କଟକ ଅଫିସ,୨୭ା୮: ଏସ୍ସିବି ମେଡିକାଲ କଲେଜ ଓ ହସ୍ପିଟାଲ କାଜୁଆଲିଟିର ଚତୁର୍ଥ ମହଲାରେ ଥିବା ସେଣ୍ଟ୍ରାଲ ଆଇସିୟୁକୁ ବନ୍ଦ କରି ଦିଆଯାଇଛି। ବୁଧବାର ଏଠାରୁ ଗୋଟିଏ ଦିନରେ ୧୪ ଜଣ କର୍ମଚାରୀଙ୍କ କୋଭିଡ୍ ଟେଷ୍ଟ ରିପୋର୍ଟ ପଜିଟିଭ ବାହାରିଛି। ଏଯାବତ୍ ଏଠାରେ କାମ କରୁଥିବା ମୋଟ ୩୧ ଜଣ ତୃତୀୟ ଣ୍ରେଣୀ କର୍ମଚାରୀଙ୍କ ମଧ୍ୟରୁ ୨୦ ଜଣ କରୋନା ଆକ୍ରାନ୍ତ ହେଲେଣି। ଏଭଳି ପରିସ୍ଥିତିରେ ହସ୍ପିଟାଲ କର୍ତ୍ତୃପକ୍ଷ ବାଧ୍ୟହୋଇ ଏହି ବିଭାଗରେ ସପ୍ତାହକ ପାଇଁ ତାଲା ଝୁଲାଇଛନ୍ତି।
ବୁଧବାର ଏଠାରୁ ଚିହ୍ନଟ ହୋଇଥିବା ୧୪ ଜଣ ଆକ୍ରାନ୍ତଙ୍କ ମଧ୍ୟରେ ୧୧ ସେବିକା, ୨ ଫାର୍ମାସିଷ୍ଟ ଓ ଜଣେ ନିରାପତ୍ତାରକ୍ଷୀ ରହିଛନ୍ତି। ରିପୋର୍ଟ ଲେଖା ହେବା ବେଳକୁ ଆକ୍ରାନ୍ତମାନଙ୍କୁ ଆଇସୋଲେଶନ ୱାର୍ଡର ଏକ ରୁମ୍ରେ ରଖାଯାଇଥିଲା। ଏହାକୁ ନେଇ କର୍ମଚାରୀମାନେ ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି। ୩୧ ଜଣ ତୃତୀୟ ଶ୍ରେଣୀ କର୍ମଚାରୀଙ୍କ ବ୍ୟତୀତ ଏଠାରେ ଆଉ ୧୩ ଜଣ ଚତୁର୍ଥ ଶ୍ରେଣୀ କର୍ମଚାରୀ କାମ କରୁଛନ୍ତି। ବୁଧବାର ସେମାନଙ୍କ ମଧ୍ୟରୁ କେତେଜଣଙ୍କ କୋଭିଡ୍ ଟେଷ୍ଟ ହୋଇଛି। ୨ଦିନ ମଧ୍ୟରେ ଅନ୍ୟମାନଙ୍କ ଟେଷ୍ଟିଂ କରାଯିବ। ଗୋଟିଏ ସପ୍ତାହ ବନ୍ଦ ରହିବା ଭିତରେ ବିଭାଗୀୟ ପରିସର ସମ୍ପୂର୍ଣ୍ଣ ସାନିଟାଇଜ୍ ହେବ। ୩୦ ଶଯ୍ୟାବିଶିଷ୍ଟ ଏହି ଆଇସିୟୁର ସମସ୍ତ ରୋଗୀଙ୍କୁ ଯିଏ ଯେଉଁ ବିଭାଗର, ସେଠାକୁ ପଠାଇ ଦିଆଯାଇଛି। ସଙ୍କଟାପନ୍ନ ସ୍ଥିତିରେ ଥିବା ରୋଗୀଙ୍କୁ ଅନ୍ୟ ଆଇସିୟୁକୁ ସ୍ଥାନାନ୍ତର କରାଯାଇଛି ବୋଲି ଆନାସ୍ଥେସିଆ ବିଭାଗ ମୁଖ୍ୟ ଡା. ଦୈତାରୀ ରାଉତ କହିଛନ୍ତି। ଉଲ୍ଲେଖଯୋଗ୍ୟ, ଏହି ବିଲ୍ଡିଂର ଦ୍ୱିତୀୟ ମହଲା ଟ୍ରମା କେୟାର ପାଖରେ ଥିବା କ୍ୟାବିନରେ ଯୋଡ଼ାମୁଣ୍ଡ ଶିଶୁ ଜଗା କାଳିଆ ଚିକିତ୍ସିତ ହେଉଛନ୍ତି। ସେଠାରୁ କରୋନା ଆକ୍ରାନ୍ତ ଚିହ୍ନଟ ହୋଇଥିଲେ ମଧ୍ୟ ଏହି ଦୁଇ ଶିଶୁ ନିରାପଦ ଅଛନ୍ତି।
