ନୂଆଦିଲ୍ଲୀ, ୨୧।୧୦: ଏଲ୍ଏସି ଏବଂ ଏଲ୍ଓସିରେ ଯବାନଙ୍କ ପାଖରେ ଶୀଘ୍ର ସହାୟତା ପହଞ୍ଚାଇବା ପାଇଁ ଲଦାଖ ଏବଂ କଶ୍ମୀରର ଉଚ୍ଚ ପାହାଡ଼ରେ ୧୦ ସୁଡ଼ଙ୍ଗ ନିର୍ମାଣ କରାଯିବ। ଏସବୁ ସୁଡ଼ଙ୍ଗ ପଥ ଦେଶ ଭାରତୀୟ ସେନା ବର୍ଷସାରା ଯିବା ଆସିବା କରିପାରିବେ। କେତେକ ସୁଡ଼ଙ୍ଗ ସମୁଦ୍ର ପତ୍ତନଠାରୁ ୧୭ ହଜାର ଫୁଟ ଉପରେ ନିର୍ମାଣ କରାଯିବ। ଏଥି ମଧ୍ୟରେ ଲେହକୁ ନୁବ୍ରା ଘାଟି ସହି ସଂଯୋଗ କରୁଥିବା ୭ କିମି ଲମ୍ବର ଏକ ସୁଡ଼ଙ୍ଗ ରହିଛି। ସେହିପରି ୧୭ ହଜାର ୫୮୦ ଫୁଟ ଉଚ୍ଚରେ ନିର୍ମିତ ହେବାକୁ ଥିବା ୮ କିମିର ସୁଡ଼ଙ୍ଗ କାରୁ ଏବଂ ଲଦାଖର ଟଙ୍ଗେଷ୍ଟେ ମଧ୍ୟରେ ସଂଯୋଗ ସ୍ଥାପନ କରିବ। ଏହାଦ୍ୱାରା ପୋଙ୍ଗାଙ୍ଗ ହ୍ରଦ ନିକଟରେ ସହାୟତା ସହଜରେ ପହଞ୍ଚି ପାରିବ ବୋଲି କୁହାଯାଉଛି। ଲଦାଖର ଶଙ୍କୁ-ଲା ଗିରିପଥ ଏବଂ ନିମ୍ମୁ-ଦାରଚା-ପଦମ୍ ରୋଡ ମଧ୍ୟରେ ସଂଯୋଗ ସ୍ଥାପନ କରୁଥିବା ୭ କିମି ଲମ୍ବ ସୁଡ଼ଙ୍ଗ ୧୬ ହଜାର ୭୦୩ ଫୁଟ ଉଚ୍ଚରେ ନିର୍ମିତ ହେବ। ଶ୍ରୀନଗରରେ କଶ୍ମୀର,ଲେହ ଏବଂ ଦ୍ରାସ୍ରେ ଯୋଗାଯୋଗ ପାଇଁ ୧୧ ହଜାର ୫୦୦ ଫୁଟ ଉଚ୍ଚରେ ଜୋଜିଲାଠାରେ ୧୪ କିମି ଲମ୍ବର ଏକ ସୁଡ଼ଙ୍ଗ ନିର୍ମାଣ କାର୍ଯ୍ୟ ଇତିମଧ୍ୟରେ ଆରମ୍ଭ ହୋଇ ସାରିଛି। ପୂର୍ବ ଳଦାଖର ଦୌଲତ ବେଗ୍ ଓଲ୍ଡି ଏବଂ ଡେପସାଙ୍ଗ ମଧ୍ୟରେ ଯୋଗାଯୋଗ ଲାଗି ୧୭ ହଜାର ୮୦୦ଫୁଟ ଉଚ୍ଚରେ ଏକ ସୁଡ଼ଙ୍ଗ ନିର୍ମାଣ କରାଯିବ। ରଣନୀତି ଦୃଷ୍ଟିକୋଣରୁ ଭାରତ ପାଇଁ ଏସବୁ ସୁଡ଼ଙ୍ଗ ଗୁଡ଼ିକ ବିଶେଷ ଗୁରୁତ୍ୱ ବହନ କରୁଛି। ଏହାକୁ ନେଇ ଚାଇନା ଏବଂ ପାକିସ୍ତାନର ଚିନ୍ତା ବଢ଼ିବାରେ ଲାଗିଛି।
