ମୁମ୍ବାଇ: ଦିନେ ନିଜ ଅଭିନୟ ବଳରେ ଦର୍ଶକଙ୍କ ପ୍ରିୟ ନାୟକ ପାଲଟିଥିବା ସୁନିଲ ସେଟ୍ଟୀ ଆଜି ବଡ ପରଦାଠାରୁ ବହୁ ଦୂରରେ। କର୍ନାଟକର ଏହି ମୂଳ ବାସିନ୍ଦା ୫୯ ବର୍ଷରେ ପଦାର୍ପଣ କରିଛନ୍ତି। ପ୍ରଥମେ ୧୯୯୨ରେ ଫିଲ୍ମ ‘ବଳବାନ’ ମାଧ୍ୟମରେ ବଲିଉଡ୍ରେ ଏଣ୍ଟ୍ରି କରିଥିଲେ। ଏଥିରେ ତାଙ୍କ ସହ ନଜର ଆସିଥିଲେ ନାୟିକା ଦିବ୍ୟା ଭାରତି। ଯଦିଓ ଏହା ହିଟ୍ ହୋଇ ନ ଥିଲା ସେ କିନ୍ତୁ ଆରମ୍ଭରୁ ସଲମାନ, ଅକ୍ଷୟ, ଶାହାରୁଖ ଖାଁଙ୍କୁ ଟକ୍କର ଦେବାକୁ ଆରମ୍ଭ କରି ଦେଇଥିଲେ। ତାଙ୍କୁ ପ୍ରକୃତରେ ଅସଲ ପରିଚୟ ମିଳିଲା ଫିଲ୍ମ ‘ଦିଲଓ୍ବାଲେ’ରେ। ପାଖାପାଖି ୧୧୦ ବଲିଉଡ୍ ଫିଲ୍ମରେ ଅଭିନୟ କରିଥିବା ସୁନିଲ ଧିରେ ଧିରେ ତାଙ୍କ ପାରିଶ୍ରମିକ ବଢାଇ ଚାଲିଥିଲେ। ଏହାପରେ କିନ୍ତୁ ସେ କେମିତି କେଜାଣି ବଲିଉଡ୍ରୁ ଏକ ପ୍ରକାର ଦୂରେଇ ଗଲେ। ନିଜର ହୋଟେଲ ବିଜ୍ନେସରେ ସମୟ ଦେଲେ ସୁନିଲ। ଅଭିନୟ କରିବା ସମୟରେ ସେ ଆର୍କିଟେକ୍ଟ ମାନାଙ୍କୁ ଡେଟ୍ କରୁଥିବା ବେଳେ ୧୯୯୧ରେ ଉଭୟ ବିବାହ କରିଥିଲେ। ଏହାପରେ ସେମାନେ ନିଜର ବ୍ୟବସାୟକୁ ଗୁରୁତ୍ୱ ଦେଇଥିଲେ। ହୋଟେଲ ବିଜ୍ନେସ ସହ ମାନାଙ୍କର ଏନ୍ଜିଓ ବୁଟିକ୍, ପ୍ରଡକସନ୍ ହାଉସକୁ ନେଇ ଏବେ ଏହି ଦମ୍ପତି ବର୍ଷକୁ ପ୍ରାୟ ୧୦୦ କୋଟି ଟଙ୍କା ରୋଜଗାର କରନ୍ତି ବୋଲି କୁହନ୍ତି।
