ଗୁଣ୍ଟୁର,୮।୮: କରୋନା ଭୂତାଣୁ ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି। ଏହାକୁ ନେଇ କେହି କାହାର ସାହାଯ୍ୟ କରିବାକୁ ଇଚ୍ଛା ପ୍ରକାଶ କରୁନାହାନ୍ତି। ମଣିଷର ଅମାନବିକତା ପ୍ରଦର୍ଶନର ଅନେକ ଘଟଣା ପୂର୍ବରୁ ଦେଖିବାକୁ ମିଳିଥିବା ବେଳେ ଏବେ ସେଭଳି କିଛି ଘଟିଛି ଆନ୍ଧ୍ରପ୍ରଦେଶର ଗୁଣ୍ଟୁର ଜିଲା ନିକଟରେ ଥିବା ଜାତୀୟ ରାଜପଥରେ। ଦୁର୍ଘଟଣାର ଶିକାର ହୋଇ ଜଣେ ଯୁବକ ଛଟପଟ ହେଉଥିବା ବେଳେ ବାଟ ଦେଇ ଯାଉଥିବା କେହି ବି ସହାୟତା କରିବାକୁ ଆଗକୁ ଆସି ନ ଥିଲେ। ହେଲେ ଜଣେ ମହିଳା ବିଧାୟକ ତାଙ୍କୁ ସାହାଯ୍ୟ କରିଛନ୍ତି।
ଗୁଣ୍ଟୁରରୁ ନିଜ ବାଇକ୍ ନେଇ ପୁଡ୍ଡଗୁରାଲା ଯାଉଥିଲେ ଜଣେ ଯୁବକ। ଏକ ଗାଡ଼ି ତାଙ୍କୁ ଧକ୍କା ଦେଇ ପଳାଇଥିଲେ। ଅନେକ ସମୟ ଧରି ରାସ୍ତାରେ ପଡ଼ି ରହିବା ପରେ ମଧ୍ୟ ତାଙ୍କୁ କେହି ଉଠାଇ ନ ଥିଲେ। କରୋନା ଡରରେ ତାଙ୍କୁ କେହି ଛୁଇଁ ମଧ୍ୟ ନ ଥିଲେ। ଏହି ସମୟରେ ଶାସକ ଦଳ ବିଧାୟକ ଶ୍ରୀଦେବୀ ସେହି ରାସ୍ତାରେ ଯାଉଥିଲେ। ରାସ୍ତା ଉପରେ ପଡ଼ିଥିବା ଯୁବକଙ୍କୁ ଦେଖି ଗାଡ଼ି ରଖି ସେ ପୋଲିସକୁ ସୂଚନା ଦେଇଥିଲେ। ସେଠାରେ ହିଁ ସେ ଯୁବକଙ୍କୁ ପ୍ରାଥମିକ ଚିକିତ୍ସା କରିଥିଲେ। ପରେ ପୋଲିସ ପାଟ୍ରୋଲିଂ ଗାଡ଼ି ପହଞ୍ଚିବା ପରେ ଯୁବକଙ୍କୁ ଡାକ୍ତରଖାନା ପଠାଯାଇଥିଲା।
ଶ୍ରୀଦେବୀ ରାଜ୍ୟର ତାଡ଼ିକାଡ଼ା ବିଧାନସଭା ସିଟ୍ରୁ ବିଧାୟକ ଅଛନ୍ତି। ଏହା ସହ ସେ ଜଣେ ଡାକ୍ତର ମଧ୍ୟ। ଏଣୁ ସେ ନିଜର କର୍ତ୍ତବ୍ୟ କରିଥିବା କହିଛନ୍ତି। ହେଲେ ଲୋକଙ୍କ ଏଭଳି ବ୍ୟବହାର ଠିକ୍ ନୁହେଁ ବୋଲି ସେ କହିଛନ୍ତି। ଅପରପକ୍ଷେ ଶ୍ରୀଦେବୀଙ୍କ ଏହି କାମ ସୋସିଆଲ ମିଡିଆରେ ଭାଇରାଲ ହେଉଛି।
