ନୂଆଦିଲ୍ଲୀ,୨୪ା୭(ପି.ଟି.):ସୈନ୍ୟବାହିନୀରେ ମହିଳା ଅଫିସରମାନଙ୍କୁ ସ୍ଥାୟୀ କମିଶନ ପ୍ରଦାନ ଲାଗି ପ୍ରତିରକ୍ଷା ମନ୍ତ୍ରଣାଳୟ ନିର୍ଦ୍ଦେଶନାମା ଜାରି କରିଛି। ସଂକ୍ଷିପ୍ତ ସେବା କମିଶନ (ଏସ୍ଏସ୍ସି) ଯୋଜନାରେ ନିଯୁକ୍ତ ସମସ୍ତ ମହିଳା ଅଫିସରଙ୍କୁ ସ୍ଥାୟୀ କମିଶନ ନିମନ୍ତେ ବିଚାର କରିବା ପାଇଁ ଗତ ଫେବୃୟାରୀରେ ସୁପ୍ରିମକୋର୍ଟ ଐତିହାସିକ ରାୟ ପ୍ରଦାନ କରିଥିଲେ। ସରକାରଙ୍କ ନିର୍ଦ୍ଦେଶନାମା ଫଳରେ ସୈନ୍ୟବାହିନୀରେ ମହିଳା ଅଧିକାରୀମାନଙ୍କୁ ବଡ଼ ଭୂମିକା ମିଳିବ ଓ ଅବସର ନେବା ପର୍ଯ୍ୟନ୍ତ ସେମାନେ କାର୍ଯ୍ୟ କରିପାରିବେ ବୋଲି ସେନା ମୁଖପାତ୍ର କଲୋନେଲ ଅମନ ଆନନ୍ଦ କହିଛନ୍ତି।
ନିର୍ଦ୍ଦେଶନାମା ଅନୁଯାୟୀ ଭାରତୀୟ ସେନାର ସମସ୍ତ ୧୦ଟି ବିଭାଗରେ ଏସ୍ଏସ୍ସିରେ ଥିବା ମହିଳା ଅଧିକାରୀମାନଙ୍କୁ ସ୍ଥାୟୀ କମିଶନ ମିଳିବ। ସେହି ବିଭାଗଗୁଡ଼ିକ ହେଲା ଆର୍ମି ଏୟାର ଡିଫେନ୍ସ, ସିଗ୍ନାଲ୍ସ, ଇଞ୍ଜିନିୟର୍ସ, ଆର୍ମି ଆଭିଏଶନ, ଇଲେକ୍ଟ୍ରୋନିକ୍ସ ଓ ମେକାନିକାଲ ଇଞ୍ଜିନିୟର୍ସ, ଆର୍ମି ସର୍ଭିସ କର୍ପସ ଏବଂ ଇଣ୍ଟେଲିଜେନ୍ସ କର୍ପସ। ସମ୍ପ୍ରତି ମହିଳା ଅଫିସରକୁ କେବଳ ଦୁଇଟି ବିଭାଗ ଜଜ୍ ଆଡଭୋକେଟ ଜେନେରାଲ (ଜେଏଜି) ଏବଂ ଶିକ୍ଷାରେ ସ୍ଥାୟୀ କମିଶନ ମିଳିଛି। ଏସ୍ଏସ୍ସି ମହିଳା ଅଫିସରମାନେ ସେମାନଙ୍କର ଆବଶ୍ୟକ ଦସ୍ତାବିଜ୍ କାମ ଶେଷ କରିବା ପରେ ଚୟନ ବୋର୍ଡ ବସି ସେମାନଙ୍କୁ ସ୍ଥାୟୀ କମିଶନ ପ୍ରଦାନ କରିବେ ବୋଲି ସେନା ମୁଖପାତ୍ର କହିଛନ୍ତି।
ଏସ୍ଏସ୍ସିରେ ମହିଳା ଅଫିସରମାନଙ୍କୁ ପ୍ରାରମ୍ଭିକ ପର୍ଯ୍ୟାୟରେ ୫ ବର୍ଷ ପାଇଁ ନିଆଯାଉଥିବାବେଳେ ଏହାକୁ ୧୪ ବର୍ଷ ପର୍ଯ୍ୟନ୍ତ ବଢ଼ାଯିବାର ବ୍ୟବସ୍ଥା ରହିଥିଲା। ତେବେ ସ୍ଥାୟୀ କମିଶନରେ ସେମାନେ ଅବସର ନେବା ପର୍ଯ୍ୟନ୍ତ ସେନାରେ କାର୍ଯ୍ୟ କରିବା ପାଇଁ ଅନୁମତି ପାଇବେ। ସିଗ୍ନାଲ୍ସ, ଇଞ୍ଜିନିୟୟରିଂ, ଆର୍ମି ଆଭିଏଶନ, ଆର୍ମି ଏୟାର ଡିଫେନ୍ସ ଏବଂ ଇଲେକ୍ଟ୍ରୋନିକ୍ସ ଓ ମେକାନିକାଲରେ ମହିଳାମାନଙ୍କୁ ସ୍ଥାୟୀ କମିଶନ କରାଇବା ପାଇଁ ଗତବର୍ଷ ପ୍ରତିରକ୍ଷା ମନ୍ତ୍ରଣାଳୟ ନୀତିଗତ ନିଷ୍ପତ୍ତି ନେଇଥିଲା। ଖାଲି ସ୍ଥାନ ଏବଂ ମହିଳା ଅଫିସରମାନଙ୍କ ଆଗ୍ରହ, ଉପଯୁକ୍ତତା, ପ୍ରଦର୍ଶନ, ମେଡିକାଲ୍ ଫିଟ୍ନେସ୍ ଏବଂ ପ୍ରତିଯୋଗିତାମୂଳକ ମେଧା ଆଧାରରେ ସ୍ଥାୟୀ କମିଶନ ଦେବା ପାଇଁ ମନ୍ତ୍ରଣାଳୟ ନିଷ୍ପତ୍ତି ନେଇଥିଲା। ସେହି ଅନୁଯାୟୀ ତିନି ବାହିନୀ ମହିଳାମାନଙ୍କୁ ମେଡିକାଲ, ଶିକ୍ଷା, ଆଇନ, ସିଗ୍ନାଲ୍ସ, ଲଜିଷ୍ଟିକ୍ ଏବଂ ଇଞ୍ଜିନିୟରିଂରେ ସ୍ଥାୟୀ ନିଯୁକ୍ତିକୁ ଅନୁମତି ଦେଇଥିଲା। ବାୟୁସେନାରେ ଉଡ଼ାଣ ବିଭାଗକୁ ବାଦ୍ ଦେଇ ଅନ୍ୟ ସବୁ ବିଭାଗରେ ମହିଳା ଅଫିସର ସ୍ଥାୟୀ କମିଶନ ପାଇଁ ଆବେଦନ କରିପାରିବାର ବ୍ୟବସ୍ଥା ଥିଲା। ସେହିପରି ନୌସେନା ଲଜିଷ୍ଟିକ୍ସ, ନାଭାଲ ଡିଜାଇନିଂ, ଏୟାର ଟ୍ରାଫିକ୍ କଣ୍ଟ୍ରୋଲ, ଇଞ୍ଜିନିୟରିଂ ଓ ଆଇନ ବିଭାଗରେ ମହିଳାଙ୍କ ସ୍ଥାୟୀ କମିଶନକୁ ଅନୁମତି ଦେଇଥିଲା।
