ଭୁବନେଶ୍ୱର,୫।୧୧(ବ୍ୟୁରୋ): ବାଲେଶ୍ୱର ଏବଂ ତିର୍ତ୍ତୋଲ ବିଧାନସଭା ଉପନିର୍ବାଚନରେ ମତଦାନ ହାର କମିଛି। ଗତ ୩ ତାରିଖରେ ହୋଇଥିବା ଉପନିର୍ବାଚନରେ ବାଲେଶ୍ୱରରେ ୭୦.୬୯ ପ୍ରତିଶତ ମତଦାନ ହୋଇଥିବା ବେଳେ ତିର୍ତ୍ତୋଲରେ ୬୯.୬୬ ପ୍ରତିଶତ ହୋଇଛି। ୨୦୧୯ ସାଧାରଣ ନିର୍ବାନରେ ବାଲେଶ୍ୱର ବିଧାନସଭା ପାଇଁ ୭୧.୨୯ ପ୍ରତିଶତ ମତଦାନ ହୋଇଥିବା ବେଳେ ତିର୍ତ୍ତୋଲରେ ୭୪.୦୯ ପ୍ରତିଶତ ହୋଇଥିଲା। ବୁଧବାର ଆୟୋଜିତ ଏକ ଖବରଦାତା ସମ୍ମିଳନୀରେ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ ଏହି ସୂଚନା ଦେଇଛନ୍ତି। କୋଭଡ୍-୧୯ କଟକଣା ମଧ୍ୟରେ ଅନୁଷ୍ଠିତ ଏହି ଉପନିର୍ବାଚନରେ ତିର୍ତ୍ତୋଲ ବିଧାନସଭା ପାଇଁ ୩୧୯୩ ଜଣ ପୋଷ୍ଟାଲ ବାଲଟରେ ମତଦାନ ସାବ୍ୟସ୍ତ କରିଥିବା ବେଳେ ବାଲେଶ୍ୱରରେ ୧୬୩୧ ଭୋଟର ସେମାନଙ୍କ ମତଦାନ କରିଛନ୍ତି। କୋଭିଡ୍ ସଂକ୍ରମିତ ଭୋଟରଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରାଯାଇଥିଲା। ଉଭୟ ନିର୍ବାଚନ ମଣ୍ଡଳୀର ସମୁଦାୟ ୧୬୧ କୋଭିଡ୍ ସଂକ୍ରମିତ/ ସନ୍ଦିଗ୍ଧ କୋଭିଡ୍ ଭୋଟର ମତଦାନ ସାବ୍ୟସ୍ତ କରିଥିଲେ। ସେମାନଙ୍କ ମଧ୍ୟରୁ ତିର୍ତ୍ତୋଲ ନିର୍ବାଚନ ମଣ୍ଡଳୀର ୧୨୭ ଓ ବାଲେଶ୍ୱର ସଦର ନିର୍ବାଚନ ମଣ୍ଡଳୀର ୩୪ କରୋନା ସଂକ୍ରମିତ ମତଦାନ କରିଛନ୍ତି।
ଆସନ୍ତା ୧୦ ତାରିଖରେ ଉଭୟ ବିଧାନସଭା ପାଇଁ ଭୋଟ ଗଣତି ହେବ। ଭୋଟବାକ୍ସଗୁଡିକୁ ବାଲେଶ୍ୱର ଜିଲାପାଳଙ୍କ ଇଭିଏମ୍ ୱେର୍ ହାଉସରେ ଏବଂ ତିର୍ତ୍ତୋଲ ବିଧାନସଭା ଭୋଟବାକ୍ସଗୁଡିକ ଜଗତ୍ସିଂହପୁର ଏସ୍ଭିଏମ୍ କଲେଜରେ କଡ଼ା ସୁରକ୍ଷା ବଳୟରେ ରଖାଯାଇଥିବା ମୁଖ୍ୟ ନିର୍ବାଚନ ଅଧିକାରୀ ସୂଚନା ଦେଇଛନ୍ତି। କେନ୍ଦ୍ରୀୟ ସୁରକ୍ଷା ବଳ ଓ ରାଜ୍ୟ ପୋଲିସ ଷ୍ଟ୍ରଙ୍ଗରୁମ୍ଗୁଡିକ ଜଗି ରହିଛନ୍ତି। ଷ୍ଟ୍ରଙ୍ଗରୁମ୍ଗୁଡିକୁ ୨୪ ଘଣ୍ଟା ସିସିଟିଭି ନଜରରେ ରଖାଯାଇଛି। ଏଥିସହିତ ରାଜନୈତିକ ଦଳର ପ୍ରତିନିଧିମାନେ ମଧ୍ୟ ଏହା ଉପରେ ନଜର ରଖିଛନ୍ତି। କୋଭିଡ୍-୧୯ ମହାମାରୀ ସମୟରେ ଭୋଟ ଗ୍ରହଣ ଶାନ୍ତି ଶୃଙ୍ଖଳାର ସହ ସମାପନ ହୋଇଛି। ଜିଲା ପ୍ରଶାସନ, ରାଜନୈତିକ ଦଳ, ପ୍ରାର୍ଥୀ, ଆଶାକର୍ମୀ, ସ୍ବେଚ୍ଛାସେବୀ, ବିଏଲ୍ଓ, ପୋଲିସ ଅଧିକାରୀ, ସୁରକ୍ଷା ବାହିନୀଙ୍କ ସହଯୋଗ ଯୋଗୁ ଏହା ସମ୍ଭବ ହୋଇଛି ବୋଲି ଲୋହାନୀ କହିଛନ୍ତି। ନିର୍ବାଚନ ମଣ୍ଡଳୀର ଭୋଟର ତଥା ଜନସାଧାରଣଙ୍କ ମଧ୍ୟରେ ନିର୍ବାଚନ ସମ୍ପର୍କିତ ଖବର ପରିବେଷଣ ଓ ସଚେତନତା ସୃଷ୍ଟି କରିଥିବାରୁ ଲୋହାନୀ ଗଣମାଧ୍ୟମକୁ ପ୍ରଶଂସା କରିଛନ୍ତି।
