଯୁକ୍ତମାନେ ବୁଗୁଡ଼ା, ଜଗନ୍ନାଥପ୍ରସାଦ, ଭଞ୍ଜନଗର, ଶେରଗଡ଼, ଧରାକୋଟ, ବଡ଼ଗଡ଼, ପାଟପୁର ଥାନା ଅଞ୍ଚଳରେ ୧୧ଟି ଚୋରି ମାମଲାରେ ଜଡ଼ିତ ଥିବା ପୋଲିସ କହିଛି। ସେମାନଙ୍କ ଠାରୁ ପୋଲିସ ୪୫,୨୫୦ ଟଙ୍କା ସମେତ ଲୁଟ୍ ସୁନା, ରୂପା ଅଳଙ୍କାର ଜବତ କରିଛି। ଏଥିସହ ଚୋରିରେ ବ୍ୟବହୃତ ୨ଟି ସାଇକେଲ, ହାତୁଡ଼ି ସମେତ କବାଟ ଭାଙ୍ଗିବାକୁ ବ୍ୟବହାର ଲୁହାରଡ ଜବତ କରିଛି। ଅଭିଯୁକ୍ତମାନେ ଦିନବେଳା ସାଇକେଲରେ ବିଭିନ୍ନ ବ୍ୟବସାୟ ବାହାନାରେ ବୁଲିବା ପରେ ରାତିରେ ଚୋରି ପାଇଁ ଯୋଜନା କରୁଥିଲେ। ଅଭିଯୁକ୍ତମାନେ ପ୍ରାୟ ଦେଢ଼ ବର୍ଷ ହେବ ଏଭଳି କରୁଥିବା ଜେରାବେଳେ ଜଣାପଡ଼ିଛି। ଏହି ଲୁଟେରା ଗ୍ୟାଙ୍ଗରେ ଆଉ କିଛି ସଦସ୍ୟ ଜଡ଼ିତ ଥିବା ଅନୁମାନ କରାଯାଉଛି। ସେମାନଙ୍କୁ ଗିରଫ ପାଇଁ ପୋଲିସ ଚେଷ୍ଠା ଚଳାଇଥିବା ଫାଣ୍ଡି ଅଧିକାରୀ ପ୍ରକାଶ କୁମାର ସାହୁ ସୂଚନା ଦେଇଛନ୍ତି।
