କାମାକ୍ଷାନଗର, ୨୫।୧୦ (ସୁଧୀର କୁମାର ପରିଡ଼ା): ମା’ ଆସିଛନ୍ତି। ମଣ୍ଡପରେ ଚାଲିଛି ପୂଜାର୍ଚ୍ଚନା। ହେଲେ କାହାରି ମନରେ ଅଛି ଉତ୍ସାହ ନା ଉଦ୍ଦୀପନା। ଦେବୀ-ଶ୍ରଦ୍ଧାଳୁଙ୍କ ମଧ୍ୟରେ ପଡ଼ିଥିବା କରୋନା କଟକଣାର ପାଚେରି ଚଳିତବର୍ଷ ଶାରଦୀୟ ମହୋତ୍ସବକୁ ସରସହୀନ କରିଦେଇଛି। ଭକ୍ତଶୂନ୍ୟ ମଣ୍ଡପରେ ପରଦା ଆଢୁଆଳରେ ମା’ ଦଶଭୁଜାଙ୍କ ଆବାହନ ଚାଲିଥିବାବେଳେ ଦର୍ଶନରୁ ବଞ୍ଚତ୍ତ ହୋଇଛନ୍ତି ଶ୍ରଦ୍ଧାଳୁ, ଯାହା ଛଡ଼ାଇ ନେଇଛି ଦୁର୍ଗାପୂଜାର ସରାଗ।
ଢେଙ୍କାନାଳ ଜିଲା କାମାକ୍ଷାନଗରର ଗଣପର୍ବ ଦଶହରା କରୋନା ମାଡ଼ରେ ଫିକା ପଡ଼ିଛି। ମୁଣ୍ଡିଦେଉଳି, ଜଗନ୍ନାଥ ବଜାର, ତରୁଣବଜାର, ଲକ୍ଷ୍ମୀବଜାର, ମେନ୍ରୋଡ୍, ଗୋପବନ୍ଧୁ ବଜାର, ହନୁମାନ ବଜାର, ବାବା ବଜାର, ତ୍ରିନାଥ ବଜାର, କଲେଜ ରୋଡ୍, ଇଲେକ୍ଟ୍ରି ଅଫିସ ଛକ, ମହାବୀର ବଜାର (ଜିରିଡ଼ାମାଳି), ରାଧାକୁଞ୍ଜସାହି, ତାରିଣୀ ବଜାର ଗଣେଶ ବଜାର ଆଦି ୧୪ ମଣ୍ଡପରେ ମା’ ଦୁର୍ଗାଙ୍କ ପୂଜାର୍ଚ୍ଚନା କରାଯାଉଛି। ହେଲେ ସରକାରୀ ଗାଇଡ୍ଲାଇନ୍ ଅନୁଯାୟୀ ମଣ୍ଡପ ସାମ୍ନାରେ ପାଲ ଟଙ୍ଗାଇ ଦିଆଯାଇଛି। ଭିଡ଼ ଜମିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରଶାସନ ଚେତାଇଥିବାବେଳେ ଏହାକୁ ନେଇ ସତର୍କତା ଅବଲମ୍ବନ କରିଛନ୍ତି ପୂଜା କମିଟି କର୍ମକର୍ତ୍ତା। ଯେପରି କଟକଣା ଭଙ୍ଗ ନ ହୁଏ ସେଥିପ୍ରତି ପୋଲିସ ସତର୍କ ଦୃଷ୍ଟି ରଖିଛି। ମହାଷ୍ଟମୀରେ ପୂଜା ପାଇଁ କେତେଜଣ ମହିଳା ଶ୍ରଦ୍ଧାଳୁ ମଣ୍ଡପ ନିକଟକୁ ଆସିଥିଲେ ମଧ୍ୟ ସେମାନଙ୍କୁ ସୁଯୋଗ ଦିଆଯାଇ ନ ଥିଲା। ଫଳରେ ସେମାନେ ଲୁହ ଛଳଛଳ ଆଖିରେ ନିରାଶରେ ଫେରିଯାଉଥିବା ଦେଖିବାକୁ ମିଳିଥିଲା।
ସୂଚନାଯୋଗ୍ୟ, ୧୯୫୬ରେ ପଡ଼ିଥିବା ଭୟଙ୍କର ହଇଜାରୁ ରକ୍ଷା ପାଇବା ଲାଗି ମୁଣ୍ଡିଦେଉଳିଠାରେ କେତେଜଣ ଅଞ୍ଚଳବାସୀ ଛାମୁଡ଼ିଆ କରି ମା’ଙ୍କ ଆବାହନ କରିଥିଲେ। ସେହିଦିନଠାରୁ ନିରବଚ୍ଛିନ୍ନ ଭାବେ ପୂଜା ଆୟୋଜନ କରାଯାଉଛି। ଯାଜପୁର, ଅନୁଗୋଳ, କେନ୍ଦୁଝର, ଦେବଗଡ଼ ଜିଲାର ଲୋକେ କଟକ ନ ଯାଇ କାମାକ୍ଷାନଗର ଆସି ପୂଜାର ମଜା