ଶ୍ରୀନଗର, ୧୦।୧୦: ଜମ୍ମୁ-କଶ୍ମୀରର ଭାରତ ପାକିସ୍ତାନ ନିୟନ୍ତ୍ରଣ ରେଖାରେ ଲଗାତାର ଉତ୍ତେଜନା ସୃଷ୍ଟି ହେବାରେ ଲାଗିଛି। ଆତଙ୍କବାଦୀଙ୍କୁ ଭାରତରେ ଅନୁପ୍ରବେଶ କରାଇବା ଲାଗି ପାକିସ୍ତାନ ଜାଣିଶୁଣି ଅସ୍ତ୍ରବିରତି ଉଲ୍ଲଂଘନ କରୁଥିବା ଚିନରା କର୍ପସ୍ର ଜେନେରାଲ କମାଣ୍ଡିଂ ଅଫିସର ଲ୍ୟୁଟନାଟ୍ ଜେନେରାଲ ବି.ଏସ୍. ରାଜୁ ସୂଚନା ଦେଇଛନ୍ତି। ପାକିସ୍ତାନରେ ତାଲିମପ୍ରାପ୍ତ ୨୫୦ରୁ ୩୦୦ ଆତଙ୍କବାଦୀ ଲଞ୍ଚପ୍ୟାଡ୍ରେ ଭାରତରେ ଅନୁପ୍ରବେଶ କରିବା ଲାଗି ସୁଯୋଗ ଉଣ୍ଡି ବସିଥିବା ସେ କହିଛନ୍ତି। ନିୟନ୍ତ୍ରଣ ରେଖାରେ ଏକ ବଡ଼ ଧରଣର ବେଆଇନ ବନ୍ଧୁକ ଚାଲାଣ ର଼୍ୟାକେଟର ପର୍ଦ୍ଦଫାଶ୍ ହୋଇଥିବା ସେ କହିଛନ୍ତି। ସ୍ଥାନୀୟ କେରନ ସେକ୍ଟରର ଶୁକ୍ରବାର ରାତ୍ର ୮ଟା ୩୦ରେ କିଶନ ଗଙ୍ଗା ନଦୀ ଦେଇ ଟ୍ୟୁବ୍ରେ କିଛି ବୋହି ନେଇ ଆସୁଥିବାର ସର୍ଭେଲାନ୍ସ୍ ସିଷ୍ଟମ୍ ଦ୍ୱାରା ଜଣାପଡ଼ିଥିଲା। ଏଥିରେ ୨-୩ଜଣ ଆତଙ୍କବାଦୀ ସମ୍ପୃକ୍ତ ଥିବାର ଭାରତୀୟ ସେନା ପୋଷ୍ଟ ଦେଖିପାରିଥିଲେ।
ଏହାପରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ଆତଙ୍କବାଦୀମାନେ ଭାରତୀୟ ସେନାର କାର୍ଯ୍ୟାନୁଷ୍ଠାନ ଯୋଗୁ ଖସି ପଳାଇଥିଲେ। ଘଟଣାସ୍ତଳରୁ ୪ଟି ଏକେ ୭୪ ରାଇଫଲ, ୮ ମାଗାଜିନ୍, ୨୪୦ ଏକେ ରାଇଫଲ ଗୁଳି ଜବତ କରାଯାଇଛି। ପାକିସ୍ତାନ ଅଧିକୃତ କଶ୍ମୀରରୁ ଏସବୁ ଅସ୍ତ୍ରଶସ୍ତ୍ର ଆସୁଥିବା ସେ କହିଛନ୍ତି। ଗତବର୍ଷ ଭାରତର ଅନୁପ୍ରବେଶ କରୁଥିବା ୧୩୦ଟି ଘଟଣା ଘଟିଥିଲା। ତେବେ ଚଳିତ ବର୍ଷ ଏହା ୩୦ରେ ସୀମିତ ରହିଥିବା ସେ କହିଛନ୍ତି। ସୂଚନାଯୋଗ୍ୟ, ପାକିସ୍ତାନ ଗୋଇନ୍ଦା ସଂସ୍ଥା ଆଇଏସ୍ଆଇ ଭାରତରେ ଆତଙ୍କବାଦୀ ଆକ୍ରମଣ କରିବା ଲାଗି ଷଡ଼ଯନ୍ତ୍ର ରଚିଛି। ଆଇଏସ୍ଆଇ ନିର୍ଦ୍ଦେଶରେ ପାକିସ୍ତାନ ସୈନ୍ୟ ବାହିନୀ ପକ୍ଷରୁ ଆତଙ୍କବାଦୀଙ୍କୁ ଆବଶ୍ୟକ ତାଲିମ୍ ଯୋଗାଇ ଦିଆଯାଉଛି। ସେହିପରି ଚାଇନାର ମଧ୍ୟ ଏହି କାର୍ଯ୍ୟରେ ପରୋକ୍ଷ ଭାବେ ଜଡ଼ିତ ରହିଛି। ଏହା ଆତଙ୍କବାଦୀଙ୍କଠାରୁ ବିଭିନ୍ନ ସମୟରେ ଜବତ ହୋଇଥିବା ଚାଇନା ବନ୍ଧୁକ ଏବଂ ପିସ୍ତଲରୁ ସ୍ବତଃ ପ୍ରମାଣିତ ହୋଇଛି।
