ରାଞ୍ଚି, ୧୩।୮: ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ କରୋନ ଭାଇରସ ଆକ୍ରାନ୍ତ ହୋଇନାହାନ୍ତି। ରାଞ୍ଚିରେ ଧୋନୀଙ୍କ କରୋନ ଟେଷ୍ଟ ହୋଇଥିଲା। ଯାହାର ରିପୋର୍ଟ ଗୁରୁବାର ସନ୍ଧ୍ୟାରେ ନେଗେଟିଭ ଆସିଛି। ଫଳରେ ଧୋନୀ ଖୁବ୍ ଶୀଘ୍ର ତାଙ୍କ ଆଇପିଏଲ୍ ଦଳ ଚେନ୍ନାଇ ସୁପର୍ କିଙ୍ଗ୍ସ (ସିଏସ୍କେ)ରେ ଯୋଗଦେବେ ବୋଲି ଜଣାପଡ଼ିଛି। ସୁପର୍ କିଙ୍ଗ୍ସ ଦଳ ସହ ଯୋଗଦେବା ଲାଗି ଧୋନୀ ଶୁକ୍ରବାର ଚେନ୍ନାଇ ଅଭିମୁଖେ ଗସ୍ତ କରିବାର ସମ୍ଭାବନା ରହିଛି। ୟୁଏଇରେ ହେବାକୁ ଥିବା ଆଇପିଏଲ୍ର ତ୍ରୟୋଦଶ ସଂସ୍କରଣ ପୂର୍ବରୁ ସୁପର୍ କିଙ୍ଗ୍ସ ଦଳର ଏକ ପ୍ରି-ସିଜନ କ୍ୟାମ୍ପ୍ ଚେନ୍ନାଇରେ ହେବାର କାର୍ଯ୍ୟସୂଚୀ ରହିଛି। ଏହା ଅଗଷ୍ଟ ୧୫ରୁ ୨୦ ପର୍ଯ୍ୟନ୍ତ ହେବ। ଏଥିରେ ଧୋନୀ ଯୋଗ ଦେବେ ବୋଲି ଜଣାପଡ଼ିଛି। ଧୋନୀଙ୍କ ବ୍ୟତୀତ ସୁରେଶ ରାଇନା, ହରଭଜନ ସିଂ, ଅମ୍ବାତି ରାୟୁଡୁ ପ୍ରମୁଖ ଏଥିରେ ଯୋଗ ଦେବେ। ସୂଚନା ମୁତାବକ କରୋନା କଟକଣା ପରଠାରୁ ଧୋନୀ ରାଞ୍ଚିସ୍ଥିତ ତାଙ୍କ ଫାର୍ମ ହାଉସରେ ପରିବାର ସହ ସମୟ ଅତିବାହିତ କରୁଛନ୍ତି। ଗୁରୁ ନାନକ ହସ୍ପିଟାଲ ପକ୍ଷରୁ ଧୋନୀଙ୍କ ଫାର୍ମ ହାଉସକୁ ଯାଇ ତାଙ୍କର ସାମ୍ପଲ ସଂଗ୍ରହ କରାଯାଇଥିଲା।