ନେଉଥିଲେ। ତେବେ ଦୀର୍ଘ ୬୪ବର୍ଷ ପରେ ପ୍ରଥମ ଥର ଏପରି ବ୍ୟତିକ୍ରମ ଦେଖାଦେଇଥିବାବେଳେ ପରମ୍ପରା ଭାଙ୍ଗିଛି। ସେହିପରି ସଂକ୍ରମଣ ଭୟ ଲାଗି ରହିଥିବାରୁ ଚଳିତବର୍ଷ ମିଳିତ ଭସାଣି ଉତ୍ସବ, ରାବଣପୋଡ଼ି, ଆତସବାଜି ପ୍ରତିଯୋଗିତା ସମ୍ପୂର୍ଣ୍ଣ ବନ୍ଦ ରଖାଯାଇଛି।
ଏଭଳି ବ୍ୟତିକ୍ରମ କେବେ ହୋଇନି
ଦୀର୍ଘ ୪୦ ବର୍ଷ ହେଲା ମୁଣ୍ଡିଦେଉଳି ପୂଜା କମିଟି ଦାୟିତ୍ୱ ନିର୍ବାହ କରିଆସୁଛି। ବାତ୍ୟା, ବନ୍ୟା ହେଲେ ବି ଶ୍ରଦ୍ଧାଳୁମାନେ ମା’ଙ୍କ ଦର୍ଶନ କରିବାକୁ ଆସିଥାନ୍ତି। ଚଳିତବର୍ଷର ବ୍ୟତିକ୍ରମ କେବେ ହୋଇ ନ ଥିଲା। ମା’ଙ୍କ ଆଶୀର୍ବାଦ ରହିଲେ ସବୁକିଛି ଠିକ୍ ହୋଇଯିବ।
-ଆଦିତ୍ୟ ପ୍ରସାଦ କର,
ମୁଣ୍ଡିଦେଉଳି ପୂଜା କମିଟିର ବରିଷ୍ଠ କର୍ମକର୍ତ୍ତା
ଆଗାମୀ ବର୍ଷକୁ ଅପେକ୍ଷା
କାମାକ୍ଷାନଗରରେ ଅନୁଷ୍ଠିତ ରାବଣପୋଡ଼ି ଉତ୍ସବ ଏବଂ ଆତସବାଜି କାର୍ଯ୍ୟକ୍ରମ ବେଶ୍ ଚିତ୍ତାକର୍ଷକ। ଏହାକୁ ଦେଖିବାକୁ ହଜାର ହଜାର ଲୋକଙ୍କ ସମାଗମ ହୋଇଥାଏ। ହେଲେ ଚଳିତବର୍ଷ ରାବଣ ପୋଡ଼ି ହେବନାହିଁ। ପୂଜା ଉତ୍ସବ ଲାଗି ଆସନ୍ତା ବର୍ଷକୁ ଅପେକ୍ଷା କରିବାକୁ ପଡ଼ିବ।
-ଶୁଭ୍ରାଂଶୁ ମହାନ୍ତି,
କାମାକ୍ଷାନଗର ରାବଣପୋଡ଼ି କମିଟି ସଦସ୍ୟ
ବ୍ୟବସାୟ ୭୦% କମିଛି
ବର୍ଷକର ବ୍ୟବସାୟ ମଧ୍ୟରୁ କେବଳ ଦଶହରାରେ ଅଧା ହୋଇଥାଏ। ଲୋକମାନଙ୍କ ମଧ୍ୟରେ ନୂଆ ପୋଷାକ, ବିଭିନ୍ନ ସାମଗ୍ରୀ କିଣିବାକୁ ଉତ୍ସାହ ଥାଏ। କିନ୍ତୁ ଚଳିତବର୍ଷ କଟକଣା ଯୋଗୁ ଶ୍ରଦ୍ଧାଳୁ ଆସୁନାହାନ୍ତି। ପାର୍ବଣରେ ବିକ୍ରି ହେବା ଆଶାରେ ଅଧିକ ସାମ୍ରଗୀ ମଧ୍ୟ ଆସିଛି। କିନ୍ତୁ ଆଶା ଅନୁଯାୟୀ ବେପାର ନ ହେବାରୁ ବ୍ୟବସାୟ ହାରାହାରି ୭୦% କମିଛି।
-ଦୀପକ ଖେମ୍କା, ବ୍ୟବସାୟୀ
ପ୍ରତି ମଣ୍ଡପରେ ପୋଲିସ
ପ୍ରଥମେ ଜୀବନ, ତା’ ପରେ ଜୀବିକା। ଏକଥା ଚିନ୍ତା କରି ସରକାର କଟକଣା ଭିତ୍ତିରେ ପୂଜା କରିବାକୁ ନିର୍ଦ୍ଦେଶନାମା ଜାରି କରିଛନ୍ତି। ଭିଡ଼ ଏଡ଼ାଇବାକୁ ପ୍ରତି ମଣ୍ଡପରେ ପୋଲିସ ମୁତୟନ କରାଯାଇଛି। ଶ୍ରଦ୍ଧାଳୁଙ୍କ ଦର୍ଶନ ବାରଣ କରାଯାଇଛି।
-ଅଭିନବ ଡାଳୁଆ, କାମାକ୍ଷାନଗର ଥାନାଧିକାରୀ
